Кыргызстандын футбол боюнча улуттук курама командасы бүгүн, 21-март күнү Кытайдын Тайбэй курамасына каршы ойноп, эсеп 2:0 эсебинде «Ак шумкардын» пайдасына жыйынтыкталды.
Оюн 2026-жылкы дүйнөлүк чемпионаттын квалификациялык раундунун алкагында болуп, Кыргызстан курамасы өз тобундагы оюндардын үчүнчү турунда Кытайдын Тайбэй курамасына каршы Гоасюн шаарынын «Наньцзы» стадионунда оюнга чыккан.
Оюндун биринчи бөлүгүнүн 24-мүнөтүндө кураманын сол капталдагы коргоочусу Саид Дациев эки сары кагазын алып, оюндан чыгып кетти. Аны менен курама калган бардык мүнөттөрдү бир оюнчуга аз болуп ойноду.
Оюндун экинчи бөлүгүндө Валерий Кичин 11 метрдик айып соккусунан кийин эсепти ачса, каршы чабуулдан Кайл Мерк гол киргизип, эсепти эки эселентти.
Бул жуптун жооптук оюну 26-март күнү Бишкек шаарындагы Д. Өмүрзаков стадионунда Бишкек убактысы боюнча 18:00дө болот.