УКМК Кыргызстандагы каралардын анабашы Камчы Көлбаев – Камчы Асанбек менен тыгыз байланышта болгондорду аныктоо иш-чараларынын негизинде, Мамлекеттик бажы кызматынын 50гө жакын кызматкерин кызматтан алынгандыгын билдирди. Ошондой эле УКМКнын маалымат борбору аталган бажычылардын Райымбек Матраимовго да тиешеси бардыгын билдирди.
« «Мыйзамдагы ууру» аталган К.Асанбек менен тыгыз байланыштарды аныктоо боюнча жүргүзүлүп жаткан пландуу иш-чаралардын жүрүшүндө, Каржы министрлигине караштуу Мамлекеттик бажы кызматында ведомстволук буйруктарды бузган айрым кызмат адамдар аныкталды. Такталгандай, тиешелүү иш-чаралардын жүрүшүндө Мамлекеттик бажы кызматынын 50гө жакын кызматкери криминалдык авторитет К.Асанбек жана Мамлекеттик бажы кызматынын төрагасынын мурдагы орун басары Р.Матраимов менен тыгыз байланышта болушкандары аныкталды. Буга байланыштуу аталган кызматтын жогоруда кызматкерлери ээлеген кызматынан бошотулду», – деп айтылат УКМК тараткан маалыматта.
Ошол эле учурда, атайын кызмат мамлекеттик органдардагы жана ведомстволордогу абийирсиз кызматкерлердин ишмердүүлүгүн аныктоо жана бөгөт коюу боюнча иштерин уланып жатышканын, учурда жогорудагы мыйзам бузууларга тиешеси бар башка кызматкерлерди аныктоо иштери жүргүзүлүп жатканын кошумчалаган.
«Каралардын» бардык жерге аралашышы
Бажычылардын массалык түрдө иштен алынышы коомчулукта кызуу талкууга алынып, эки ача пикир пайда болду. Айрымдар криминалга каршы күрөшүү иштери уланып жатканын айтса, айрымдар Райымбек Матраимовдон калган кадрларды «тазалоо» иштери жүрүп жатканын белгилешет.
Азырынча кызматтан алынган бажычылардын аттары атала элек. Бирок, «Кактус Медиа» басылмасы күч түзүмдөрүндөгү булактарына таянып, алардын арасында Камчы Асанбектин бир тууганы Бакыт Асанбек уулу да бар экенин, ал кызматтан алынганга чейин Түндүк-Чыгыш бажысынын башчысынын орун басары болуп иштеп келгенин жазды.
«Айрым маалыматтар боюнча, Бакыт Асанбек уулу бир жумадан ашык убакыт мурун өз каалоосу менен жумуштан кеткен», – деп жазат басылма.
Серепчи Нуркан Патиев журналисттерге берген маегинде, экономикасы көмүскөгө айланып, коррупция күч алган жерде криминал күчөп, «кадрларды» мамлекеттик кызматтарга чейин аралаштырганы буга чейин болуп келген эле процесс экенин айтып, бүгүнкү күндө алардан арылуу иштери болуп жатканын билдирди.
«Кримчөйрө өз «кадрларын» бардык жерге аралаштырат. Ал балким сот система, бажы же башка болсун. Алар бардык жакта бар. Көмүскө экономика өнүккөн жерде криминалдын таасири күчөйт. Ошону сөзсүз түрдө кээ бир саясатчылар шайлоолордо пайдаланып жүрүп, жооп катары буларга кандайдыр схемаларды түзгөнгө жардам берип жүргөн да. Кир чөйрөнүн анабашчыларынын да өздөрүнүн фирмалары бар. Алар бизнестерин калкалашат. Бажы төлөмдөрүсүз өткөрүү үчүн ошол бажычылар калкалап, карап турат. Матраимовдун схемасы да ошондон уланып келди. Бул жерде бир гана кылмыш дүйнөсүнүн күнөөсү деп айтпаш керек. Мында бийлик төбөлдөрдүн да күнөөсү бар», – дейт Н.Патиев.
Бийликтин дагы бир эскертүүсү
Бул арада УКМКнын төрагасы Камчыбек Ташиев Жайыл районундагы УКМКнын жаңыланган имаратынын ачылышына катышып жатып, мамлекеттик органдарды «тазалаш» керек экенин билдирди.
«Кээ бирөөлөр кылмыштуу топторду жок кылганыбызды ностальгия менен эстеп жатышат. «Ушулар жок болуп кетти да», «ушулар ушундай болуп жаза тартып жатат да» деп. Ошолорго болушкандай болуп сүйлөп, ошондой видеолорду чыгарып, аларды колдогондор чыгып жатат. Дагы бир жолу кайталап айтып коеюн, урматтуу кызматкерлер, мындан ары кылмышкерлерди эле эмес, кылмышкерлерди колдогондордун баарын жазалайбыз. Кылмыштуулукту жайылтууну, өнүктүрүүнү каалагандарды дагы биз жазалашыбыз керек. Уюшкан кылмыштуулук түп тамыры менен жок болуш керек. Бүгүнкү күндө мамлекеттик кызматкерлердин арасында «тазалоону» башташыбыз керек», – деди К.Ташиев.
Камчыбек Ташиевдин бул сөзү бардык талкууга чекит койгондой болду. Анткени, буга чейин активисттер Райымбек Матраимовдун кадрлары бажыда дагы деле бар экенин жазып чыгышкан эле. Демек, «каралардан» арылуу операциясынын алкагында, бажы тармагы андан ары да тазаланабы? Ал эми мындан башка мамлекеттик органдардачы? Бул суроолор кезектеги маселе болуп турат.
Н.Мамажунус уулу