Кыргыз эли ырга шыктуу, ыр жандуу. Ыр жазган акындар, обон чыгарып, ырга жан киргизген обончулар менен ар убак сыймыктанабыз. Алардын бири жамы журтка аттын кашкасындай белгилүү обончу Эгемберди Талипов. Анын элге эмгегин сиңирген артист, атактуу обончу болуп чыга келгени да тегин жерден эмес. Атасы Талип, энеси Салтанат элет жеринде маданиятты терең түшүнгөн сабаттуу адамдар эле. Дээринде таланты бар уулунун келечегин ойлоп, татыктуу таалимтарбия берген. Кароол айылындагы орто мектепке Улуу Ата-Мекендик согуштун катышуучусу, айылдын алгачкы агартуучусу чоң атасы Мамасалы Ботобековдун ысымы ыйгарылган. Эгемберди Талипов чыгармачылык жолунда 500гө жакын обондуу ырлардын автору болду. Өмүр бою аккордеонун колунан түшүрбөй, жараткан обондорунда жашап, чыгармачылык менен эмгектенди. Ал жараткан обондор эл арасында бааланып, ырчылар тарабынан аткарылып келет. Анын чыгарган обондору адамдын жан-дүйнөсүн тарбиялап келүүдө.
Өмүр жолу
Талипов Эгемберди Ботобекович 1952-жылы 11-ноябрда Өзгөн районунун Кароол айыл аймагында туулган. М.Ботобеков атындагы орто мектепти, Ош шаарындагы Ниязалы Борошев атындагы музыкалык окуу жайын, ОшМУнун искусство факультетин артыкчылык диплому менен бүтүргөн.
Эмгек жолун 1978-жылы Өзгөн шаарындагы балдардын музыкалык мектебинде иштөө менен баштаган. Музыкага шыктуу жаш муундарга аккордеондон сабак берген. Кийин көп жылдар ОшМУнун искусство факультетинде иштеди. Анын кесипкөй адис, мыкты обончу болуп жетилишинде аккордеондон сабак берген Икитов Анатолий Николаевичтин, устаты белгилүү акын Жолболду Алибаевдин эмгеги зор. Алар чыгармачылыгына жол ачкан, таасирдүү таалим берген. ОшМУнун искусство факультетинин музыкалык аспаптар жана ырдоо кафедрасынын доценти. Атайын орто жана жогорку музыкалык окуу жайларына арналган аккордеон үчүн көптөгөн окуу китептеринин автору. Тарбиялык зор маанидеги чыгармаларды жаратуудагы, жайылтуудагы эмгеги үчүн СССР композиторлор союзунун I даражадагы диплому, СССРдин бүткүл союздук эл чыгармачылыгынын Ардак грамотасы жана төш белгиси менен сыйланган. КР маданиятынын мыкты кызматкери, КРнын Эмгек сиңирген артисти. Ошондой эле бир нече жолку эл аралык, республикалык кароо-сынактардын, фестивалдардын лауреаты.
Чыгармачылык чыйыр
Ырларга обон жараткан чыгармачылык чыйыры жетимишинчи жылдардан башталган. Фрунзедеги Токтогул Сатылганов атындагы Улуттук филармониянын астындагы эки жылдык эстрадалык студияда окуган. Прокофьев деген аккордеондон сабак берген мугалимдин классында окуп, 2-курста эле обон чыгарууга дилгирленип калган.
Өмүрбек Кулунбаевдин «Айтчы секет» деген ырына обон жазды. Ал кезде болочок жубайы Зуурабүбү да студияда окуйт эле. Ал музыка изилдөөчү, сынчы. Мыкты ырдайт эле. Ошол ырды Роза Байтөриева менен ырдап чыккан. Андан көп өтпөй Асылбек Медетбековдун «Сенин көзүң» деген ырына обон чыгарып, ал обонун Санат Байтөриева, Зуурабүбү Мендешова экөөнүн аткаруусунда радиого жаздырган. Аны Дарика Жалгасынова оркестрдин коштоосунда ырдап чыкты. Таш Мияшевдин «Кыз ырдайт кайыкта» деген ыры аны элге кеңири таанытты. Ал ырдын обонун Ысык-Көлдүн касиетине арбалып жазган. Ошентип анын обондору биринин артынан бири жарала берди. Абдирашит Урбаевдин сөзүнө жазылган «Жанымда дагы бир аз олтуруңуз» ырын Дилбар Дыйканбаева ырдап чыкты. Ыр хит болуп кетти. Динара Акулова «Зирегим», «Тоонун кечи» ырларын ырдап, клип тарттырды. Анатай Өмүркановдун сөзүнө жазылган «Сагынганда атамды» ырын Самара Каримова атасына арнап ырдап чыкты. Эл абдан жакшы кабыл алды.
Анын Кулумбаевдин «Айтчы секет», А.Медетбековдун «Сенин көзүң», Н.Жетикашкаеванын «Жаңы жылым», И.Мансуровдун «Нурзаман», А.Күрүчбековдун «Дыйкан», К.Садыковдун «Тоонун кечи», А.Урбаевдин «Жанымда дагы бир аз олтуруңуз», Б.Алыкуловдун «Зирегим», Т.Байзаковдун «Айлуу түн болор сырдашым», А.Бегимкулованын «Өчүрбөстөн жатам чырагым», Т.Кожомбердиевдин «Сен жокто» деген ырларына жараткан обондору уккулуктуулугу менен айырмаланат.
Обончу эле эмес,окутуучу устат
Ал кыргыз музыкасын өнүктүрүүгө бараандуу салым кошту. Орто жана жогорку музыкалык окуу жайлардын студенттери жана окутуучулары үчүн 5 методикалык китеп жазды.
«Айлуу түн болоор сырдашым», «Токтобочу жашоомдун ыргагы», «Жүз этюд», «Ыр дайрасы – Чангет сай», «Үмүт» деген аталыштагы аккордеон үчүн иштелип чыккан обондуу ыр жыйнактардын автору. «Айлуу түн болот сырдашым» деген биринчи китеби. Ага кыргыздын белгилүү элдик ырлары, обондору кирген. Экинчи китеби «Токтобочу жашоомдун ыргагы» деп аталат. Анда аккордеон үчүн жазылган көлөмдүү чыгармалар камтылган.
Үчүнчү китеби «Этюд» деп аталат. Француз тилинен которгондо машыгуу, көнүгүү дегенди түшүндүрөт. Кыргыз балдарына ылайык, кыргыз колоритин туюндурган 100 этюд жазган.
Төртүнчү китеби «Ыр дайрасы Чангет сай» деп аталат. Анда акындар Түмөнбай Байзаковдун, Барпы Алыкуловдун чыгармаларын топтоштурган. Бул студент жаштарга, окутуучуларга керектүү окуу куралы. ОшМУнун китепканасына өткөрүп берилген.
Бешинчи китеби «Үмүт» деп аталат. Анда обондору, чыгармалары камтылган. Бараандуу эмгеги бааланып, «Кыргыз Республикасынын эмгек сиңирген артисти» наамы ыйгарылган. Учурда жаңы обондорунун ноталары жазылып, анын негизинде кийинки китеби даярдалууда. Бул болсо, анын көп жылдан берки чыгармачылыгындагы топтолгон эмгегинин үзүрү.
Сөзү обону төп келбеген ыр, элге сиңбейт
Кыргыздын салттуу музыкасын иликтеп, 500гө жакын ар кандай обондорду чыгарды. Анын залкар обондорун кыргыздын белгилүү таланттары СССР эл артисти Дарика Жалгасынова, КР эл артисти Керим Турапов, Саламат Садыкова, КР эмгек сиңирген артисти Динара Акулова, Майрамбек Осмонов ж.б. көптөгөн белгилүү артисттер талашып ырдап жүрүшөт.
Агайдын окутуп, тарбиялап, талантын таптап өстүргөн шакирттери Кутман Султанов, Самара Каримова, Надира Сарыкова, Айпери Кулбаева, Таирбек уулу Каныбек өңдүү өнөрлүү ырчылар бүгүнкү күндө жети дубандын жер жерлеринде эмгектенишет. Рыспай Абдыкадыровдун 50 ырын аккордеон үчүн иштеп чыгып, студенттерге окутуп үйрөттү. Рыспай Абдыкадыровдун 70 жылдык мааракесине карата 2011-жылы өткөрүлгөн сынакта Эгемберди Эрматовдун сөзүнө жазылган «Махабат жөнүндө баллада» деген 17 мүнөттүк дастан ырын Эгемберди Талиповдун коштоосунда Айпери Кулбаева аткарып, баш байгени утуп алган.
Аккан арыктан суу агат
Өмүрлүк жубайы Зуурабүбү Мендешова экөө сүйлөшүп жүрүп баш кошкон. Бир үйдө музыканы түшүнгөн эки адам –Эгемберди менен Зуурабүбүнүн болуп калышы да бири-бирине канат, жөлөк болуптур. Аялы Зуурабүбү Мендешова биринчи обондорунун угуучу, сынчысы боло алды.
Эгемберди Талиповдун обончулугу, обончулардын алдыңкы сабында келатканы да ушундан улам болсо керек. Анын чыгарган обондору элдин калың катмарына сиңип, өчпөс болуп келатат. Алардын уул-кыздан уучу кур эмес. 2 уул, 2 кызды тарбиялап өстүрүштү. 8 неберелүү, 1 чеберелүү. Уул-кыздары жогорку билимдүү, ошол эле учурда музыкалык билимдери да бар. Тилекке каршы, чыгармачылыктан алыс адамдар. Небереси Таалайбек музыкалык аспаптарга шык жөндөмдүү, аккордеон ойнойт. Чебере кызы Айсулуу чоң ата, чоң энесине жабыз, сүйлөсө сүйүнтөт, көңүл ачылат…
А.МАТИЕВА