«Көйгөйлөр качан түгөнөт?» деген суроо ар бирибиздин көкүрөгүбүздө жашап, көңүлүбүздү оорутуп келет. «Кайда барба, Мамайдын көрү» демекчи, көп жылдан бери чечилбей келген көйгөйлөр, элдин жашоо-шартынын оордугу муунубузду бошотуп, ойго салат. Дегенибиздей, мындай көйгөйлөрдү чечүүдө чет элдик уюмдардын жардамы ого эле чоң таасирин берип келгенин да жашырбайбыз. Долбоор жазып, аны өткөрүү кандай гана машакаттуу иш экенин башынан өткөргөн адам гана жон териси менен сезет. Мына ошондой кыйынчылыктарга кыйшайбай, көйгөйлөрдү көтөргөн Кыргызстандагы жаңы конуштардын жашоо-шартын жакшыртуу үчүн «Аракет» долбоорунун негизги биринчи фазасы старт алды. Аталган уюмдун уюштуруучулук алдында журналисттер үчүн пресс-тур жүзөгө ашты. Анда жергиликтүү маалымат кызматкерлери көйгөйлөрдү жеринен көрүп, элдин үнүн угуп, күбө болуп келишти. Иш-чаранын алкагында Ош шаарынын чеке жагында жайгашкан Алай-1, Алай-2 калктуу конуштарына барып келишти. Мындагы топтолгон эл төрт көйгөйдү көтөрүп чыгышканын айтышты. Тургундарга 13 жылдан бери курулуп, бүтпөй турган мектепти ишке киргизип берүү, жол салуу, суу чыгаруу жана маршруттук каттамдын санын көбөйтүп берүү көйгөйлөрү менен кайрылышкан.
Дээрлик 25 жылдан бери жашаган тургундар бул көйгөйдү чечүү үчүн кайрылбаган мекемеси, каккылабаган эшиги калбаганын каңырыгы түтөп айтып жатышты. Алай-2 конушунда таза суунун жоктугу кедерди кескен көйгөй болууда. Албетте, суу өмүр булагы демекчи, суусуз жерде жашоону элестетүү кандай оор. Мындагы тургундар жашоо-шартына байланыштуу үйлөрүнө кудук жасап, ага суу сатып алышып, толтуруп турушат. Кээ бирлери андан сырт калып, конушту жарып аккан Араван каналынан суу ташып ичип турушаарын айтышат. Алай-2 конушунун тургуну, беш баланын энеси Орозалиева Айсалкын 17 жылдан бери конушта жашап келгенин айтат.
«Мен жашаган жылдардан бери бул конушка жакшы шарттарды жаратып алалы, биздин балдарыбыздын жакшы шартта жашоосуна ыңгайлуулукту түзүп берели деп чуркап жүрүп 20 жылдын кандай өткөнүн деле билбей калдым. Жолдошум экинчи топтогу майып. Чиедей балдарымды чоңойтом деп, көп нерсеге муктаж болдук. Чыгынып жүрүп, үйүмө кудук каздырып алдым. Ага бир тонна суу батат. Суунун тоннасын 700-800 сомдон сатып алабыз. Ал суу мага 1 жумага жетет. Ошентип, дээрлик бир айдын ичинде төрт тонна суу иштетем, аны да абайлап, үнөмдөп иштетебиз. Бир айда төрт миңдей акча сууга эле кетип калат. Ушул долбоорго катышып, суу чыгартып алууга жапа тырмак киришип, окууларына катышып келдик. Эми жыйынтык болуп, сиздердин жардамыңыздар менен бийлик өкүлдөрүнө үнүбүз жетип, суу чыгартып алсак экен деген тилекте суукка карабай, жааган карды да капарыбызга илбей топтолуп, сиздерди күтүп турганбыз»-деди Айсалкын айым.
Маегибизге аралашкан Гүлипа Аматова да сөзүбүздгө кошулуп, көйгөйдү чучугуна жеткире чырылдап айтып берди. Анын айтымында «водозабор» мындайча айтканда суу топтомо куруучу жайды 2017-жылы эки кишиге сатып жиберишкен.
«Водозабордун» орду казылып, суу чыгарууга даярдала баштаган эле. 2017-жылы эки кишиге сатып жиберишти. Алар үй салып, көчүп келишкен. Ошондон бери «водозабордун» орду жок, ызылдап жүрөбүз. «Водозабордун» үстүрөөк жагында Учар менен чектеш жерде ок арык деп коебуз, мындайча айтканда чек ара бар. Ал жерди да ошерде жашаган адам айланасын тостуруп, үлүш жерим деп алган. Мен билгенден ал менчик жер эмес, ал жер жайыт жерине карайт. Ал кишиге кайрылсак, беш сотых жер ажыратып берем, «водозабор» куруп алгыла деп жатат. Бирок, эл чоочулап жатышат. Менчик жеринен берсе, сууну каалаган күнү токтотуп, каалаган күнү чыгарып, бизди кыйнайт, мамлекеттин жерине эле куралы дешип кыжаалат болушууда. Эми жөнөкөй эле караганда, эки адамдын кызыкчылыгы деп дээрлик 25 жылдан бери суусуз жашап, азабын тартып келатабыз. Ошол эки адамга сатып жиберген бийлик өкүлдөрүнө аябай капабыз, канча адамдын убалын да ойлошподу. Азыр эми, ошол эки адамга башка жактан жер беришип, бизге дал ошол «водозабордун» ордун бошотуп беришсин же суу чыгарууга жер ажыратып, аны мамлекеттин кармагына өткөрүп беришсин деп да жатабыз. Биз аны тастыктай да алабыз. Мен ал жердин таржымалын жакшы билем. Ал жерде кошуна болуп 25 жылдан бери жашап кела- там»,-деди каңырыгы түтөгөн Гүлипа айым.
Белгилей кетсек, Алай-1-2 конуштарында жалпы 650гө жакын түтүн, тогуз миңге чукул калк жашайт. Туран аймактык башкармалыгынын карамагында болуп, үйлөрүнө документтерди дээрлик жасап болушкан. Чындыгында келгенде, жаңы конуш болсо да бир жөн. Жол, суу маселели акырындан беш алты жылда ордуна келмек. 25 жыл деген бул чоң мөөнөт. Ушунча жыл көйгөйлөрдү көтөрүп жашап келген калкты ойлобогон кээ бир чиновниктерге таң каласың.
Бизде тааныш-билиш деген оору күч алып, кимдин таанышы болсо ошонун ити чөп жемей заманда, карапайым калк жашаган тарап каралбай калганы өкүнүчтүү. Шаар четиндеги башка конуштарга алда качан, суу, электр жарыгы сыяктуу коммуналдык кызматтар тартылып болгонун көрүп эле жүрөбүз. Эми Жаратканга үндөрү жеткен конуштун жашоочулары Швейцариянын өнүктүрүү жана кызматташуу агенттиги каржылаган «Аракет» долбоорунун чектеринде жаралган кайсыл көйгөйүнө чекит коюшат аны убакыт көрсөтөөр.
Андан соң пресс турдун жүрүшү Эдельвейс конушуна сапар алды. Бирок, кардын көп жаагандыгына байланыштуу жолдордун тайгактыгы, аба ырайынын сууктугунан улам болжогон жерге жете албадык. Негизинен ал конушта да суу, жол маселелери көйгөй жаратып, ал жактын тургундары да чыркырап жатканынан кабардар болдук. Кийинки жүрүш Манас-Ата кичи районундагы көп кабаттуу жатакана тибиндеги үйлөрдүн жашоочулары менен жолугуштук. Алардын көйгөйүн уксак, көп кабаттуу үйдүн чатырынан суу агып, үйдүн абалы авариялык абалга келип калган. Көп кабаттуу үйлөр курган компанияларга кайрылып, үй курууга уруксат берели дешип, бирок, алардын алдамчылыгынан чоочулап турушканын айтышат.
«Биздин жатакананын жери кенен. Көп компания келишти. Аларга үй курууга бошотуп берели десек, бардык документтериңерди бизге өткөрүп бергиле. Тогузунчу кабаттан ары беребиз деп жатышат. Биз ишенбей жатабыз. Баш калкалаган үйлөрүбүздөн ажырап калуудан сестенип жатабыз»,-дейт Маматемин аба.
Андан да балдар ойноочу аянтчанын жоктугу, канализациялардын чирип кеткени, жылуулуктун жакшы берилбеши да өзүнчө кыйнап келет. Коммуналдык төлөмдөрдү тынымсыз төлөп келишет. Бирок, мындагы калктын ынтымактыгын арттырып, кандай гана көйгөй жаралбасын ортодон акча топтоп жасатып алалы деп далалат кылган аракетинен эч кандай майнап чыкпаганын айтат домком айым Гүлнара Жигитова.
«Бул жатаканада 200дөй жаран жашайт. 73 үй-бүлө, 90дой жаш наристелер бар. Мен домком болуп иштейм. Бул жерде көп жылдан бери жашаган тургундар, ижарада жашаган үй-бүлөлөр баш паанек курушат. Жалгыз бой энелер да басымдуулук кылат. Шарты суусу ичинде, ажаткана да ичинде, баары иштейт. Бул жатаканалар 1977-жылы курулган. Бара-бара көп нерселери жарактан чыгып барууда. Учурда чатырыбыздан суу тамчылап жатат. Мэрияга кайрылып, өздүк салымы 50гө 50 же 70ке 30 пайыз деп каражат ажыраткан программаларына арыз жазып кайрылайын десем, бул жердеги жашоочулардын көбү акча беришпейт. Эң кызыгы дүкөн иштеткен, же колунда бар жашоочулар беришпейт. Канча жылдан бери өзүбүз да топтоп, көйгөйлөрдү чечип алалы, өзүбүз жашайбыз бул жерде, өзүбүзгө пайда десем да угушпайт. Ишенсеңер тажадым, чарчадым. Өкмөттү эле карап отурбай кыймылдайлы десем колдошпойт» — деди Гүлнара Жигитова.
Ар ким өзү үчүн кам көрүп, андан кийин айланасына пайда келтирсе кандай жакшы болмок. Ал жердеги жаш балдарга ойноочу аянтча, жада калса өздөрү жашаган үйдүн чатырын жапа тырмак каражат топтоп жаап алышса, башка үчүн эмес, өздөрү үчүн гана пайда экенин эмнеге капарга илишпейт деген ой кетти. Ал жерде бири-биринин комнаталарын сатып алышып, төрт комнаталуу үйгө айландырып алгандары да бар экенинен кабардар болдук. Негизинен бир комнаталуу баш паанеги жок ижарада жашагандар деле толтура да. Анын алдында үч-төрт кааналуу үйгө айландырып алышкан соң, шарттарды да ошого жараша колдоп, кубаттап, оңдоп-түзөп алууга эмнеге болбосун?
Долбоордун координатору Раиса Киргизова гранттык негизде ажыратылып жаткан каражаттын өздүк салымы шаардык мэрия тарабынан ажыратылып, кайсыл көйгөйгө жумшалаары алдыдагы жылда белгилүү болоорун айтат.
«Биздин долбоор он жылга бекитилди. Долбоордун максаты жаңы конуштардагы тургундардын жашоо шарттарын жакшыртуу жана жашоочулардын аярлуулугун азайтуу болуп саналат. Калктуу конуштардын инфратүзүмүн жакшыртууга багытталган бул долбоордун мониторингинин негизинде сиздер кыдырган аймактар киргизилген. Алардын кайсыл көйгөйүнө каражат ажыратылат аны алдыда макулдашуулардын негизинде чечебиз» — деди Раиса айым.
Макаланы даярдаган Назгүл Өмүрзаковва
#Ош шаары #Эделвейс #Швейцария фонду