Кыргыз Республикасынын жарандарын медициналык-санитардык жардам менен камсыз кылуу боюнча Мамлекеттик кепилдиктер программасынын шарттары жөнүндө Милдеттүү медициналык камсыздандыруу фондусунун Ош аймактык башкармасынын башчысы Омокеев Максымбек Коңколоевичтен маалымат алганбыз. Төмөндө аны окурмандарга сунуштайтыз.
— Маалым болгондой, мамлекет тарабынан Кыргыз Республикасынын жарандарын медициналык-санитардык жардам менен камсыздоо боюнча Мамлекеттик кепилдиктер программасы кабыл алынган. Мамлекеттик кепилдиктер программасы боюнча медициналык жана фармацевтикалык кызматтар Мамлекеттик кепилдиктер программасын жана ММКнын кошумча программасын аткарууга ММК Фондунун аймактык башкармалыктары менен келишим түзүшкөн саламаттыкты сактоо уюмдары жана дарыкана мекемелери тарабынан көрсөтүлөт. МКП медициналык-санитардык жардамдын төмөнкү түрлөрүн камсыз кылат: медициналык шашылыш жардам; алгачкы медициналык-санитардык жардам; амбулаториялык шартта адистештирилген медициналык жардам; стоматологиялык жардам; стационардык жардам; дары, вакцина менен камсыздоо жана иммундук алдын алуу.
Шашылыш медициналык жардам:
— бейтаптарга жашоо көрсөткүчтөрү боюнча тез медициналык кийлигишүү талап кылынган акыбалда (кырсык, кокустук, уулануу, башка ооруларда жана оор акыбалында)
— шашылыш медициналык жардам кызматы (103 кызматы);
— менчигинин түрүнө карабай саламаттык сактоо уюмдарына кайрылгандаМедициналык шашылыш жардам Кыргыз Республикасынын бардык жарандарына акысыз көрсөтүлөт.
Амбулатордук деңгээлде медициналыккызмат көрсөтүүнүн шарттары:
дарыгердин жолдомосу боюнча бардык катталган калкка 11 базалык изилдөөлөр акысыз жүргүзүлөт: кандын жалпы анализи; зааранын жалпы анализи жана зааранын тунмасынын микроскопиясы; уретралдык мазоктун микроскопиясы; вагиналдык мазоктун микроскопиясы; какырык анализи (мазок микроскопиясы); кандагы кантты аныктоо; заарадагы кантты аныктоо; кандагы холестеринди аныктоо; электрокардиограмма; кандагы гликирленген гемоглобинди аныктоо (кант диабети менен ооруган бейтаптарга — жылына 1 жолу);
Грам боюнча түсүн өзгөртүү методу менен бактериурияга зааранын анализи (кош бойлуу аялдарга биринчи үч айлыкта). Башка лабораториялык жана диагностикалык изилдөөлөр жарандардын жеңилдиктерге ээ болуу укугуна жана дарыгердин жолдомосу болушуна ылайык жүргүзүлөт.
Медициналык-санитардык жардамды акысыз алууга алууга укугу бар жарандардын категорияларынын тизмеси:
1. Улуу Ата Мекендик согуштун катышуучулары.
2. Улуу Ата Мекендик согуштун жана Баткен окуяларынын майыптары.
3. Эл аралык терроризмге каршы күрөшүү боюнча согуштук иш-аракеттердин жүрүшүндө жабыр тарткан жана майып болушкан жарандар.
4. Улуу Ата Мекендик согуш жылдарында ооруктагы күжүрмөн эмгеги жана кынтыксыз аскердик кызматы үчүн СССРдин орден жана медалдары менен сыйланган жарандар.
5. Концлагерлердин мурдагы туткундары.
6. Ленинград шаарынын блокадачылары.
7. 70 жаштан жогорку эмгек ардагерлери.
8. «Баатыр эне» ордени жана «Мать-героиня» ордени менен сыйлангандар.
9. Улуу Ата Мекендик согуш жылдарында күч менен мыйзамсыз түрдө жумушчу колонналарына (эмгек армиясына) тартылышып, кийин реабилитацияланган жарандар.
10. Советтер Союзунун Баатырлары жана Даңк орденинин 3 даражасы менен сыйлангандар.
11. Социалисттик Эмгектин Баатырлары.
12. «Кыргыз Республикасынын Баатыры» жогорку наамына ээ болгон, I даражадагы «Манас» ордени менен сыйланган жарандар.
13. Башка мамлекеттердин аймактарындагы согуштук иш-аракеттердин катышуучулары.
14. Чернобыль АЭСтеги авариянын кесепетинен жабыр тартышкан жарандар (радиациялык авариялардын кесепеттеринен улам пайда болгон оорулардан жапа чеккендер; 1986-1987-жылдары Чернобыль АЭСтеги авариялардын кесепеттерин жоюу боюнча иштерге катышкан адамдар; ошондой эле майып болуусу Чернобылдагы кыйроого байланыштуу экендиги аныкталгандар;
1988-1989-жылдары Чернобылдагы аварияда курман болгондордун жана Чернобыль АЭСтеги авариянын кесепеттерин жоюу боюнча жумуштарга катышкан адамдар;
Чернобыль АЭСтеги авариянын кесепетинен улам пайда болгон оорулардан каза болгондордун үй-бүлөлөрү; ажыратуу же көчүрүү аймагынан 1986-жылы Кыргыз Республикасына эвакуациялангандар (ыктыярдуу түрдө чыгып кеткендер), ошондой эле 1986-жылы жана андан кийинки жылдары көчүрүү зонасынан ыктыярдуу түрдө чыгып кеткендер; Чернобыль АЭСтеги авариядан кийин жашап турган аймагынан ыктыярдуу түрдө Кыргыз Республикасына көчүү укугу менен келгендер; аскер кызматчылары жана ички иштер органдарынын жетекчи жана катардагы курамынын көчүрүү зонасында, көчүү укугу менен жашоо зоналарында кызмат өтөшкөн адамдары; ажыратуу, көчүрүү жана жашап туруу зонасынан Кыргыз Республикасына көчүү укугу менен эвакуацияланышкан же көчүрүлүшкөн балдар жана 18 жашка чейинки өспүрүмдөр, анын ичинде эвакуация мезгилинде энесинин курсагында болгондор, ошондой эле жогоруда көрсөтүлгөн жарандардын биринчи жана кийинки муундагы балдары).
15. Аскердик кызматтын милдетин аткаруу учурунда жаракат алып, майып болуп, ден соолугунун мүмкүнчүлүгү чектелгендер.
16. Курман болгон жана дайынсыз жоголгондордун үй-бүлө мүчөлөрү (ата-энелери (атасы, энеси) пенсиялык куракка жеткенде, эгерде курман болгон адам алардын жалгыз баласы болсо; балдары он сегиз жашка чыккыча), ден соолугуна өтө оор, анча оор эмес жеңил зыян тартып, анысы соттук-медициналык экспертизанын тиешелүү корутундусу менен ырасталгандар; 2002-жылдын 17-мартында Жалал-Абад облусунун Аксы районундагы, 2010-жылдын 6-апрелинде Талас облусундагы, 2010-жылдын 7-апрелинде Бишкек жана Нарын шаарларындагы, 2010-жылдын 13, 14, 19-майында Жалал-Абад облусундагы жана 2010-жылы Ош шаарындагы, Ош жана Жалал-Абад облустарындагы июнь окуяларында алган травмалардын кесепетинен ден соолугунун мүмкүнчүлүгү чектелген адам катары таанылгандар.
17. Эмгектик, ошондой эле кесиптик же жалпы оорунун кесепетинен I жана II топтогу майыптыгы бар ден соолугунун мүмкүнчүлүгү чектелген адамдар.
18. Көрүү жана угуу боюнча ден соолугунун мүмкүнчүлүгү чектелген адамдар.
19. Бала кезинен тартып ден соолугунун мүмкүнчүлүгү чектелген адамдар.
20. Ден соолугунун мүмкүнчүлүгү чектелген 18 жашка чейинки балдар.
21. 6 жашка чейинки курактагы балдар.
22. Мамлекеттик балдар үйүндө, үй-бүлөлүк балдар үйүндө (кабыл алган үй-бүлөлөрдө), жетим балдар жана ата-энелеринин камкордугунан ажыраган балдар үчүн үй-интернаттарда жашашкан жетим балдар.
23. Карылар жана ден соолугунун мүмкүнчүлүгү чектелген адамдар үчүн үй-интернаттарда жашашкан жарандар.
24. Чыныгы аскер кызматына чакырылуучу жана амбулатордук деңгээлде же стационардык шарттарда дарылоо үчүн аскердик-дарыгерлик комиссия тарабынан медициналык текшерүүгө жөнөтүлгөн жарандар.
25. Мөөнөттүү кызматтын аскер кызматчылары, эгерде аскер кызматын өтөп жаткан мезгилде ведомстволук саламаттык сактоо мекемелеринде квалификациялуу медициналык жардам көрсөтүү мүмкүнчүлүгү жок болсо.
26. ВИЧ/СПИД менен жашашкан адамдар.
27. Жалпы билим берүүчү мекемелердин окуучулары окууну бүткөнгө чейин, бирок алардын 18 жашка чейинки курагында гана, аз камсыз болушкан үй-бүлөдөгү 16 жашка чейинки курактагы балдар, социалдык өнүктүрүү органдарынан алынган маалымдаманы көрсөтүү менен.
28. 70 жаштан жогору курактагы пенсионерлер.
29. Баштапкы тергөөдөгү адамдар, ошондой эле жаза мөөнөтүн өтөп жаткандар, пациенттин өмүрүнө коркунуч жаратуучу кечиктирилгис абал пайда болгон учурларда, эгерде аларга пенитенциардык системанын медициналык кызматтарында, Кыргыз Республикасынын Улуттук коопсуздук мамлекеттик комитетинин тергөө изоляторунда, Кыргыз Республикасынын Ички иштер министрлигинин убактылуу кармоочу изоляторунда медициналык жардам көрсөтүүгө мүмкүн болбосо.
30. Ата-энелеринин камкордугусуз калган балдар үйүнүн, үй-интернаттардын 23 жашка чейинки бүтүрүүчүлөрү.
Медициналык-санитардык жардамды амбулаториялык жана стионардык деңгээлдерде негизги оорусунун клиникалык көрсөткүчтөрү боюнча акысыз алууга укугу бар жарандардын категориялары:
1. Кош бойлуулук боюнча каттоодо турган аялдар.
2. Кош бойлуулук патологиясы бар, стационардык дарылоодогу аялдар (негизги диагноз боюнча).
3. Социалдык жана медициналык көрсөткүчтөр боюнча бойдон алдыруу үчүн келишкен аялдар.
4. Төрөө үчүн келген аялдар.
5. Төрөттөн кийинки татаалдашуудан жапа чеккен аялдар, төрөттөн кийинки 10 аптанын ичинде.
6. Кургак учук менен ооругандар.
7. Бронханын астмасы менен ооругандар.
8. Терминалдык баскычтагы онкологиялык оорулуулар.
9. Психикалык бузулуу менен ооругандар (параноиддик шизофрения, өнөкөт жөөлүү менен байланышкан оорулар, ар кыл генездеги аффективдүү бузулуулар).
10. Эпилепсиядан жабыр тарткандар.
11. Кант диабетинен жабыр тарткандар.
12. Канттык эмес диабеттен жабыр тарткандар.
13. Өзгөчө жана карантиндик инфекциялардын (ич келте, паратиф, күйдүргү, чума) негизинде пайда болгон оорулардан жабыр тарткандар жана алар менен карым-катышта болгондор.
14. Кутурма оорусунан жабыркагандар жана оорулуу менен карым-катышта болуп, кутурма оорусун жуктуруп алуусу мүмкүн болгон адамдар.
15. Менингококктук менингиттен жабыркагандар.
16. Гемофилиядан жабыркагандар.
17. Лабораториялык изилдөө менен ырасталган жана ырасталбаган коронавирус инфекциясы (COVID-19) менен ооругандар жана алар менен карым-катышта болгон адамдар.
Андан сырткары, милдеттүү медициналык камсыздандыруу (ММК) боюнча камсыздандырылган жарандар, анын ичинде:
— иштегендер, төгүмү төлөнгөндөр;
— 70 жашка чейинки пенсионерлер;
— социалдык жөлөк пул алгандар;
— балдар 16 жашка чейин, эгерде мектепте
окуган окуучу болсо 18 жашка чейин;
— ММКга өз алдынча төгүм төлөгөн адамдар;
— айыл чарбасында иштеген (фермерлер) жана милдеттүү медициналык камсыздандырууга төгүм төлөгөн адамдар;
— ММК полиси бар аскер кызматчылары;
— ММК полиси бар качкындар амбулаториялык деңгээлде (ҮМБ/ҮДТ) дарыгерлердин жолдомосуна ылайык лабораториялык жана диагностикалык текшерүүлөрдү (бийик технологиялык изилдөөлөрдөн сырткары) акысыз өткөнгө укугу бар.
Жогоруда көрсөтүлгөн ММК боюнча камсыздандырылган жарандар амбулаториялык деңгээлде дарыланганда ММКнын Кошумча программасы боюнча үй-бүлөлүк дарыгер жазып берген ММК рецеби (көгүш түстө) менен жеңилдетилген түрдө (30-100%ка чейин) дары-дармектерди ММК фонду менен келишим түзгөн аптекалар аркылуу ала алышат. Андан сырткары, ҮМБ/ҮДТда каттоодо турган жана катталган орулуулардын жеңилдетилген категориясына 5 оорунун аталышы боюнча (терминалдык стадиядагы онкологиялык оорулар, параноялык шизофрения, аффективдик бузулуулар, талма, бронхалык астма) камсыздандырылган статусуна карабастан МКПнын рецебин жазып берүү аркылуу дары-дармек менен камсыздоо ММК фондунун аймактык башкармалыктары менен келишим түзгөн дарыкана мекемелери аркылуу жүргүзүлөт.
Ал эми, кант диабети, кантсыз диабет, гемофилия, кургак учук оорулары менен ооруган бейтаптарга дары-дармек каражаттарын сатып алуу борбордоштурулган тартипте Кыргыз Республикасынын Саламаттык сактоо министрлиги тарабынан жүргүзүлөт жана ҮМБ/ ҮДТу аркылуу бейтаптарга МКПда көрсөтүлгөн берүү ченемдерине ылайык акысыз таркатылып берилет.
Стационарларга жаткан учурда бейтаптар кошумча төлөм төлөшөт. Мамлекеттик кепилдиктер программасындагы стационардык дарылануудагы кошумча төлөмдүн өлчөмү дарыгердин жолдомосуна, оорунун түрүнө (хирургиялык же терапиялык), медициналык жардам алууда жеңилдиктерди алуу укугуна, камсыздандыруунун статусуна жараша 3 деңгээлге бөлүнгөн: Минималдуу, орточо жана максималдуу (облуста жана райондордо терапиялык профилде минималдуу 330 сом, орточо 840 сом, максималдуу 2650 сом; хирургиялык профилде минималдуу 430, орточо 1090, максималдуу 3440 сом;республикалык стационарларда терапиялык профилде минималдуу 330 сом, орточо 1160 сом, максималдуу 2980; хирургиялык профилде минималдуу 430, орточо 1510, максималдуу 3870 сом).
Мамлекеттик кепилдик программасынын №1, №2 тизмелерде белгиленген жарандардын категориялары үчүн стационардык шартта дарылоо акысыз жүргүзүлөт.
Бул жерде эки маанилүү эскертүү бар. Биринчиси №1 тизмедеги категорияга тиешелүү:
«жылына эки жолу пландуу ооруканага жаткыруудан ашпаса (6 жашка чейинки балдарды кошпогондо)» жана экинчиси №2 тизмедеги категорияга тиешелүү «негизги оорусу боюнча» стационардык жардам акысыз көрсөтүлөт.
Кошумча төлөмдүн минималдуу деңгээли (330-430сом) өлчөмүндө төмөндөгү жарандарга каралган:
— 70 жашка чейинки пенсионерлер үчүн;
— 70 жашка чейинки эмгек ардагерлери үчүн;
— социалдык жөлөк пул алгандар үчүн;
Кошумча төлөмдүн орточо деңгээлдеги (840-1090сом) өлчөмүндө милдеттүү медициналык камсыздандыруу боюнча камсыздандырылган жарандар төлөй алышат. Кошумча төлөмдүн максималдуу деңгээлдеги өлчөмүн (2650-3440 сом) милдеттүү медициналык камсыздандыруу боюнча камсыздандырылбаган жарандар, ооруканага жолдомосу бар учурда төлөшөт.
Камсыздандырылбаган жарандар, амбулаториялык деңгээлде лабораториялык жана диагностикалык текшерүүдөн өткөндө кошумча төлөмдү Прейскурантка ылайык текшерүүлөр наркын 100% өлчөмүндө төлөшөт.
Стационардык дарылоодо бейтаптарга зарыл болгон консультацияларды, лабораториялык жана диагностикалык текшерүүлөрдү өткөрүү үчүн, ошондой эле операцияга, наркозго, дары-дармекке кошумча акы алууга жол берилбейт (кымбат баалуу лабораториялык жана диагностикалык текшерүүлөрдү жана татаал ыкмаларды эске албаганда).
Кыргыз Республикасынын аз камсыз болгон категорияга кирген жарандары социалдык коргоо органдары же айыл өкмөтүнүн социалдык кызматкерлери берген маалымкатты бергенде саламаттык сактоо уюмунун дарылоо-контролдоо комиссиясынын чечими боюнча кошумча төлөмдү төгүүдөн бошотулушу мүмкүн. Эгерде, стационарда бейтапты дарылоого кеткен чыгымдар Саламаттык сактоо министрлиги бекиткен дарылануунун орточо наркынан үч эсе ашып кетсе, саламаттыкты сактоо уюмунун эксперттик-контролдук комиссиясы, пациент мындан аркы дарылануусу үчүн дары-дармекке кошумча чыгашаны төлөп берүүсү тууралуу чечим кабыл алат. Ооруканага жаткырууга жолдомосу жок жарандарга пландуу стационардык жардам алардын жеңилдиктерге болгон укугуна карабастан төлөмдү дарылоонун бекитилген орточо наркы өлчөмүндө төлөөсү менен жүргүзүлөт.
Жазып алган: К.Кыдыралиева