Бүгүнкү күндө көпчүлүгүбүз нак чет өлкө валютасын алмаштырууда банктардын же алмашуу бюролорунун кызматынан колдонууга муктажбыз. Ошондуктан гезитибиздин бул санында алмашуу бюролорунда акча алмаштырууда керектөөчүлөр эмнени билиш керек, канткенде алданып калбайсыз деген суроолорго жооп алуу үчүн Кыргыз Республикасынын Улуттук банкынын Ош областтык башкармалыгынын көзөмөл бөлүмүнүн инспектору Зайнидинов Мухаммед Кубанычовичти кепке тарттык.
— Мухаммед Кубанычович, алмашуу бюросу деген эмне? Каалаган эле адам акча алмыштуруучу болуп кете алабы же кандайдыр бир талаптар барбы?
— Алмашуу бюросу – деп Кыргыз Республикасынын Улуттук банкынын лицензиясына ылайык нак чет өлкө валюталары менен алмашуу операцияларын жүргүзүү үчүн юридикалык жак тарабынан түзүлгөн атайын жабдылган пунктту айтабыз. Юридикалык жактардын алмашуу бюросунун нак чет өлкө валютасы менен алмашуу операцияларын жүргүзүүсү Улуттук банктын нак чет өлкө валютасы менен алмашуу операцияларын жүргүзүү укугуна лицензиясын алгандан кийин гана жүзөгө ашырылат. Лицензия беш жылдык мөөнөткө берилет жана ал тийиштүү бюронун ажырагыс бөлүгү болуп саналып, аны үчүнчү тарапка берүүгө болбойт. Нак чет өлкө валюталары менен алмашуу операцияларын жүргүзүү укугуна ээ бир юридикалык жак төрт кошумча алмашуу бюросун ачууга укугу бар.
— Алмашуу бюролору Улуттук банктын лицензиясынын негизинде кандай иштерди жүргүзсө болот жана алардын иштеринде кандай чектөөлөр бар?
— Улуттук банктын лицензиясын алган алмашуу бюросу ушул лицензиянын негизинде жүгүртүү каражаттарынын эсебинен жана өз атынан төмөнкү алмашуу операцияларын жүргүзө алат:
а) нак чет өлкө валютасын накталай улуттук валютага сатып алуу;
б) нак чет өлкө валютасын накталай улуттук валютага сатуу.
Лицензиатка төмөнкүлөр тыюу салынат:
— юридикалык жактардан жана жеке адамдардан мөөнөттүүлүк, төлөөгө жөндөмдүүлүк жана кайтарымдуулук шарттарында акча каражаттарын тартууга;
— акча каражаттарын (чет өлкө же улуттук валютаны) мурда макулдашылган алмашуу курсу боюнча алдын-ала төлөө катары кабыл алууга;
— лицензиаттын менчиги болуп саналбаган, акча каражаттарын сактоого кабыл алууга;
— лицензияда түздөн-түз көрсөтүлбөгөн башка операцияларды жүзөгө ашырууга.
— Айтсаңыз, “Алмашуу бюролорунун” кызматын колдонууда эмнелерге көңүл буруш керек?
— Алмашуу бюролору жайгашкан ордуна көз карандысыз, нак чет өлкө валюталары менен алмашуу операцияларын жүргүзүүдө салык органдарында катталган фискалдык функциялары менен контролдук кассалык машиналарды же фискалдык карта менен жабдылган компьютерлерди колдонууга милдеттүү. Алмашуу бюролору нак чет өлкө валютасын сатып алуу жана сатуу курсу жөнүндөгү маалыматтарды чагылдырган такталар менен жабдылуусу тийиш. Ар бир алмашуу бюросунда төмөнкү маалыматтар кардарларга көрүнөө жерде илинип туруусу шарт:
• — алмашуу бюросун ачкан юридикалык жактын аталышы, аты-жөнү;
• — алмашуу бюросунун лицен- зиясы;
• — алмашуу бюросунун жетекчисинин аты-жөнү, кызматы;
• — алмашуу бюросун ачкан юридикалык жактын алмашуу бюросуна ишке тартылган кызматкерлеринин аты- жөнү;
• — алмашуу бюросунун иш ыргагы;
• — кардарлар үчүн маалыматтар жана аларды тейлөө тартиби.
— Ал эми валюталар курсу тууралуу маалымат такталарга карата кандай талап коюлган?
— Маалымат такталары алмашуу бюросунда чет өлкө валюталарынын бардык түрлөрү боюнча аларды сатуу жана сатып алуу курстары жөнүндө так маалыматтарды камтып турууга тийиш. Маалымат тактасында көрсөтүлбөгөн курс боюнча нак чет өлкө валютасын сатып алуу жана сатууга жол берилбейт. Чет өлкө валюталарын сатып алуу жана сатуу курстары үтүр менен бөлүнгөн бүтүн сандан кийин төрт ондук белгиге чейин белгиленет. Үтүр менен бөлбөй туруп же үтүрдөн кийин төрттөн ашык белги менен көрсөтүү аркылуу валюта курстарын белгилөөгө, ошондой эле кардарларды валюта курстары боюнча адашууга алып келген башка аракеттерге тыюу салынат. Алмашуу бюролору нак чет өлкө валюталарын сатып алууда, сатууда же алмашууда төлөм каражаты статусун жогото элек акча белгилеринин наркына, чыгарылган жылына жараша кайсы бир чектөөлөрдү киргизүүгө жана ар кандай курстарды белгилөөгө укугу жок. Алмашуу бюролору аныктыгына шек туудурбаган чет өлкө валюталарынын банкноттору менен алмашуу операцияларын жүргүзүү учурунда комиссиялык төлөмдөрдү өз алдынча белгилөөгө жана алууга укугу бар, эгерде, алардын төмөнкүдөй кемчиликтери бар болсо:
• — баштапкы өңү өчүп же боёк төгүлүп калган болсо;
• — басып чыгарууда айкын кемчиликтер кетирилген болсо;
• — айрылып, чапталган болсо жана айрылып калган бөлүктөрү бир эле банкнотко таандык болсо;
• — четтери тытылып айрылган, тешилип калгандар (эгерде, алардын орду жабылгандыгы тастыкталбаса);
• — чети күйүп калган болсо.
Алмашуу бюросу кардардын талабы боюнча берилүүчү нак чет өлкө валютасын валюта детектору аркылуу кардардын көз алдында текшерип берүүгө милдеттүү. Кардар чет өлкө валютасын сатып алуу-сатуу учурунда, эсептешүүлөрдүн тууралыгын кассадан алыс кетпей текшерүүсү тийиш. Эгерде, эсептешүүлөрдүн туура эмес экендиги аныкталган шартта, кардар берилген сумманы толугу менен алмашуу бюросунун кассирине кайра эсептөө үчүн берүүсү керек. Ал эми кассир эсептешүүлөр учурунда жаңылыштык кетирсе, жетпеген сумманы толуктап берүүгө жана кардардын көзүнчө бирден кайра санап чыгууга милдеттүү. Акча алмаштыруу менен кардарга кассалык чек жана зарылчылыгына жараша маалымкат-сертификат да кошо берилет.
— Мухаммед Кубанычович, эгерде, алмашуу бюросунда Улуттук банктын лицензиясы жок болсо кандай жоопко тартылат?
— Кыргыз Республикасынын мыйзамдарынын жана Улуттук банктын ченемдик укуктук актыларынын талаптарын бузууга жол бербөө максатында Улуттук банк тарабынан валюта рыногунун катышуучуларынын ишине инспектордук текшерүүлөр үзгүлтүксүз негизде жүргүзүлүп турат.
Алмашуу бюролору Кыргыз Республикасынын мыйзамдарын жана Улуттук банктын ченемдик актыларын сактоого тийиш. Эгерде, алмашуу бюросу Улуттук банктын тиешелүү лицензиясыз иш алып барса, анда Кыргыз Республикасынын бузуулар жөнүндө кодексинин 299 беренесине ылайык, айып пул салууга алып келет. Айып пулдун өлчөмү жеке адамдар үчүн — 175 эсептик көрсөткүч (17 500 сом), юридикалык жактар үчүн — 550 эсептик көрсөткүч (55 000 сом).
2023-жылдын башынан тартып (30.09.2023-ж. карата) республика боюнча Улуттук банктын тиешелүү лицензиясыз нак чет өлкө валюталарын алмаштырууну жүзөгө ашырган жактарга 90 текшерүү жүргүзүлгөн, алардын жыйынтыгы боюнча 84 жеке адамга 17,5 миң сомдон (жалпы сумма 1 470,0 миң сомду түзөт) айыптар салынды.
— Кардарларга акча алмаштыруу боюнча кандай кеңеш—сунуштарыңызды берет элеңиз?
— Мүмкүнчүлүктөн пайдала- нып, кардарларга нак чет өлкө валюталары менен операцияларды жүргүзүүдө тиешелүү Улуттук банктын лицензиялары бар коммерциялык банктардын жана алмашуу бюролорунун кызматтары менен колдонуу керектигин эскертебиз. Ошондой эле, операцияларды жүргүзүүдө (коммерциялык банктан же алмашуу бюродон нак чет өлкө валюталарын сатып алуу) операциянын жүрүшүн тастыктаган тиешелүү документтерди сөзсүз түрдө талап кылуу (кассалык чек, маалымкат-сертификат, квитанция ж.б.) зарылдыгын эсиңиздерге салабыз. Мындан сырткары, белгилей кетүүчү нерсе, бүгүнкү күндө жеке адамдар накталай чет өлкө валютасын алмаштыруу боюнча кулактандырууларды жарыялаган телеграм, ватсапп каналдары аркылуу акча алмаштырууда алданып калышы толук мүмкүн. Эгерде, ортодо кандайдыр бир талаш-тартыш маселе жаралса, аны далилдөө мүмкүн эмес.
Мындан тышкары, телеграм каналдарынын катышуучуларында кылмыштын элементтери болушу мүмкүн, ушуга байланыштуу жабдылбаган пункттарда жеке жактар менен акча алмашуу операцияларын жүргүзүү өтө кооптуу. Анын ичинде мындай жагдайлар жарандардын ден соолугуна жана өмүрүнө коркунуч жаратышы, ошондой эле тоноо же алдап кетүү сыяктуу терс көрүнүштөргө алып келиши мүмкүн. Алдап кетүү, жасалма банкнотторду берип коюу фактылары көбөйүп кеткендигин да белгилеп, Улуттук банк жарандарды алмашуу операцияларын Улуттук банктан лицензия алган атайын жабдылган уюмдардан гана жүргүзүүгө чакырат.
Маектешкен: К.Кыдыралиева