Кыргыз журналистикасында “Ош жаңырыгы” гезитинин ролу зор. Аталган басылманын 1938-жылдын 14-октябрында биринчи номери “Кыргызстан большевиги” деген аталышта жарык көргөн. Ошондон бери маалымат айдыңында эл үчүн кызмат кылып келет. Мезгилден артта калбай, тарыхтагы оор, оош-кыйыштардан таскагында талбай таасирдүү өтүп, журналистикадагы журналисттердин мектебине айланган.
Басылма өзүнүн 85 жылдык тарыхый жолунда көптөгөн таланттуу журналисттерди өстүрүп чыгарган.
Гезиттин бай өмүр жолу менен кыргыз коомчулугунда дасыккан калемгержурналисттер бүт өмүрүн
гезиттин таасирдүү болуп чыгышына арнаганы белгилүү. Гезит 1940-жылы “Ленин жолу” деген ат менен жарык көргөн. Ошондон дээрлик 50 жылдан ашык мезгил Ош облусунда гана эмес, Кыргызстандагы окурмандар арасындагы кадырлуу басылма катары сыйлуу орунда турат. Гезиттин элге маалыматтарды, жаңылыктарды, саясий материалдарды коомчулукка үзгүлтүксүз жеткирүүдөгү ролу 60-70-жылдарда жогорку бийиктикке көтөрүлгөн. Ушул жылдарда басылма жумасына беш жолу жарык көрүп, тиражы 70-80 миң даананы чапчыган.
Ал эми 80-жылдардын баш чендеринде Советтер Союзунун облустук, крайлык гезиттери менен тең-тайлашкан алдыңкы гезит катары СССРдин Эл чарба жетишкендиктеринин көргөзмөсүнүн Ардактуу тактасында Ош облустук “Ленин жолу” гезитинин аталышы илинип турган.
Ушундай бай өндүрүштүк маалыматтык тажрыйбага ээ гезит катары, басылма азыр да өз актуалдуулугун төмөндөтө элек. Азыркы учурда “Ош жаңырыгы” аталышында айына төрт, жумасына бир жолу жарыкка чыгып, окурмандардын колуна жетип турат. Бул басылмада бай эмгектик, журналистикалык, практикалык тажрыйбаларга ээ кесипкөй журналисттер кызмат үстүндө экендигин гезиттин
окумдуулугунан эле сезсе болот. Учурда “Ош жаңырыгы”гезитин жарык көргөнүнө 85 жыл болду. Бул
дата өзүнчө эле бүтүндөй бир тарыхтын жолу. Бул жылдардын элесинде көптөгөн таланттуу журналисттердин баскан изи, эл үчүн арнаган эмгеги калгандыгын жашырууга болбойт. Ошондон улам өткөн тарыхтагы басылманын жолу, азыркы журналисттерге таалим-тарбиялуу жол болот
деп ишеним менен айтууга мүмкүнчүлүгүбүз бар. Эми гезиттин 85 жылдык торколуу тою, анда иштеген журналисттердин салтанатка карата майрамдык маанайына көтөрүңкү көңүл каалоо менен, басылманын алдыдагы ишине ийгиликтерди тилемекчибиз.
А.Султанбаев, КР журналисттер союзунун төрагасы, КР Маданиятына эмгек сиңирген ишмер