Айлана-тегерегибизде ар кыл мүнөздөгү, кыялдагы, байлыгы мол да, жетишсиз да, илимдүү, маданияттуу, тескерисинче текебер, бирөөнүн жетишкендигин көрө албаган, ач көз, муштуму менен арам оокат жыйнаган, элге кошулбаган, жалкоо адамдар болот экен. Биз пенделер жакшы инсандарды идеал тутуп, ошолордой таза, эмгекчил, калыс жана намыс-ариеттүү болууга умтулуп жашасак буюрса өнүгүп өсөбүз деп ойлойм. Мындан бир кылым илгери, андан кийин жетимиш жыл бою шериктеш өлкөлөр менен кошо Кыргызстанда да мугалимдин, калктын көзүн ачкан агартуучунун кадыр-баркы азыркыдан кыйла жогору болгон. Окуучулар агартуучуларды кат тааныган, элдин сабатын жойгон прогрессивдүү зыялылар катары көчө-көйдө келатканда жол бошотушуп, озуна салам беришип, кийген кийимине, адептүү баскан-турганына суктанышып агай эжейлердей болгусу келчү. Педагогдор партия менен өкмөттүн саясатын жайылтышып, идеологиясын колдоп кубатташып, жалпы алга илгерилөөлөргө зор үлүшүн кошушканын тарыхтан кантип унуталы замандаш!
Ушундай улук инсандардын катарында маркум, жалпы элдин сый-урматына арзыган азыркы Баткен дубанынын Караван кыштагындагы орто кесипчилик-техникалык окуу жайында үлкөн реформаларды жүргүзүп, мурдакы Союзда, азыркы он беш мамлекеттин окуу жайларынын арасында экинчи орунга чыгарууга бүткүл чыгармачылык өмүрүн, күч-кайратын арнаган Мусаев Нажимидин агай эле. Элеттеги карапайым үй-бүлөдөн чыккан агай жаштайынан илим-билимге абдан умтулуп, өз аракети, тубаса жөндөмдүүлүгү, дайымкы калыстыгы, кристалдай тазалыгы менен эл арасында тааныла баштаган. Ичкилик айылындагы орто мектепти ийгиликтүү аяктап, математика баштаган сабактарды мыкты өздөштүргөндүктөн эмгек жолун 1-май айылдык Советинде эсепчи болуп иштөө менен баштаган. Согуштун жаратынан жаңы гана айыга баштаган, эл чарбасын калыбына келтирүү жумуштары күрдөөлдүү жүрүп жаткан 1950-жылдарда мамлекеттин мүлкүн сактоо, ар бир дыйканга, жумушчуга калыс маяна төлөө, уурулукка, талап-тоноого чек коюуга эсепчи-бухгалтерлер активдүү катышышкан. Ал эми 27 жашында Н. Мусаев Ичкилик айылдык Советинин председателдигине шайланат. Жумуш дагы көбөйүп, жоопкерчилиги артат. Анын мээнеткечтигин, билим деңгээлин, тазалыгын баамдаган партиянын Ноокат райкому 1961-жылдын жазында аппаратка жумушка чакырат. Андан бир аз мезгил өтүп “Кызыл-Кыя” совхозунун партиялык комитетинин секретарлыгына шайланат. Бул ошол кездеги таш көмүрчүлөрдүн шаары Кызыл-Кыядагы миңдеген жумушчулар менен инженер-техник кызматкерлерди жашылча-жемиштер, эт, сүт азыктары менен камсыздаган негизги чарба болгон.
1963-1967-жылдарда Ташкент шаарындагы жогорку партиялык мектептен терең билим алат. Ал мезгилде талап күчтүү эле. Мыкты жогорку билимге ээ болуп, диплом алып келген Нажимидин кайрадан “Кызыл-Кыя” совхозундагы партиялык уюмду жетектөөсүн улантат. Ал жерде үзүрлүү иштеп, чарбаны алдыңкылардын катарына теңеп коюп, анан Тельман атындагы колхоздун башкармасынын орун басары, парткомунун катчылыгына которулат. Ал кайсы жерде гана иштебесин башкаларга өрнөк болуп, өзүнүн бийик деңгээлин, мданияттуулугун тастыктап жүрдү. 1977-жылдын 27-апрелинен тартып анын өмүрүндө чоң бурулуш башталды. Чарбалык, партиялык жумуштан Каравандагы айылдык кесипчилик окуу жайын жетектөөгө которулду. Ага партиянын райондук комитети зор ишеним көрсөткөн болчу.
Жаш муундар, педагогдор менен иштешүү бир жагынан татаал, экинчи жагынан абдан кызыктуу эле. Ал училищедеги жумуш күнүн таң заардан балдардын жатаканасы, ашканасы менен көзмө-көз таанышуудан баштады. Мугалим-мастерлердин абалын иликтеди. Ашканадан эт, нан азыктарын уурдоого бөгөөт койду. Окуучулардын тартибин, тазалыгын, окутуучулардын активдүүлүгүн жогорулатууга жетишти. Мында 19 жыл бою директор катары эмгектенип, мугалимдерди ынтымак — ырашкерликке , тазалыкка, демилгелүүлүккө чакырып, заманбап имараттарды, жатаканаларды, турак үйлөрдү курдуруп, мыкты техникалар менен жабдыктарды алып келип республика гана эмес, Союзга таанылды. Өлкөбүздүн тарыхында мындай окуу жайлардын арасында биринчи болуп КПСС Борбордук Комитетинин, СССР Министрлер Советинин, ВЦСПСтин жана ВЛКСМ Борбордук Комитетинин Өтмө кызыл туусун, СССРдин эл чарбасынын жетишкендиктеринин көргөзмөсүнүн медалдарын, тармактык министрликтин сыйлыктарын жеңип алышты. Союз гүлдөп турган учурда бул окуу жайда 1800гө жакын окуучулар билим алып, 150дөн ашык мугалимдер, мастерлер иштеп турушкан. Окуу жайдын 143 гектарды ээлеген айыл чарбасында ар түрдүү 70 трактор, 30 автомашина, 4 экскаватор менен бир грейдер үзгүлтүксүз иштеп, жаштардын практикалык машыгуулары кызыктуу болгон. Андан сырткары 33 кабинет заманбап 22 кинопроектор, 14 кодоскоп, 9 диапроектор жана башка жабдуулар менен жабдылып келген. Жакшы окуп аякташкан балдардан 250дөн ашыгыраагы тармактык жогорку окуу жайларынан билим алуусун улантышкан.
Деги эле Ноокат районундагы айыл чарба адистеринин 80 пайызы Каравандан канат күүлөп чыгып турушту. Маданият тармагындагы “Келечек”, “Үмүт” аваздык-аспаптык ансамблдери райондо гана эмес республикадагы кароо – фестивалдардын жеңүүчүлөрүнөн болушту.
Училищенин легендарлуу бүтүрүүчүлөрүнүн туу башында Тельман жана Салиева атындагы колхоздордо, “Көк-Жар” совхозунда эмгектенишкен Социалисттик Эмгектин Баатырлары Абдывап Тойгонбаев, Гапар Тешебаев, Келди Турдиев баштаган азаматтар турушкан. Аларга С. Ураимов, Р. Шакиров, А. Каратаев, Н. Жиленко, Э. Тагаев, Н. Рябикина, К. Курбанов, С. Мавропуло баштаган ар түрдүү улуттун өкүлдөрүнөн куралышкан чыныгы педагогдор терең билим беришкен.
Ал эми Нажимидин Мусаевич окуу жайдагы балдардын 80 пайызынын ата-энесин, кайдан келгенин эстеп калуу кудуретине ээ болуу менен турмушунан кыйналгандарга, турак-жайсыз батирде жүрүшкөндөргө колдон келишинче жардам берип, 1984-жылдан тартып мамлекетибизде биринчи болуп окуучуларга күнүнө төрт жолу тамак берүүнү практикалаган. Жаштар училищеге конкурс боюнча өтө башташкан. Ал колунун тазалыгы, окуучуларга болгон мээрими, бардык улуттардын өкүлдөрүнө болгон айкөл мамилеси менен чоң кадыр-баркка ээ болгон. Агайдын эмгеги ошол учурдагы мамлекеттик сыйлыктар: Лениндин 100 жылдыгынын жана “Эмгек ветераны” медалдары, “Ардак белгиси” жана “Октябрь революциясы” ордендери, “СССРдин эл мугалими” наамы менен калыс бааланган. Анын ысымы өзү жетектеген окуу жайына
1995-жылдын август айында, көзү тирүү кезинде эле ыйгарылган. Бул барктуу наам 70 жылдан ашуун жашаган социализмдин доорунда Кыргызстандагы кесиптик орто билим берчү окуу жайларынан эки гана педагогго ыйгарылган экен. Муну азыркы билим жана илим министрлигинин жетекчилери эске ала жүрүшсө оң болор эле.
Муса ава байбичеси Батма апа менен төрт уул, үч кызды татыктуу тарбиялап чоңойтушту. Алардын ичинен эң улуусу Кубатали Ош областтык Кеңешине депутатыкка шайланып, училищени жети жыл бою жетектеди. Ал эми Кудуретали бул окуу жайды өз күчү менен ийгиликтүү аяктап, анан Скрябин атындагы кыргыз айыл чарба институтунун гидромелиорация факультетинен окуп, райондо, областта суугат тармактарында жакшы иштеди. Азыркы учурда ал Кыргыз республикасынын Улуттук суу пайдалануучулар ассоциациясынын директору. Кызы Махабат Кызыл-Кыя шаардык кеңешине депутаттыкка шайлануу менен 2018-жылдан бери атасынын ысымындагы кесиптик лицейди жакшы жетектеп династияны улантып келди. Башка перзенттери да турмуштан орун-очок алышкан. Азыркы учурдагы татаал кырдаалга карабастан окуу жайы республикабыздагы алдыңкылардын катарында турат. Демек Нажимидин агайдын ысымы өчпөй уул-кыздарынын, шакирттеринин деми менен дагы узакка сактала берери шексиз. Мындай аталардын ысымы залкар талант Аалы Токомбаев жазгандай тарых барактарынан өчпөй аздектеле берет.
Адылжан Жажанов. Сүрөттөрдө агай маданият кызматкери Калил Жороев менен жана Жалал-Абадда эс алуу учурларынан элестер