Ар бир жаран өзүн, үй-бүлө мүчөлөрүн, үй чарбасын «Санарип аймак» маалымат тутумунда каттоодон өткөрүүсү зарыл. Анткени азыркы учурда маалымат кагаздарынын баары «Түндүк» тиркемеси аркылуу жүргүзүлүп жатат. «Санарип аймак» тутумунун жардамы менен тургундар «Түндүк» порталынан муниципалдык кызматтарды ала алышат. «Түндүк» ведомство аралык электрондук өз ара аракеттешүү тиркемеси элге абдан ыңгайлуу: паспорт, айдоочулук күбөлүк, транспорт каражатын каттоо жөнүндө аныктамалар онлайн жеткиликтүү. «Түндүк» тутуму аркылуу санариптик форматтагы документтерди мамлекеттик мекемелерге, жергиликтүү өз алдынча башкаруу органдарына, кызмат адамдарына, юридикалык жана жеке жактарга көрсөтүүгө болот. Бул багытта ар бир жаран өздөрү жашаган муниципалдык аймактык башкармалыктардын имаратында каттоодон өтө алат. Бүгүнкү күндө Санарип аймак маалымат тутумуна каттоо ар бир муниципалдык аймактык башкармалыкта жүргүзүлүп жатат. Аймактарды санариптештирүү жана өнүктүрүү
Жалпыбызга маалым болгондой, өлкөдө үч жыл катары менен санариптештирүү жылы деп жарыяланды. Кыргыз Республикасынын Президенти тарабынан 2020– жылы аймактарды санариптештирүү жана өнүктүрүү жылы деп жарыяланган «Санарип аймак» долбоору жогорку артыкчылыктардын бири болуп саналган. «Санарип Аймак» тутуму «Түндүк» ВЭӨТ менен интеграцияланган. Тутумдун иштеп чыгуучусу болуп Кыргыз республикасынын Мамлекеттик каттоо кызматынын алдындагы «Инфоком» мамлекеттик ишканасы болуп эсептелет.»Инфоком» бир айдын ичинде республиканын түштүгүндө системага кошуу боюнча бир катар иштерди жүргүздү: 180 жергиликтүү өз алдынча башкаруу органдарында орнотулду, 500дөн ашык кызматкер окутулду. Мындан тышкары, «Санарип Кыргызстан 2019-2023- ж.ж» жол картасын ишке ашыруу максатында республиканын айыл өкмөттөрүндө кызмат көрсөтүүлөрдү санариптештирүү иштери жүргүзүлдү. 2020- жылдан тартып жергиликтүү өз алдынча башкаруу органдарынын бардык органдарында «Санарип аймак» системасын этап-этабы менен киргизүү башталган.
Түндүк тиркемесине катталуу керек
«Түндүк» — бул электрондук түрдө мамлекеттик жана муниципалдык кызматтарды көрсөтүүнү камсыз кылуучу маалымат системасы. Сүрөттөгү түшүндүрмөлөр менен «Түндүк» тиркемесине катталып, колдонсо болот. Мамлекеттик порталды жарандар, коомчулук колдонот. Башкача айтканда, бул — электрондук кызматтардын порталы. «Түндүк» системасына мамлекеттик органдардын бардыгы кошулгандан кийин жарандарга да электрондук кызмат көрсөтүү жеңил болуп калат. Эң эле жөнөкөй мисал, элдин баарын түйшүккө салган маалым каттарды алуу жеңилдейт.
Бүгүнкү күндө көптөгөн электрондук кызмат көрсөтүүлөрдү электрондук кызмат көрсөтүүлөрдүн мамлекеттик порталынын жардамы менен алууга болот:
— Кыймылсыз мүлк жөнүндө маалымкат алуу.
— Кыргыз Республикасынын аймагындагы соттолбогондугу жөнүндө маалымкат алуу үчүн арыз берүү (акысыз).
— Никеге туруу жөнүндө маалыматтар.
— Даректик — маалымдама бюросунан маалымат берүү.
— Айыл чарба малынын болушу жөнүндө маалыматтар.
— Пенсиялык топтоолор (топтолмо пенсиялык фонд) жөнүндө маалымат.
— Салык карызынын бар же жок экендигин текшерүү.
— Транспорт каражаты тууралуу маалыматтар (+айып салуулардын бардыгы).
— Транспортко салык төлөө боюнча маалымат.
— Камсыздандырылган адамдын камсыздандыруу төгүмдөрүнүн эсептелиниши жөнүндө маалымат (эмгек акы жөнүндө маалымат).
— «Балага сүйүнчү» жөлөкпулун алууга табыштама берүү.
Система жигердүү өнүгүүдө жана күн сайын өркүндөтүлүп турат. Ага жаңы маалымат базалары жана маалымат системалары киргизилүүдө.
Мамлекеттик портал тарабынан берилген документтер юридикалык күчкө ээ жана Кыргыз Республикасынын Өкмөтүнүн 2019-жылдын 7-октябрындагы № 525 «Электрондук кызмат көрсөтүүлөрдүн мамлекеттик порталын пайдалануунун эрежелерин бекитүү жөнүндө» токтомуна
ылайык (Кыргыз Республикасынын Өкмөтүнүн 2020-жылдын 20-ноябрынын № 573 токтомунун редакциясына ылайык) мамлекеттик органдар жана жергиликтүү өз алдынча башкаруу органдары тарабынан берилген документтерге барабар.
Бирдиктүү идентификациялоо системасы аркылуу мамлекеттик порталга кирүүгө болот
Онлайн форматтагы мамлекеттик кызмат көрсөтүү керек болсо, төмөнкүлөрдү аткарыңыз: portal.tunduk.kg сайтына киресиз; Сайттын башкы бетиндеги «Кирүү» баскычын бассаңыз, ал Бирдиктүү идентификациялоо системасына (БИС) жолдойт.
Калкты тейлөө борборунан (КТБ) берилген идентификациялык жеке номерди (ИЖН) жана 10 орундуу сыр сөздү киргизесиз.
Идентификациялык жеке номер (ИЖН) паспортто көрсөтүлгөн 14 белгиден турат.
Сыр сөз сиз булуттук электрондук кол тамгасын алууда көрсөткөн электрондук почтаңызга келет. Булуттук электрондук кол тамгасын тандайсыз. Көрсөтүлгөн электрондук почтаңызга бир жолку 6 орундуу текшерүү кодун автоматтык түрдө аласыз. Ал кодду кийиресиз. Жеке маалыматтарды иштеп чыгууга макулдук бересиз. Сиз Бирдиктүү идентификациялоо системасы аркылуу Электрондук кызмат көрсөтүүлөр мамлекеттик порталына ийгиликтүү кирген болосуз.
Катталган жери тууралуу маалымкатты онлайн алса болот
Электрондук кызмат көрсөтүүлөр мамлекеттик порталынан жарандын катталган жери тууралуу маалымкатты онлайн режиминде алууга болот. Ал үчүн Мамлекеттик органдарга баруунун кажети жок:
– Электрондук кызмат көрсөтүүлөр мамлекеттик порталына кирүү керек;
– «Маалымкат, көчүрмөлөр» бөлүгүнөн «Жарандардын катталган жери жөнүндө маалымкат» кызматын тандайсыз;
– Кызмат алуу үчүн өтүнмөнү тариздөө керек;
– «Жөнөтүү» баскычын бассаңыз, сиз катталган жериңиз жөнүндө маалымкатты аласыз. Бул маалымкат акысыз.
Ошондой эле «Кызматтар жана сервистер» бөлүгүндөгү жеке кабинеттен сиз алган кызматтар жеткиликтүү. Катталган жери тууралуу маалымкат жарандын катталган дареги боюнча маалымат берет.
Порталга кирип, кызматтарды колдонсо болот
Порталга киргенден кийин кайсы кызматтарды колдонууга болору тууралуу маалымат берилет. Бирок порталга кириш үчүн алгач ар бир жаран идентификациялык карта менен каттоодон өтөт. Катталып жаткан жаран жаңы ID картасынын персоналдык маалыматтарын көрсөтүшү керек. Логин, пароль тергенден кийин гана порталга кире алат. Тутумга кошулгандардын коопсуздугу биринчи орунда. Түндүк порталынын биринчи этабында жарандар кызматтарды сайт аркылуу колдонот. Экинчи этапта порталдын тиркемеси пайда болот. «Түндүк» порталы аркылуу кийинчерээк жарандар коммуналдык кызматтарды да төлөй башташат. Башкалардан артыкчылыгы — айрым адамдарга, мисалы, көп балалуу энелерге коммуналдык кызматты төлөөдө жеңилдиктер каралган.
Тутумга кирүү үчүн төмөнкү документтер талап кылынат:
— Паспорт жана үй-бүлө мүчөлөрүңүздүн өздүгүн тастыктаган документтеринин көчүрмөсү;
— Үйдүн тиешелүү документтери: техникалык паспорт, же кызыл китеби. Эгерде, жашап жаткан үй же батир сиздин жеке менчигиңиз болбосо үй ээсинин макулдугу менен катталса болот.
Ош шаарынын мэриясынын муниципалдык аймактык башкармалыктарынын даректери:
• №1 «Туран» — Королев көчөсү 40 (болжол Хабиб Абдуллаев орто мектеби) ;
• №2 «Сулайман-Тоо» — Ленин көчөсү 294;
• №3 «Керме-Тоо» — Кулатов кичи району (болжол ГОМ-3);
• №4 «Манас-Ата» — И. Раззаков проспектиси (болжол «Семетей» кинотеатры);
• №5 «Амир-Темир» — С.Айни көчөсү (болжол №47 орто мектеби) ;
• №6 «Курманжан-Датка» — Ташкент көчөсү 60 (болжол Карл Маркс атындагы №2 мектеп-гимназиясы) ;
• «Жапалак» айылдык аймактык башкармалыгы — Араван тракты 6-чакырым (болжол Кеңеш айылынын борбору).
Каттоодон кийин акысыз жана ыкчам түрдө уюлдук телефон аркылуу мамлекеттик жана муниципалдык мекемелердин
кызматтары менен пайдалануу жеңилдейт. Тагыраагы мамлекеттик жана муниципалдык кызмат көрсөтүүлөрдө, билим берүү, медициналык, социалдык, финансылык, коммерциялык мекеме-ишканалар сиздерден маалымкат талап кылбайт.
А.МАТИЕВА