Бүгүн, 13-сентябрь күнү Ош шаардык кеңешинин XX сессиясы өтүүдө. Ага Ош шаардык кеңешинин төрагасы Салман Назылбеков, Ош шаардык кеңешинин 31 депутаты, Ош шаарынын мэри Бакытбек Жетигенов жана шаардагы мекеме-ишканалардын жетекчилери катышууда.
Сессияда «Бир Бол» фракциясынан депутат Айгуль Салиева Ош шаарынын мэриясы канча суммадагы инвестиция тартканына кызыкты.
«Замир Байышович, сиз азыр отчетуңузда айттыңыз да. Биз быйыл былтыркыга салыштырмалуу 5 пайызга көп инвестиция тарттык деп. Конкреттүү жооп барбы, кандай инвестиция, кайсыл инвесторлор экен алар?»,-деди депутат.
Депутаттын суроосуна Ош шаардык мэриясынын экономика бөлүмүнүн башчысы Талант Кайымов жооп берди.
«Быйылкы жылы АРИС (Коомчулукту өнүктүрүү жана инвестициялоо агенттиги) программасы боюнча 5 долбоорду ишке ашырып жатабыз.Анын жалпы суммасы 6 млн.доллар болот. Биринчи долбоор бүгүнкү күндө бүтүп калды. Бул Ош улуттук драма театрынын айланасын реконструкциялоо болчу. Экинчи долбоор: Ак-Буура дарыясын Нурматов көчөсү менен Навои көчөсүнө чейинки аралыгын реконструкциялоо, үчүнчү долбоор: Т. Сатылганов атындагы паркта жайкы театралдык курулуштарды куруу, төртүнчү долбоор: борбордук аянтка эс алуучу жай жана фонтандарды куруу, бешинчи долбоор: А. Навои паркынын жогорку бөлүгүнө эс алуучу жай куруу. Бүгүнкү күндө курулуш иштери аткарылып жатат. Андан сырткары, Бабур теары реконструкциядан өткөрүлдү. Бул дагы Ош шаарына салынган негизги инвестиция болуп саналат. Мындан сырткары, «Асанабилл» коомдук кайрымдуулук фонду аркылуу 225-кварталга жана Амир-Темир аймагында мечит, окуу борбору, ФАП куруу иштери жүрүп, пайдаланууга берилип жатат. Мен негизгилерди гана айттым»,-деди Т. Кайымов.
Депутат Айгуль Салиева фонддор, агенттиктердин долбоорун эле инвестицияга кошуп салышканын, инвестиция деген башкача болорун билдирди.
«Мындайча айтканда силер келген фонддор, агенттиктердин долбоорлорун инвестицияга кошуп салыпсыңар да. Инвестиция деген андай болбойт. Инвестиция дегенди википедиядан эле ачып карап коюңуз, сиз айткандар инвестицияга кирбейт»,-деди А. Салиева.