Жазуучу жана котормочу, Кыргыз Республикасынын маданиятына эмгек сиңирген ишмер наамынын ээси Абибилла Пазылов эгемендүүлүк мезгилдеги жаңы муундагы жазуучулардын көрүнүктүү өкүлү. Ал 1956-жылы Өзгөн районундагы Шоро-Башат айылында туулган. Мектепте окуп жүргөндө анын туңгуч кабарлары мезгилдүү басма сөзгө жарыяланган жана чыгармалары жамааттык жыйнактарда, журналдарда жарык көргөн. Ал ар кыл китептерди түзүүгө, которууга да катышып келатат.
1970-1974-жылдары А.С.Пушкин атындагы Жалал-Абад педагогикалык окуу жайынан билим алып, А.Осмоновдун ысымы ыйгарылган адабий ийримге жигердүү катышкан. 1974-жылы Кыргыз мамлекеттик университетинин филология факультетинин кыргыз тили жана адабияты бөлүмүнө тапшырып, андан үч жыл билим алгандан кийин, Ленинграддагы мамлекеттик университеттин журналистика факультетине которулган. Аталган университетти 1980-жылы ийгиликтүү аяктаган. Эмгек жолун «Кыргызстан маданияты» гезитинде иштөө менен баштап, көптөгөн адабий сын-макалаларды, рецензияларды жазган. Андан соң «Ала-Тоо» журналында жана башка гезиттерде иштеп, публицистикалык чыгармаларды жараткан. Кыргызстан жазуучулар союзунда жана башка республикалык, облустук коомдук жана мамлекеттик мекеме-уюмдарда эмгектенген. Бир нече жылдар бою Кыргызстан Жазуучулар уюмунун адабий кеңешчиси, жооптуу катчысы болуп иштеген. 1990- жылы драматургия жанрына өтүп, пьесалары сахналаштырылган. Кийинчерээк кыска метраждуу, даректүү фильмдердин сценарийлерин жазган. 2008-жылы Чыңгыз Айтматовдун «Жаабарс» романын которгон. Автордун айрым аңгемелериорус, өзбек тилдерине которулуп, Россиянын интернет сайттарына жарыяланган.
1986-жылдан СССР Журналисттер союзунун, 1988-жылдан СССР Жазуучулар союзунун мүчөсү. Ош облустук «Ош Жаңырыгы», Чүй облустук «Чүй баяны» гезиттеринин башкы редактору, республикалык «Кыргыз туусу» гезитинин башкы редакторунун орун басары, «Кыргызфильм» Улуттук киностудиясынын башкы редактору, КРнын Маданият министрлигине караштуу киноматография боюнча департаменттин директору кызматтарында иштеген. Бир нече китептердин автору: «Замандаш», «Түштүктөн кат», «Газетчик Дзюйо», «Күнөөсүз жылдар», «Менин котормолорум». Ошондой эле театрларда сахналаштырылган пьесалардын сценарийлеринин автору: «Бир мертебе Бишкекте», «Жаабарс» даректүү фильми. Ч.Айтматовдун «Тоолор кулаганда» романын, ж.б. чыгармаларды кыргызчалаган. Эл аралык Айтматов сыйлыгынын ээси, Кыргыз киносунун мыктысы. Абибилла Пазылов ар кайсы жанрда эмгектенсе да алган темасын эстетикалык
жана идеялык жактан терең ачып бергенге уста. Ал адабий сынчылыкты да, журналистиканы да өзүнүн поэзия жана прозаларына айкалыштырып алып барууда. Калемгердин киноматография жаатындагы эмгектери да бараандуу. Чыгармачылыгын поэзиядан баштаган А.Пазылов кыргыз окурмандарына таланттуу котормочу, прозачы жана драматург катары да таанылды. Адабият чөйрөсүндөгүлөр анын көркөм дөөлөттөрүнүн тилдик-стилистикалык өзгөчөлүктөрүн, майда-чоң бейнелеринин элестүүлүгүн, баяндоолорунун ишенимдүүлүгүн жогору баалашат.
Жарык көргөн китептери
Замандаш: Ырлар – Ф.: Мектеп, 1985. – 26 б. Түштүктөн кат – Б.: Учкун, 1999. – 95б. Орус тилинде: Газетчик Дзюо: Аңгеме –Б.: Салам, 2006. – 26 б. Котормолору: И. Бунин: Сан Францисколук мырза: Аңгеме.– Ф.: Мектеп, 1983. – 26 б. Ч. Айтматов: Тоолор кулаганда (Жаабарс): Роман. – Б.:Бийиктик, 2008. – 221 б.
Пьесалары жана кино сценарийлери
Куса (режиссеру З.Аклаева). – ЖКТ, 1996. (Т.Уралиев менен бирге). Бир мертебе Бишкекте (режиссеру Ө.Абдуллаев). – Ош улуттук драма театры, 1997. Жаабарс (режиссеру А.Сарлыкбеков). – «Учур» жаштар театры, 2003. Ата (Кыска метраждуу фильм, режиссеру Б.Карагулов). -«Кыргызфильм», 2007. Айтматов жана көрүүчү: Даректүү фильм: (режиссеру Р.Шершенова). – «Бишкек-фильм», 2008. Боордош: Даректүү фильм (режиссеру Р.Шершенова). – «Кыргызфильм», 2009. Сыйлыктары: Эл аралык Айтматов сыйлыгынын ээси. Республикалык А.Токомбаев атындагы адабий сыйлыктын ээси. Кыргыз Республикасынын маданиятына эмгек сиңирген ишмер.
“Жеткинчекти» жетектөөдө
Азыр Абибилла Пазылов «Жеткинчек» гезитин жетектөөдө. 2023-жылдын 10-февралында “Жеткинчек” (мурдагы “Кыргызстан пионери”) балдар жана өспүрүмдөр гезитинин туңгуч саны чыкканына толук 90 жыл болду. Аталган басылма узак жылдар бою жаш муундарга татыктуу тарбия берүү тармагына өзүнүн салмактуу салымын кошуп келе жатат. Анын редакциясында ар кайсы жылдары улуттук журналистикабыздын жана көркөм адабиятыбыздын көрүнүктүү ишмерлери эмгектенишкен. Гезит кезинде советтик “Ардак белгиси” ордени менен сыйланган.
Басылма эгемендүүлүк доорунда эки жолу аталышын өзгөрткөн. А түгүл ал айрым жылдары каржылык жана уюштуруучулук жагдайлардагы жетишпестиктен
улам чыкпай калып, жоюлуу коркунучуна дагы кабылган. Учурда гезит такай басылып, почта бөлүмдөрү аркылуу республиканын туш тарабындагы жазылуучуларга жетет, күркөөлөрдө да сатылат.