Кыргызстандын футзал боюнчу улуттук курамасы Азия чемпионатын ийгиликтүү баштап, учурдагы чемпион- Япония курамасын 3:2 эсебинде утту.
Кыргыз футбол биримдиги кабарлагандай, Кыргызстандын футзал боюнча Улуттук курамасынын Бангкок (Таиланд) шаарында өтүп жаткан 2024-жылкы футзал боюнча Азия Кубогунда старт алды. Курамабыздын биринчи беттешин бүгүн, 18-апрелде «Бангкок Арена» стадионунда Жапонияга каршы өттү.
«Жапония курамасы — Азиянын учурдагы чемпиондоруна каршы беттешти эсеп саны -3-2 Кыргызстандын курамасы жеңди. Голдордун авторлору: Самат Джанат уулу (8’), Максат Алимов (20’), Кайрат Кубанычов (29’)»,- деп айтылат маалыматта.
Оюндан кийин Кыргызстан курамасынын башкы машыктыруучу оюн тууралуу өз ойлору менен бөлүштү.
«Жапония — Азия чемпиону. Албетте, өтө оор оюн болду. Бирок, биз пландалгандай эле коргонууга чоң көңүл бурдук. Оюндун биринчи бөлүгүндө колдо болгон бардык мүмкүнчүлүктөрдү ишке ашырууну көздөп жатканбыз ал колубуздан келди.Экинчи бөлүктө өзүбүзгө болгон ишенимибиз артып, дагы эки мүмкүнчүлүктү ийгиликтүү ишке ашырдык.
Кийинки оюн Тажикстанга каршы өтөт. Эми бул кураманын Түштүк Кореяга каршы оюнун көрүп талдайбыз жана эртең оюнчуларды калыпка келтирүүнүн үстүнөн иштейбиз. Келе жаткан оюнга дагы өзгөчө даярдыктарыбыз бар«, —деди Луис Бернат Молина.
Кураманын тайпадагы кийинки беттеши 20-апрель күнү Тажикстанга каршы өтөт.
Улуттук курама Япония, Тажикстан жана Түштүк Корея менен «С» тайпасында жайгашкан.