УКМК тарабынан экономикалык коопсуздукту камсыздоого багытталган ыкчам-издөө иш-чараларынын жүрүшүндө, УКМКнын Чек ара кызматынын кызматкерлери менен биргеликте Талас облусунун аймагында Кыргыз Республикасынын аймагына тиричилик буюмдары деп, милдеттүү салыктык чегерүүлөрдү төлөбөй товардык-материалдык баалуулуктарды мыйзамсыз алып кирүү аракетине бөгөт коюлду.
Атайын кызматтын маалымат борбору кабарлагандай, ушул жылдын 17-январында “Чоң-Капка-унаа жол” көзөмөл-өткөрүү постунан КР жараны К.Шнын башкаруусундагы оор жүк ташуучу “Мерседес Бенц” унаасы кармалган.
«Текшерүүнүн жүрүшүндө унаанын ичинен тиешелүү жүк ташуу документтери жок 200 даана жаңы “Редми” үлгүсүндөгү уюлдук телефондор, 97 даана автоунаалар үчүн газ баллондук аппараттар аныкталган»,-деп айтылат маалыматта.
Учурда бул факты боюнча милдеттүү салыктык төлөмдөрдү боюнча келтирилген зыяндын көлөмүн аныктоого багытталган тергөө-ыкчам иш-чаралары жүргүзүлүүдө.