Президентинин Ош облусундагы ыйгарым укуктуу өкүлү Эльчибек Джантаев «Ош жаңырыгы» гезитинин редакциясына келип, жамаат менен жолукту. Анда ал редакция кабылган көйгөйлөр менен жаралган ийгиликтерге күбө болду. Ошондой эле облус жетекчиси гезиттин көйгөйлөрүн чечүүгө жакындан жардам берүүгө убадасын берди.
Эльчибек Нуржадыевичтин редакция жамааты менен болгон жолугушуусу алкагында «Ош жаңырыгы» гезитинин редакциясына экскурсия кылуу үчүн келген мектеп окуучулары менен да кезикти. Облус башчысы жаш жеткинчектер менен баарлашып, өзүнүн кеп-кеңештерин берди. Ал окуучу балдар жана кыздардын журналистикага болгон кызыгуусу, болочок кесипке болгон умтулуусу мыкты көрүнүш экенин белгиледи.
«Ушул тарыхы терең “Ош жаңырыгы” гезитинин иши менен экскурсияга келип түздөн-түз кабардар болуу, өз көзү менен иш процессине байкоо салуу, тажрыйбалуу журналисттер менен таанышуу, баарлашуусу балдар үчүн жемиштүү»,-деп билдирди облус башчысы.
Белгилей кетсек, Ош шаарындагы Инновация жана лидерлик мектеп академиясынын окуучулары, «АИЛ News» медиаклубунун мүчөлөрү “Ош жаңырыгы” редакциясына экскурсияга келишкен. Аларды аталган мектеп академиядагы медиаклубунун башчысы Наталья Секеринанын баштап жүрдү. Окуучулар редакциянын өндүрүш иши менен таанышып, журналисттердин гезитти басмага даярдоого чейинки бардык аткарылган иштери жөнүндө кенен маалымат алышты.
Башкы редактор Асанбек Каракозуев жаш жеткинчектер менен баарлашып, журналистика жана анын мурунку мезгили жана азыркы мезгилдеги жетишкендиктери жөнүндө баян куруп берди.