КР Президентинин Ош облусундагы ыйгарым укуктуу өкүлчүлүгүнүн жыйындар залында жол коопсуздугу боюнча жыйын болуп өттү. Жыйынга Кыргыз Республикасынын Президентинин Ош облусундагы ыйгарым укуктуу өкүлүнүн орун басары Зарлык Тургунбаев, Ош облустук ички иштер башкармалыгынын Жол кыймылынын коопсуздугун камсыздоо бөлүмүнүн начальнигинин орун басары милициянын подполковниги М.М.Кубатов, Ош облустук ички иштер башкармалыгынын Жол кыймылынын коопсуздугун камсыздоо бөлүмүнүн улук инспектору Ы.Т.Кадыров, Кыргыз Республикасынын транспорт жана коммуникациялар министрлигинин Ош аймактык башкармалыгынын башчысы Б.Жолдошбаев, Түштүк-Батыш бажысынын бажы көзөмөл кызматынын башчысы М.И.Эргешов, Ош чек ара башкармалыгынын башчысынын орун басары М.К.Исмаилов, Өзгөчө кырдаалдар министрлигинин Ош облусу боюнча башкармалыгынын башчысынын убактылуу милдетин аткаруучу З.Э.Эрмаматов, Жол чарба департаментинин № 5 Ош облустук бөлүмүнүн башчысы, “Кыргызавтожол” мамлекеттик ишканасынын Оштогу филиалынын жетекчисинин орун басары У.Н.Садыков, Кара-Суу райондук мамлекеттик салык кызматынын начальниги К.З.Ормонов жана “Айдоочу” коомдук бирикмесинин төрагасы Н.К.Токторов катышышты.
Жыйындын күн тартибинде Кытай Эл Республикасынын, Өзбекстан Республикасынын жана Кыргыз Республикасынын оор жүк ташуучу автоунаалардын айдоочуларына шарт түзүү үчүн “Эркештам” чек ара постуна кезек менен баруу үчүн ошол оор жүк ташуучу автоунаалар боюнча башаламандыкты калыбына келтирүү жана “Ош–Сары-Таш–Эркештам” авто жолундагы оор жүк ташуучу автоунаалардын тыгынынын алдын алуу маселеси жөнүндө кеп козголду.
Аны менен катар Мырза-Аке–Кара-Кулжа–Алайку автожолун кыш мезгилинде кардан өз убагында тазалоо жана көчкү түшүү коркунучу бар аймактарды алдын алуу боюнча тыкыр маселелерди көрүү зарылдыгы ортого салынды.
Кыргыз Республикасынын Президентинин Ош облусундагы ыйгарым укуктуу өкүлүнүн орун басары Зарлык Тургунбаев жол көйгөйүн алдын алууда жоопкерчилик менен кызмат кылууну талап кылды. «Урматтуу жыйындын катышуучулары, өзүңүздөргө белгилүү болгондой, Кытай Эл Республикасынын, Өзбекстан Республикасынын жана Кыргыз Республикасынын оор жүк ташуучу автоунаалардын айдоочуларына шарт түзүү милдетин билесиздер.
Оор жүк ташуучу автоунааларды Эркештам чек ара постуна кезек менен баруу үчүн шарттарды түзүп жардам берүү, уюштуруу иштери тыкыр көзөмөлгө алуу зарылдыгын баса белгилеп айткым келет. Ар бир тармак өз кызматыңыздарга жоопкерчилик менен карап Мырза-Аке–Кара-Кулжа–Алайку автожолун кыш мезгилинде кардан өз убагында тазалоо жана көчкү түшүү коркунучу бар аймактарды алдын алуу керектигин көзөмөлдөп, аны турмушка ашырууда жоопкер экениңерди унутпагыла.
Иштейм деп келгенден кийин өз кызматыбызга аяр мамиле кылып, калктын коопсуздугун ойлоону жон терибиз менен сезишибиз керек. Бул маселеде эч кандай көйгөй жаралбашы керек. Ал үчүн күн-түн иштешиңерди талап кылам»,-деди Зарлык Турганбаев. Андан кийин Ош облустук ички иштер башкармалыгынын Жол кыймылынын коопсуздугун камсыздоо бөлүмүнүн начальнигинин орун басары милициянын подполковниги М.Кубатов Нура жана Сары-Таш айылдарына оор жүк ташуучу автостоянка уюштурууга болбой тургандыгын, себеби, аба ырайы суук болуп, оор жүк ташуучу автоунаалар жүрбөй калаарын белгилеп өттү. Аны менен катар М.Кубатов “Айдоочу” коомдук бирикмесинин жетекчиси Н.Токторовго Каратайдагы автостоянкага киргизүү үчүн канча ЖЧК жана жүк ташуучулар бар ошолордун жетекчилери, айдоочулар менен сүйлөшүп, түшүндүрүү иштерин жүргүзүүнү сунуштады.
Түзүлгөн көйгөйлөрдү талкуулоодо жана аларды чечүү жолдорун иштеп чыгууда катышуучулар «Эркештам» чек ара заставасына оор жүк ташуучу унааларды кезектешип өткөрүү демилгесин бир добуштан колдоого алып, бул тыгынды болтурбай, бул багытта оор жүк ташуучу унаалардын өтүүсүнө шарт түзөрүн билдиришти.
Жыйындын соңунда, “Айдоочу” коомдук бирикмесине тийиштүү иш-кагаздары бүткүчө оор жүк ташуучу автоунааларды токтоочу жайды иштетип туруу керек жана иш-кагаздарын тиешелүү мамлекеттик органдар менен биргеликте тез арада бүтүрүү тапшырмасы ыйгарылды. “Айдоочу” коомдук бирикмесине айдоочуларга түзүлүп жаткан шарттар боюнча түшүндүрүү иштери жүргүзүү күчөтүүлөрү айтылды. Ош облустук ички иштер башкармалыгынын Жол кыймылынын коопсуздугун камсыздоо бөлүмү тарабынан Каратай айылындагы оор жүк ташуучу автоунаалар токтоочу жайга оор жүк ташуучу автоунааларды киргизүүнүн жолдору каралды.
“Айдоочу” коомдук бирикмеси, Ош облустук ички иштер башкармалыгынын Жол кыймылынын коопсуздугун камсыздоо бөлүмү, КР Өзгөчө кырдаалдар министрлигинин Ош облусу боюнча башкармалыгы, Ош чек ара башкармалыгы жана Жол чарба департаментинин № 5 Ош облустук бөлүмү менен чогуу иш алып баруу чечими кабыл алынды.
Ошондой эле, электрондук таблодогу кезектин негизинде жеринде айдоочуларга дозвол берүү Кыргыз Республикасынын транспорт жана коммуникациялар министрлигинин жерде жүрүүчү жана суу транспорту департаментинин Ош аймактык башкармалыгына жүктөө сунушу киргизилди.
Назгүл Өмүрзакова