Ушул жылдын 14-ноябрында Ош шаардык кеңешинин кезектеги сессиясында Ош шаардык кеңешинин депутаттары мэр Бакытбек Жетигеновго ишенбөөчүлүк көрсөтүү чечимин кабыл алышты. Жашыруун добуш берүүгө 42 депутат катышып, жыйынтыгында 39у ишенбөөчүлүк көрсөтүү сунушун колдошту. Ал эми үчөө “Каршы” деген добуштарын беришти. Ал эми мэрия өкүлдөрү менен айрым саясий серепчилер депутаттардын бул чечими саясий буйрутманы аткарууга окшоп калды деп баалашууда.
Күтүүсүз чечим
Ош шаарынын мэрин жана анын орун басарларын кызматтан алуу тууралуу сунуштарын Ош шаардык кеңешинин депутаттары 14-ноябрда көтөрүп чыкканы белгилүү болду. Эң кызыгы бул сунушту бардык фракция лидерлери колдоп кетишти. Анын ичинен депутат Эсенбек Арзиев шаардык кеңештин: ооруканалар, бюджетти толтуруу, сейил бактарды иретке келтирүү боюнча бир катар токтомдору аткарылбай калганы үчүн азыркы мэрге чара көрүлүш керек болчу деген пикирин билдирип, алдыда анын кызмат ордун да кароо маселесин көтөрдү.
“Азыркы мэр Жетигеновдун кызмат ордун кароого мен каршы эмесмин. Шаарда болуп жаткан бардык саясий, экономикалык абалдын баарына мэр жооп берет. Биз ушул кишиге ишенип, ошол адамдан отчет алабыз. Эгерде, шаарда ишкерлерге кысым көргөзүлүп, ошол эле учурда бюджеттин толбой калышына жана жалпы эле саламаттыкты сактоо, билим берүү тармактарындагы бардык мүчүлүштүктөр болуп атса, эмне кылыш керек? Ушулардын баарына мэр жооптуу да”, – деди депутат Э.Арзиев.
“Классик” окуясы – мэрди кызматтан алдырабы?
Буга чейин Ош шаарында жеке ишкер, «Классик» мейманканасынын ээси Жаныбек Ажиматов мэриянын кызматкерлеринин үстүнөн УКМК менен шаардык кеңешке арызданганы кабарланган. Ишкер шаар күнүн белгилөөдө мэриянын аткаминерлери бекер сый дасторкон даярдап берүүнү талап кылганына даттанган. Ал мэриянын талабын аткаруудан баш тартканда, шаардагы мекемелердин текшерүүлөрү күчөгөнүн жана мындай текшерүүлөрдөн кутулуу үчүн бекер дасторкон жайганын айтып чыккан. Ал эми мэрия кызматкерлери андай дооматтарды четке кагууда. Ош шаардык кеңешинин депутаты Эсенбек Арзиев Жетигеновго ишенбөөчүлүк көрсөтүү маселеси ушул окуяга да каймана тиешеси болуп калганын кошумчалайт.
“Мэрге ишенбөөчүлүк көрсөтүү сунушунан “Классик” мейманканасындагы окуя да түрткү болду десек жарашат. Себеби, бул терс көрүнүш да. Анткени көрүп атасыңар, Президентибиз ишкерлерди колдоо боюнча кандай иш-чараларды өткөрүп жатат. Биз да ошол багытта кетишибиз керек. Ишкерге кысым көргөзүлбөш керек. Жогоруда айткандай, шаардагы бардык ишке ушул киши жооптуу да”,-деди ал.
Бирок, депутаттар мэрге негизги ишенбөөчүлүк көрсөтүү чечимине шаардык кеңештин 90 пайыз токтомдору аткарылбай жатканын айтышты. Тактап айтканда, шаардык кеңештин депутаттары чыгарган 170 токтомдун 18и, анын ичинен 1 токтомдун 47 пункту аткарылбаганын жүйөө келтиришти.
Бирок, сессияда мунун себептерин түшүндүрүү үчүн мэрдин орун басары Замир Юсупов сөз сураганда ага уруксат берилбей калган. Аны депутаттар “мэриянын өкүлү актанмак”, – дегенди негиз кылышып, сөз берилбегенин айтышты.
Мэрия эмне дейт?
Ал эми Ош шаардык мэриянын маалымат кызматынын жетекчиси Жумамидин Сулайманкулов депутаттардын токтомдору 95 пайыз аткарылганын айтып, 5 пайызыгана ар кандай факторлорго байланыштуу аткарылбай калганын, ага финансылык маселелер, айрым учурда бир катар тоскоолдуктар жаралып, кедергисин тийгизгенин белгилейт.
“Бир мисал: Ош шаарындагы аскердик бөлүк жайгашкан Нурматов көчөсүн ачкыла деп атышат. Бирок ал жер стратегиялык обьект болуп жатат. Аны ачыш үчүн Өкмөттүн атайын чечими, Коргоо министрлигинин уруксаттары керек экен. Ушуга окшош ар кандай факторлор бар. Аткарылбай жатат деген 5 пайыз токтомдордун ичинде 2013-жылдан бери келе жаткандары бар экен. Депутаттардын бат эле чечим чыгарып койгонунда, саясат бар экени байкалып жатат”,-деди Ж.Сулайманкулов.
Саясий баа
Бул иште саясий боек бар экенин айтып, “мэр жакшы эле иштеп аткан”,-деген саясий серепчи Төлөгөн Келдибаев, Жетигеновго ишенбөөчүлүк көрсөткөнгө укуктук жактан баа берилиш керек эле дейт. Ал ишенбөөчүлүк көрсөтүү – узак процесс экенин эске салып, анын кылмышын аныкташ керектигин, тактап айтканда, же ал мамлекетке чыккынчылык кылып же оор кылмыш жасады дегендей негиздүү далилдерди келтириш керектигин кошумчалайт.
“Бул – 100 пайыз саясий буйрутма болуп калды. Күн тартибине коюла турган маселелер алдын ала айтылыш керек дегендей процедуралар бар да. Жетигеновго ишенбөөчүлүк көрсөтүү маселеси качан, ким тарабынан көтөрүлдү, бюллетенди качан даярдай коюшту деген шектүү суроолор пайда болуп жатат. Ишенбөөчүлүк көрсөтүү үчүн мэрдин отчеттору канааттандыраарлык эмес деп табылыш керек жана анын оор кылмыштары далилдениш керек. Мисалы: адам өлтүрүү, зордуктоо, жер сатуу, мекенге чыккынчылык кылуу сыяктуу кылмыштары далилдениш керек да. Ошондо анан ишенбөөчүлүк көрсөтүлөт. Азыр булардыкы курулай доомат, жалган жалаа болуп калды”,-деди Т.Келдибаев.
Кайым айтышуу
Ош шаарынын мэри Бакытбек Жетигенов ага ишенбөөчүлүк көрсөтүү боюнча Ош шаардык кеңешинин чечими тууралуу журналисттерге комментарий берип, депутаттардын “шаардык кеңештин токтомдору аткарылбай жатат” деген дооматын четке кагып, токтомдордун 95% аткарылганын, калган 5% да ал бул кызматка келгенге чейин кабыл алынган токтомдор экенин билдирди.
“Депутаттардын жеке кызыкчылыктары бар. Эки жума мурун шаардык кеңештин төрагасы мени менен жолугам деп кезиккенбиз. Ал “депутаттар шаардын күнү белгиленгенде тамакка чакырган жок, жакшы көңүл бурбайт, чет элдик сапарларга алып чыкпайт деп таарынып атышат” деген. Карасам депутаттар бир эле жолу чет элдик сапарга барбай калышыптыр. Калгандарына бүт эле барышыптыр”, — деди ал.
Бирок буга Ош шаардык кеңешинин төрагасы Салман Назылбеков Жетигеновдун депутаттарга айткан сынына кайра жооп берди.
“Мэр Бакытбек Жетигенов “депутаттардын таарынычы” бар дептир. Мен бул убакка чейин мэр менен жолугуп, эл өкүлдөрү чет өлкөлөргө кызматтык сапарларга чыгышы керектигин айткам. Негизи бир долбоордун артынан бара жатканда Ош шаарына алынып келе жаткан техникалар болобу, башка нерсе болсо деле, эл өкүлдөрү кошобарып таанышып келгени жакшы. Анткени жалпы депутаттарга маалымат берет. Мэр “чай бербегенге нааразы болуп жатышат” дептир. Эч кимдин ачка калган жери жок.Мындан сырткары депутаттар айткан сынга чычалабашы керектигин айтканмын. Бирок ал сындагандарды колундагы ресурстары менен кысымга аларын ачык айтты”, — деди Салман Назылбеков.
Чыңалган мамиленин үзүрү
Мэр менен депутаттардын мамилелерине буга чейин эле жарака кеткени байкалып жаткан. Анткени, мэрди чет жактагы иш-сапарларга депутаттардан ээрчитпейт, ишкерлерге кысым баштады, чыгарылган токтомдор аткарылбай жатат, депутаттар менен мамиле сууду деген сыяктуу сөздөр жалпы коомчулукка болбосо да, тар чөйрөдө айтып жатышкан. Мындай мамилелердин натыйжасы “Классик” мейманканасындагы окуядан кийин жарылып, ачыкка чыгып кеткендей болду. Мэрди кызмат ордуна дайындоонун жана кызмат ордунан бошотуунун тартиби “Жергиликтүү мамлекеттик администрация жана жергиликтүү өз алдынча башкаруу органдары жөнүндө” мыйзамдын 47-беренесинин 9-пунктунда көрсөтүлгөн. Анда кызматтан бошотууга бир катар себептери менен бирге: “шаардык кеңештин депутаттарынын жалпы санынын үчтөн экисинин добуштары менен ишенбестик билдирилген учурда” кызматынан бошотула турганы жазылган. Ош шаардык кеңешинде 45 депутат болсо, анын 39у мэрге ишенбөөчүлүк көрсөтүп, чечимди Президент Садыр Жапаровго жөнөтүштү.
57 жаштагы Бакытбек Жетигенов Ош шаарына 2022-жылдын ноябрь айынын аягында Президенттин буйругу менен мэр болуп дайындалган. Ал Жогорку Кеңештин депутаты болгон, 2021-жылы ноябрда «Бийликти күч менен басып алууга даярдануу» деген айыптын негизинде кармалып, бир айдан кийин бошотулган. Аны жоопко тартууга парламент макулдугун берген эмес.
Асанбек Каракозуев