Зарипа Самашовна Абдураимова алты жашында 1-класска барат. Айылындагы А.Осмонов атындагы сегиз жылдык мектептен билим алат, 8-классты аяктаган соң, 1972-жылы Жалал-Абад шаарындагыА.С.Пушкин атындагы педагогикалык окуу жайына тапшырат. Окуу жайды 1976-жылы “Артыкчылык диплому” менен аяктайт. Эмгек жолун Сузак районундагы К.Маркс ( азыркы К. Эрматов) жатак-мектебинде тарбиячы болуп иштөөдөн баштайт. 1977-1979-жылдары ушул эле райондогу Правда (азыркы А. Сейдакматов) атындагы орто мектебинде пионер вожатый болуп иштейт. 1979-1982-жылдары Ош мамлекеттик педагогикалык институтунда (азыркы ОшМУда) окуп, педагогика жана башталгыч билим берүүнүн усилияты адистигине ээ болот. 1983-1985-жылдары Ош шаарындагы № 35 бала бакчада тарбиячы, 1985-2002-жылдары Ош гуманитардык педагогикалык институтунд а окутуучу, ага окутуучу, практика башчысы болуп эмгектенген.
Жалал-Абад облусундагы Сузак районунун Ак-Булак айылында 1958-жылы 9-майда мугалимдин үй-бүлөсүндө туулган. Атасы Самаш Абдураимов, апасы Буажар Абдураимова экөө 9 перзенттүү болушуп, аларга тарбия, билим беришти. Эрезеге жеткиришти, алардан небере, чөбөрө көрүштү. Мектепте мугалим болуп иштеп турган мезгилде, 1943-жылы 3-сентябрда өз ыктыяры менен Мекенди коргоо үчүн согушка аттанат. Украина фронтунда Маршал Георгий Константинович Жуковдун командачылыгында 283-аткычтар полкунда кызмат өтөйт. 1944-жылы 14-июлда айыгышкан катуу салгылашта оң бутунан оор жарадар болуп, госпиталда дарыланат. Айыккандан кийин, туулуп өскөн айылына келип, А.Осмонов атындагы мектептен мугалимдик кесибин улантат. Согуштун ардагери Самаш Абдураимовдун көкүрөгү орден -медалдарга толо. Атасынын Мекен үчүн көрсөткөн эрдиктери үчүн алган сыйлыктарын уул-кыздары сакташып, таберик көрүшөт. Ал эми апасы Буажар Абдураимова “Баатыр Эне” наамын 2013-жылы алган. Азыркы күндө карылыктын кадырлуу күндөрүн өткөрүп, уул- кыздарына ак батасын берип, жакшы тилегин айтып келет.
“Баланы мектепке даярдоодо үй-бүлөнүн ролу”, “Педагогикалык практика”, “Бөбөктөргө белек”, “Баланы мектепке даярдоо”,(авторлош) “Мугалим , сабак жана сынчыл ойлом стратегиясы”, “Педагогиканы окутуунун технологиялары” жана башка усулдук колдонмолордун, бир канча илимий макалалардын автору.
2005-жылы Алыкул Осмонов атындагы мектептин 75 жылдыгын өткөрүү боюнча алгачкылардан болуп марафон уюштурууга демилге көтөргөн. Тарыхы кенен, мектептин түзүлгөндүгүнүн 90 жылдыгы жөнүндө, мектепте эмгектенип кеткен мугалимдер жана бүтүрүүчүлөр, азыркы күндөгү мектептин турмушу тууралуу китеп жазып, басмаканага даярдоонун аракетин көрүп жаткан кези.”Ак-Булактын алгачкы агартуучусу”, “Ак-Булак баяны” деп аталган тарыхый очерктин автору.
Баланы мектепке даярдоо көйгөйүн изилдеп, учурда окуу жайларда болочок башталгыч класстардын мугалимдерин даярдоодо “Мектепке даярдоо” дисциплинасын окутуунун зарылдыгын сунуштаган. Түштүк аймагындагы бир топ жогорку окуу жайларында конок лекцияларды өтүп, иш-тажрыйбасын кеңири жайылтып келе жатат.
Мектептерге үйрөтүүчү практикага чыкканда усулчу-мугалимдер сабак өтүп, андан кийин студент практиканттардан талап кылчу. Жалал-Абад шаарындагы А.С.Пушкин атындагы педагогикалык окуу жайында окуп жүргөн мезгилде Сузак районундагы Тайгараев айылындагы Кызыл-Пахтачы орто мектебине практикага чыгышат. Ошол учурда окуу жайдын орус тилчи мугалими К.Д.Емильяновдун ордуна Зарипа Абдураимова эжеке 3-класска кол эмгек сабагынан “Кагаздан кайык жасоо” деген темада сабак өтөт. Эжеке, окуучуларга сызабыз, бүктөйбүз, кыркабыз деген терминди колдонуп, сабак өткөндө, класс мугалими туура эмес айттың, сызгыла, бүктөгүлө, кырккыла деп айтышың керек эле деген экен.
Көрсө, ошол мезгилде эле Зарипа эжеке студенттик аудиторияда эле, гумандуу педагогиканын жолуна түшкөн экен. Класс мугалими авторитардык педагогика менен иштеп жүргөндүгүн айтып кетүүгө болот.
2002-жылы ОшМУнун башталгыч билим берүүнүн педагогикасы жана психологиясы кафедрасында улук окутуучу болуп ишке кабыл алынат. 2010-жылы “Болочок башталгыч класстын мугалимдерин баланы мектепке даярдоого үйрөтүүнүн педагогикалык шарттары” деген темада кандидаттык диссертациясын коргоп, 2014-жылы “Педагогика” адистиги боюнча доценттик наамын алат. 2015-2017-жылдары педагогикалык колледжде бөлүм башчынын милдетин аткарат. З.Абдураимова азыркы учурда индустриалдык-педагогикалык колледжде доцент болуп үзүрлүү эмгектенип келатат.
Жогорудагыдай эмгектерди жараткандыгы үчүн ОГПИнын “Дистанттык билим берүүнүн мыкты окутуучусу — 2002” номинациясына ээ болуп, Диплом жана Ардак грамота менен сыйланат. 2007-жылы ОшМУнун “Мыкты усулчу-2007, 2011-жылы илимий иштердеги жетишилген ийгиликтери үчүн ОшМУнун Диплому, 2012-жылы көп жылдык үзүрлүү эмгеги, ийгиликтери, келечектин жаш муундарын окутуп, тарбиялоодогу жетишкендиктери жана билим берүү тармагына кошкон салымы үчүн, Кыргыз Республикасынын Билим берүү жана илим министринин Ардак Грамотасы менен сыйланган.
2018-жылы Экономика илимдеринин доктору, профессор К.Ш.Токтомаматовдун 70 жылдыгына арналган Эл аралык илимий-практикалык конференцияга катышып, биринчи даражадагы Диплом, К.Ш.Токтомаматов атындагы Эл аралык университетинин “Педагогика” багытындагы 4-курстун студенттерине “Мугалимдин кеби жана анын педагогикалык процесстеги ролу” деген темада конок лекция өткөндүгү үчүн “Ыраазычылык кат” жана Сертификат менен сыйланат.
Зарипа айым жогорку окуу жайларында студенттерге көптөгөн темадагы лекцияларды жасады. Ошону менен бир катар эмгектери жарыяланды. Айта кетсек, он бир усулдук колдонмонун, 1 монографиянын, 2 программанын, 1 күндөлүктүн, 1 тарыхый очерктин, 1 мемуардын жана 15тен ашык илимий макалалардын автору.
Зарипа Самашованын илимий жетекчиси педагогика илимдеринин доктору, профессор Бабаев Дөөлөтбайдын жетекчилиги астында кандидаттык диссертациясын коргогон.
Зарипа Самашовна бир канча Эл аралык уюмдар менен да иштешти. Айта турган болсок, 2003-жылы “Сорос-Кыргызстан” фонду тарабынан каржыланган “Кадам артынан кадам”, 2006-жылы “Сынчыл ойлоону өнүктүрүү боюнча окутуу жана жазуу”, 2010-жылы ЮСАИД тарабынан каржыланган “Сапаттуу билим” долбооруна катышты.
2020-жылы Азия өнүктүрүү банкы каржылаган “Секторду өнүктүрүү программасы: Инклюзивдик өнүгүү үчүн көндүмдөр” жана башка көптөгөн тренингдерге катышып, Сертификаттардын ээси болду.
Зарипа Абдураимова окуу жайдагы педагогикалык ишмердүүлүгү, студенттерге берген билими, көп жылдык окутуучулук бай тажрыйбасы менен өзгөчөлөнүп турат. Мыкты лектор, кыргыз элинин каада-салтын, үрп-адатын, нарк-насилин жакшы билет. Бирге иштешкен эмгек жамааты арасында кадыр- барктуу. Ал эми студенттер арасында жүрүш-турушу, сүйлөгөн сөзү, адамдарга жасаган кичи пейил мамилеси, жөнөкөйлүгү менен жаштарга үлгү көрсөтүп келе жатат.
Окуу жайдын студенттери үчүн окуу китептерди жазды. Бир канча илимий эмгектердин автору. Атасы Самаш Абдураимов жөнүндө “Ак-Булактын алгачкы агартуучусу” аттуу китебин чыгарды. Баарлашуу учурунда каарманыбыз мына буларга токтолду. “Атам Ак-Булак айылынан чыккан алгачкы мугалим эле.
Атамдын сүйлөгөн сөзү, бизге берген тарбиясы мыкты болчу, мугалимдин үй-бүлөсүндө чоңойдум, бала кезимде мен дагы атамдай мугалим болсом деп эңсечүмүн, ал кезде биздин айылда мугалимдер саналуу гана болчу. Атамдын эки сөзү дайыма кулагымда жаңырып турат.
“Ден-соолугуң жакшыбы, тынчылыкпы” деп айтаар эле. Атамдын кесибин улантып, атамдай мугалим болгонума сыймыктанамын, мен билим берген студенттерим жолукканда саламдашып, “Сиз бизди окуткансыз “дешсе, ичимден ыраазы болуп, кубанып каламын. Мугалимдик кесипте эмгектенгениме быйыл 47чи жылдын күзү. Ошто жашап, ОшМуда окуганыма жана иштегениме сыймыктанамын», – дейт Зарипа айым.
Эки уулдун, эки кыздын апасы. 10 неберенин чоң энеси жана тайэнеси.
Б.Ысакова ,КР Журналисттеркошуунунун мүчөсү