Кыргызстанга, анын ичинен түштүк Кыргызстанга кеңири белгилүү болгон «Ош жаңырыгы» гезити -касиеттүү, омоктуу, мен сыймыктанган карыя гезитим. Алгачкы жолу касиеттүү редакцияга корректорлук штатка алынып, гезит тармагындагы эмгек жолумду баштаганмын. Жыл айланбай ушул эле гезитке кабарчылык кызматка кабыл алынып, мына ошондон бери иштеп келе жатам. Кесибим-ырыс кешигим. Ооба, журналистиканын мектебине айланган «Ош Жаңырыгы»-менин ыйык, кадыры бийик, касиеттүү, куттуу гезитим «Ош Жаңырыгы» көп журналисттердин катарында мени дагы журналисттик тармакты өздөштүрүүмө, инсандык жашоомо демкүч берип, такшалтты. Жазганымды редакцияга ташып жүрүп такшалдым
Кабарчылык кызматта иштеп, сөз менен сүрөт тартууну үйрөндүм. Гезитте иштеп жатып жөн эле амбицияларды колдонуп, жарк этип жанып, жалп этип өчпөй, жашоонун агымы менен кээде өйдө, кээде ылдый болуп, бир үй-бүлөдөй болгон жамаат менен иштеп келе жатканыма сыймыктанам. Шүгүр кылып, омоктуу гезитибизге таазим кылам.
«Ош жаңырыгынын» редакциясына корректор болуп жумушка орношконго чейин коомдогу актуалдуу делген маселелердин айланасында кыскача ой-пикиримди, эксперттердин ойлорун жазып, макала даярдап, «Ош жаңырыгына» жана «Ош шамы» гезитине алып келип жүрдүм. Жазганым жарайбы, жарабайбы деген түпөйүл ой менен келип, гезитке чыкса сүйүнүп, өзүңдү редакцияга керектүү адамдай сезип, жарым-жартылай журналист сезип каласың. Буга чейин мугалимдик кесипте, маданият тармагында анан телерадиокомпанияда журналисттер менен аралашып иштеп келгеним, журналисттик ишимде чоң пайдубал болду. Жумушка кире элегимде, биринчи жолу жазганымды көтөрүп алып башкы редактордун биринчи орун басары, устатыбыз, раматылык Алмаз Нурдиновдун кабинетине киргеним эсимде. Ал киши кайдан келгенимди, кандай жумушта иштээримди сурап отуруп, макаламды заматта эле окуп, кыпкызыл кылып оңдоп, журналисттик тармак жөнүндө азыноолак айтып берди. Ошондогу оңдолгон кагаз бетиндеги кызыл сыялар, айтылган кептер-көрсө, менин гезитте иштеп калуума, чоң өбөлгө, жардам болгон экен. Ошентип журналистиканын сырларын үйрөнө баштадым. Анан «Ош жаңырыгына» Талантбек Моңолбаев редактор болуп келди. Мен болсо макала жазууга кызыгып, макалаларымды башкы редактор Т.Моңолбаевге, биринчи орун басары Алмаз Нурдиновго, орун басары Канымжан Кыдыралиевага окутуп, аны гезитке берип жүрүп бир топ такшалдым десем болот. Менин чыгармачылык менен иштөөмө тажрыйбасы бийик устаттарым-Канымжан Кыдыралиева, маркумдар Талантбек Моңолбаев, Алмаз Нурдиновдун салымдары чоң. Алар мага жазуу журналистикасынын көп сырларын үйрөнүүгө жол ачышты. Ошондой эле редакцияда 40 жылдап иштеген устаттарым-алгачкы жолу Ноокатка командировкага эрчитип барган Бурма Ысакова, туура кеп-кеңешин айткан журналист эжелер Динара Жусупбекова, Айгүл Матиева жана Жусуп Макиев, Маматазим Жуманазаровдордун эмгеги гезит тармагында бийик. Дегеле, редакциянын жамааты, менин бир туугандай кесиптештерим азырга чейин мага руханий дем-күч, кубат берип келишет.
Сандан сапатты тандоону үйрөндүм
Гезит мага макала жазуунун сырларын эле үйрөтпөстөн, жазуу сабатыңа, дүйнө таанымыңдын кеңейишине, турмушка болгон кенен көз карашта болууну да үйрөтөт. Анткени, ар бир макаланы так, даана, сабаттуу жазып, аларды кайра-кайра окуп, оңдоп, үтүр-чекитин коюп отуруп такшаласың, бышасың. Мындай кылбасаң жазганың гезитке чыкпайт. Ошол макаладагы ар бир сүйлөм, сөз, үтүр, чекитке чейин маани берип, жүрөгүңдөн өткөрүп жазбасаң өзүң да тойбойсуң, жазганың да окумсуз болот. Маркум устатыбыз, жазуучу Алмаз Нурдиновдун мындай деп айтканын уктум эле «Гезитке жазуу ишинде эң биринчи сабаттуулук турат. Ошон үчүн билимдүүлүк-жазуудан башталат деп коет. Окурман сенин жазганыңды окуп, сага баа берет, сенин сабаттуулугуң жазганыңдан билинет. Канчалык бай болбо, сулуу болбо, кыйын сүйлөбө, алтындан чапан кийбе, эгер жазганың сабатсыз, катасы көп, мазмунсуз болуп, үтүр-чекитти түшүнбөсөң, сенин кыйындыгың гезиттин алдында бир тыйынга арзыбай калат» — деп. Мына ушул сөз калетсиз экенине ишенем.
Бир жылдай корректор болуп иштегеним — менин андан ары кабарчылык кызматта иштөөмө абдан жардам берди. Мен өзүмдөн ушуну байкадым. Корректорлук иш-кааласаң, каалабасаң гезитке коюлган материалдын бирин калтырбай окуп чыгууга туура келет. Аны жөн эле окуп койбойсуң, катасын издеп окуйсуң, катаны көрбөй калбасам экен, окурмандар көрүп күлбөсө экен деген таризде жүрөкзаада болуп, ой-кыялыңдын баары окуп бүткөнчө гезит бетинде болот. Түшүнбөгөн жерлерин автордон тактап, керектүү жерлерге чалып сураш керек, энциклопедияны карайсың, айтор, корректор болуунун өзү эле машакаттуу иш. Мына ушунун өзү кызматкерди жоопкерчиликке мыктап койчу.
Ошентип отуруп, сандан сапатты тандоону үйрөндүм. Гезит — катасыз жазууну, логикалык туура ойлонууну, изденүүнү, жоопкерчиликти, чыгармачылыкка олуттуу мамилени, талдоону үйрөтүп, акылыңа акыл кошуп, тарбиялайт. Журналистиканын өзөгү-сабаттуу жаза билүү экенин турмуш ырастоодо. Макала жазып жатып, андан сабак алып, акыл чуркатууга үйрөнүп, бышасың. Журналисттик кесип-журналистика факультетин бүтүп коюу эле эмес, сабаттуу болууну, ички дүйнөнүн бай болуусун талап кылган кесип.
Чек ара айылдарына чейин жеттик
Ал эми көп жыл гезит тармагында иштеп келаткан, азыркы кезде «Ош жаңырыгынын» тажрыйбалуу кабарчысы болуп калган Наз- гүл Өмүрзакова менен сапарлаш, катарлаш болуп иштеп келе жатам. Назгүл экөөбүз редакцияда бир бөлмөдө отурабыз. Экөөбүз сумкабызды жонубузга артып алып, алыскы, тоолуу Чоң-Алай, Алай, Кара-Кулжа райондорунун чек-ара айылдарына чейин жетип, карапайым эл менен аралашып, канчалаган макалаларды жазбадык. Алыскы аймактарга барганда кайра кайткыча кеч болуп кетип, айла жок ошол айылда жатып калчубуз. Назгүл ак көңүл, боорукер, ичине кир сактабаган, шайыр мүнөзү менен жаныңа жакшы шерик, ак жолтой сапарлаш боло алат. Машинабыз жок, бирок, экөөбүз эгиз козудай ээрчишип, алыс-жакынга барганда дээрлик жолубуз болбой калчу эмес.
«Ош жаңырыгы» гезити бул – тарых
Артынан айтып жүрөр из калтырган «Ош жаңырыгы» гезити бул-тарых. Ооматтуу гезитибиздин бай тарыхына азыноолак кайрылсак, карыя гезитибиз алгачкы жолу 1938-жылы 14-октябрда «Кыргызстан большевиги» деген ат менен жарык көргөн. Гезиттин алгачкы редактору, маркум Төлөгөн Жумабеков болгон. 1940-жылы, тагыраагы 2 жылдан соң, «Кыргызстан большевиги» гезити «Ленин Жолу» болуп аталышы өзгөртүлгөн. Ал эми 1991-жылы гезиттин аталышы «Ош Жаңырыгы» болуп өзгөргөн. Алгач латын тамгасы менен жарык көрүп келген гезит жумасына 5 жолу чыгып, 1967-жылы гезиттин нускасы 16 миңден ашса, 1988-жылы гезиттин нускасы 75500 гө жетип, Союзга таанылып, жогорку сыйлыктарга татыган экен. «Ош Жаңырыгы» редакциясынын дагы бир жетишкендиги-Союз кезинен бери өзүнүн менчик ишканасында иш жүргүзүп келатат. Илгертен кагаз журналистикасынын ролу, орду бийик болуп келген. Жаза билүү-дүйнөдөгү маанилүү зарылдык болуп эсептелет.
Бардык тармакта катасыз, сабаттуу жазуу маселеси бар. Болбосо, сабатсыз жазуулар коомго сиңип, тил бузулганын көпчүлүгүбүз байкап турабыз. «Ош жаңырыгына» чыккан ар бир материалдын сөзү салмактанып, ар бир сүйлөм күүгө салынып, электен өтүп, анан басууга кетет эмеспи. Мына ошондуктан дагы көптөгөн акын-жазуучулардын окурман журтуна таанылышында, китептерин чыгарып, аны окурман журтунун колдон-колго алып окуусунда гезиттин ролу абдан чоң. Көп жазуучу-акындарыбыз жазгандарын биринчи эле гезитке көтөрүп келишип, гезит бетине чыгарышат. Гезиттин дагы бир баалуулугу ушунда.
Адамзат тарыхында коомду алдыга жетелөөчү баалуулуктар, багыттар, инсандар болуп келген. Коомчулук ошого карап түздөнгөн. Мына ошонун алдыңкы сабындагы «Ош жаңырыгы» маалымат жайылтуучулук, агартуучулук жана идеологиялык вазийпасын так аткарган гезит. Учурда устаттар салып кеткен улуу жолдо «Ош Жаңырыгында» сабаттуу, салмактуу делген агай-эжелер менен иштеп келатам. Азыркы башкы редакторубуз өзүнө көп тажрыйба топтогон журналист Асанбек Каракозуев.
1940-жылдагы «Ленин жолу» гезити күнү бүгүнкүдөй сакталган
Тарых бул-келечекке жол. Ооба, тарыхтын ар бир тамгасын сактаган эски гезиттер азыр да сакталып турат. Кечээ эле «Ленин Жолу» гезиттеринин арасынан 1940-жылы жарык көргөн санын карап чыктым. Эки барактан турган азыркы чыккан гезиттердин 4 барагына туура келген чоң гезит 83 (сексен үч) жылдан ашуун Ош облустук архивинде сакталып турган экен. Жакшы сакталса дагы көп жыл тургудай. Эски гезит көзгө жөнөкөй анан сүрдүү көрүнүп, адамга жылуу маанай тартуулайт. Барактары бир аз гана саргайган гезиттин катасын да таба албайсың. Мына, «Гезит бул-тарых» дегендин далили. Өткөн жылы эле жазылган макала-сүрөттөрүмдү компьютерден таба албай койдум, качан өчкөнү белгисиз, адистер «вирус жеп койгон окшойт» дешет. Сапаттуу флешкага өткөрүп койсоң деле ошол абал. Ошондуктан, электрондук сактоо-гезиттей сакталышына түк ишенбеймин. Гезитти социалдык тармак менен бирдей кароого болбойт деп ойлоймун. Азыркы күндө колу Марс планетасына жеткен өлкөлөрдө да кагаз журналистикасы артка кетпей, гезитке алдыңкы орунда маани берилип жатат. Учурдан пайдаланып, өзүм менен кошо иштеген эмгек жамаатымды, ардагер-журналисттерди, гезитибиздин 85 жылдык мааракеси менен куттуктаймын. Мен сыймыктанган карыя гезитим «Ош жаңырыгына» таазим кылам.
Гүлбара Мамазияева, Кыргызстан журналисттер союзунун мүчөсү