Ош облусунун Кара-Кулжа районундагы Кеңеш, Кара-Гуз айыл өкмөттөрүндөгү элдин Ошко каттаган жолу 60 чакырымга кыскарды. Анткени аталган айыл өкмөттөн Ош-Бишкек жолундагы Мырза-Арык айылына кетчү жол (Ылай-Талаа – Мырза-Арык жолу) ачылды. Эми тургундар 22 чакырым жол жүрүп, мурдагы каттамдарына караганда, алтымыш чакырым жолду кыскартышат.
Аталган айыл өкмөттөрдөгү айылдардын жашоочулары Ош шаарына каттоо үчүн Кара-Кулжа жана Өзгөн райондорунун борборлоруна барып, жетчү жерине айланып жүрүп отуруп, дээрлик 120 чакырым басып келишкен. Эми бул жол кыскарып, элеттиктердин түйшүгү жеңилдеди.
Жолдун ачылышына жана анын оңдоп-түздөө иштерине жашоочулар өздөрү демилге көтөрүп, 1,5 млн. сом жыйнаган. Ал эми Жогорку Кеңештин депутаты Эмил Токтошевдин көмөгү менен Өзгөчө кырдаалдар министрлигинин атайын техникалары иштеген.
“Элдин суранычы менен жол сүрүүчү техникалары менен камсыздап бердим. Техникалар 1 жума дегенде жолду тегиздеп, айрым бөлүктөрүнө шагыл жайды. Алдыда автоунаа жолунун 3 жерине көпүрө салуу зарылчылыгы турат.Кантсе да Кара-Кулжа эли алыс жолду жакын кылып ушул жол менен каттайбаштады”, – деди депутат.
Аталган жолдун эл оозундагы эски аты “Кыдыруу жолу” болчу. Ал 1983-жылга чейин Алайкуу, Капчыгай, Чалма, Сары-Булак, Ылай-Талаа айылдарынын элине кызмат кылып келген. Кийин жолду кеңейтүү иштери жүрүп, 1985-жылы асфальт төшөлүп, пайдаланууга берилген. Ошондон бери элет эли ушул жол менен такай каттай баштаган. Бирок 1996-жылы жер көчкү түшүп, жол убактылуу жабылган. Ошол кездеги бийлик төбөлдөрүнүн көңүл сыртында калып, кароосуз калган. 2010-жылдар аралыгында айыл ичинен чыккан жеке ишкерлер жолду бир канча ирет сүрдүрүп, ачып турган. Бирок, бул дагы жетиштүү болгон эмес.
Быйыл Кеңеш – Мырза-Арык жолун кайра ачуу демилгеси кайра көтөрүлүп, Кеңеш айылынын тургундары каражат жыйнай башташкан. Аз убакыттын ичинде бир жарым миллион сом жыйналат. Бул каражат жолдун бузулган жерлерине шагыл төгүүгө, оор техника менен сүрдүрүүгө жумшалган.
Кеңеш айыл өкмөтүнүн жаңы дайындалган башчысы Нурдин Иса уулу жумушка баш-аяк көз салып турган. Анын айтымында, автоунаа жолунун ачылышы убарагерчиликти азайтат.
“Каттам ачылып калса, биринчи кезекте жол боюна май куюу бекеттери ачылат. Мындан кийин дүкөндөр түшүп, салыктан түшүүчү каражаттын суммасы артат. Муну менен айыл өкмөт “дотациядан” чыга алат”, – дейт ал.
Автоунаа жолунун маселеси ушул менен гана бүтпөйт. Узун жолдун ичинде сел көп түшүүчү үч бөлүк бар. Ал жерлерге буга чейин бир канча ирет труба, бетон куюлганы менен селдин катуу агымы аны агызып кетчү. Бул маселени чечүү үчүн жергиликтүү бийликтин дарамети жетпейт. Мындан улам депутат Эмил Токтошевге кайрылышкан. Эл өкүлү маселени жеринде көрүп, бул жолду ондоо иштерин кийинки жылдын бюджетине киргизүүгө убада берди.
“Азыр маселени көрдүк, жеринде тааныштык. Кеңеш айылы аркылуу Мыза- Арык айылына тез жетсе болот экен. Азыр өзүм ошол жол менен келдим бул жака. Жолдун 3 жерине көпүрө салып же бетон куюп бекемдөө зарылчылыгы бар экен. Аны кийинки жылдын бюджетине киргизебиз. Анан ушул жолду асфальттап алсак андан жакшы болот. Кара-Кулжа району боюнча 2023-жылга 7 чакырым жолду асфальттоо планга кирген. Президент Садыр Жапаров 3 чакырым кошуп, жалпы 10 чакырым жол курулуп бүтүп калды”, — деди Токтошев.
Аймак эли бул Ылай-Талаа – Мырза-Арык жолунун стратегиялык мааниси чоң экенин белгилешет. Кара-Кулжа районундагы жашоочулардын айылы башка болгону менен жолу бир. Учурда жол толугу менен № 956 Жол тейлөө мекемесинин балансында турат. Алдыда жол белгилерин орнотуу жумуштары бар.
Нургелди Каныбек уулу