Абдувалиева Буаида Абдувалиевна 1953-жылдын 4декабрында Кадамжай районундагы Марказ айылында туулган. 1968-жылы 8 жылдык мектепти Кара-Жыгач айылынан бүтүрөт. Андан кийин Ош шаарындагы У.Салиева атындагы кыздар орто мектебинен билим алып, 1970-жылы аяктайт. Ошол эле жылы Ош мамлекеттик педагогикалык институтунун кыргыз филологиясы факультетине тапшырат. Аны 1974-жылы ийгиликтүү аяктап, кыргыз тили жана адабияты мугалими адистигине ээ болот.
Эмгек жолун Жалал-Абад облусунун Ноокен районундагы “Бирлик” орто мектебинде кыргыз тили жана адабияты мугалими болуп иштөө менен баштаган. 1974-1990-жылдар аралыгында Ноокен районунун, Ош шаарынын мектептеринде мугалимдик кесипте эмгектенип, тажырыйбалуу мугалим болуп такшалды.
1990-1992-жылдары ОшМУнун факультеттер аралык кыргыз тилинин практикалык курсу кафедрасында окутуучу, улук окутуучу, 2006-2010-жылдарда аталган кафедранын доцентинин милдетин аткаруучу, 2007-2010-жылдарда Жалпы билим берүүчү дициплиналар институтунун директорунун окуу иштери боюнча орун басары кызматын аткарды. 2011-13-жылдардын ичинде Ош МУнун медициналык колледжине мамлекеттик тил кафедрасынын башчысы, 2013-жылдын октябрынан бери Ош МУнун финансы юридикалык колледжинин Жалпы билим берүүчү дициплиналарынын тилдер кафедрасынын башчысы, 2021-жылдын октябрь айынан тартып, кыргыз филологиясы жана журналистика факультетинин №1 ФАКТАП кафедрасынын доценти болуп үзүрлүү эмгектенип жатат. КР Жогорку аттестациялык комиссиясынын чечими менен 2011-жылы доценттик окумуштуулук даражасын алган. 2010-жылы “Сынчыл ойломду өстүрүү үчүн окуу жана жазуу” долбоорунун машыктыруучусу, 2011-жылы “Социалдык-психологиялык жагымдуу чөйрө түзүү” долбоорунун машыктыруучусу, 2017-жылы көз карандысыз аккредитациялоо программасынын (ААОПО) эксперти сертификаттарына ээ болот. Үй-бүлөлүү, 3 уул, 1 кыздын энеси, 10 небереси, 1 чеберенин чоң энеси.
Буаида Абдувалиевна билим берүү тармагында 50 жыл эмгектенсе, анын ичинен 33 жылын ОшМУга арнады. Канчалаган студенттерге билим берип, жогорку окуу жайдын уясынан учурду. Азыр алар Кыргызстандын мектептеринде, ЖОЖдордо, жеке ишкердикти өнүктүрүүдө өздөрүнүн салымын кошуп келе жатышат. Буаида эжеке ар дайым өзү билим берген студенттери менен сыймыктанып келет.
Буаида Абдувалиева эжекеге
Турмуштун жолу тайгалак, таштуу ой-чуңкур,
Адамдар түрдүү бул жолдо бизге кезигет.
Кээ бири жөлөйт, багытты туура көрсөтүп,
Кээ бири алдайт, өтүкчөн сууну кечтирет.
Кыйналып жеткен максатың, туудай желбиреп,
Турганда сени кээ бири таптайт далыңдан.
Бузулуп өңү тескери басат кээ бири,
Эки ооз жылуу сөз таппайт, ичи тардыктан.
Сапарлаш болуп, бул жолдо таптың көп жолдош,
Мүнөзү тили ар түрдүү, бирок, дили окшош.
Жаңылсам түзөп, чаалыксам сүрөп келишет,
Жараткан берген насипке болуп ортоктош.
Катарын ушул достордун баштап бараткан,
Маңдайы жарык, көп кырдуу эжем Буаида.
Кайраттуу шайыр, тайманбас мүнөз Кызсайкал,
Чындыкты бетке айтпастан такыр тура албас.
Чалыкпай эже, чарчабай жүзгө чыга бер,
Ооруба эже, оргуштап суудай ага бер.
Чындыктын жолу азаптуу, бирок, ардактуу,
Акыйкат үчүн алоолоп куйүп жана бер.
Ырдын автору: Гүлбадан Матиева
Илимий методикалык эмгектердин автору
Окутулуп жаткан предметке байланыштуу 33 илимий макаланын жана окуу китептеринин, усулдук колдонмолордун, окуу куралдардын автору. Андан сырткары, окутуу өзбек тилинде жүргүзүлгөн мектептердеги 6-8-9-класстар үчүн кыргыз тилиндеги окуу куралдарын иштеп чыккан. Кыргыз тили боюнча тесттик суроолорду, тексттер жыйнагын, хрестоматия, кыргыз тили боюнча текшерүү иштеринин варианттары жана методикалык көрсөтмөлөр, кыргыз тилинин программасы, Улуттук улантуучу тайпалар үчүн, кыргыз тилинин практикалык курсунун программасы, кыргыз тили жана адабияты боюнча тесттик суроолор, орто кесиптик окуу жайлар үчүн окуу куралы басмадан чыгарылды.
Буаида Абдувалиевна билимин жогорулатуу үчүн 2001-жылы СОнун угуучусу, 2004-жылы СОнун мугалими, ОшМУнун окутуучуларынын билимин өркүндөтүү курсунун, СОнун жана “Социалдык-психологиялык жагымдуу чөйрө түзүү” долбоорунун машыктыруучусу, окутуунун жаңы стандарттары, Кыргызстанда жашап жаткан этностордун тилдери менен кыргыз тилинин салыштырма тармагын түзүү, ЖОЖдордо өзүн өзү даярдоо жана баалоонун негизинде отчет даярдоо менен алектенген. Ошондой эле кыргыз тили системасы аркылуу мамлекеттик кыргыз тилин билүү деңгээлин баалоо боюнча атайын сертификаттарды алган. Буаида эжеке билим берүүдөгү көп жылдык эмгеги бааланып, КР мамлекеттик тил боюнча улуттук комиссиясынын, КР Билим берүүнүн Ардак грамоталарынын, Эл агартуунун мыктысы төш белгиси, КР мамлекеттик тил боюнча “Кыргыз тили” төш белгиси, 2010-жылы Ош облустук мамлекеттик тилди өнүктүрүү комиссиясынын, ОшМУнун, Ош шаардык кеңешинин жана КР Министрлер Кабинетинин Ардак грамоталары менен сыйланган.
Эл агартуу майданында 50 жыл эмгектенген Буаида Абдувалиевна 70 жаш кутман курагын белгилеп жатат. Анын көп жылдык эмгеги бааланып, Кыргыз Республикасынын Эмгек сиңирген мугалими наамы өз убагында берилсе жакшы болмок. Бирок, бул да алыс эместир. Ага чейин 70 жаш мааракеңиз кут болсун дейли.
Б.Ысакова