Бүгүн, 21-март күнү Кыргыз Республикасынын Улуттук курамасы 2026-жылкы Дүйнө Чемпионатынын квалификациялык раунду алкагында Кытайлык Тайбэй менен оюнда кез келет. Бул тууралуу Кыргыз футбол бирлиги кабарлады.
Маалыматка ылайык, аталган квалификациялык оюндары үчүн чүчүкулактын жыйынтыгында 4 командадан турган 9 тайпа түзүлгөн. Кыргыз Республикасынын курамасы Оман, Малайзия жана Кытайлык Тайбэй курамалары менен кошо «D» тайпасында жайгашкан. Эки турдун жыйынтыгы боюнча Улуттук курама үч упай менен тайпанын турнирдик жадыбалында 3-орунду ээледи.
«Үчүнчү турдун алкагында орун ала турган бүгүнкү беттеш Гаосюн шаарынын «Наньцзы» стадионунда өтөт. Оюн Бишкек убактысы боюнча саат 14:00да старт алат»,- деп айтылат маалыматта.
Ал эми, аталган командалардын жооптук беттеши 26-мартта борбор калаабыздын Д.Өмүрзаков стадионунда орун алат.