Ош шаарынын борбордук аянтына жакын жайгашкан 4 кабаттуу үйү бар жер тилкеси мамлекетке кайтарылды. Бул тууралуу УКМКнын маалымат кызматы билдирди.
Маалым болгондой, УКМК тарабынан жеке менчикке мыйзамсыз берилген жер тилкелерин аныктоо боюнча жүргүзүлүп жаткан иштердин алкагында Ош шаарынын борбордук аянтына жакын жайгашкан жер тилкеси мамлекетке кайтарылды.
«Тактап айтканда, А.С. аттуу жаран Ош айыл чарба техникумунун жетекчиси болуп турган учурда жалпы аянты 266 чарчы метр болгон окуу жайдын жер тилкесин менчиктештирип, Ош шаарындагы Мухтар Нургазиев көчөсүнүн (мурдагы Клубная көчөсү) №3 дарегинде 4 кабаттуу 647,28 чарчы метр курулуш тургузгандыгы аныкталды»,- деп айтылат маалыматта.
Текшерүүнүн жыйынтыгы менен менчик ээси жогоруда аталган 4 кабаттуу үйү бар жер тилкесин Ош шаардык мэриясынын балансына өз ыктыяры менен өткөрүп берди.
Белгилей кетсек, аталган мүлктүн наркы 50 миллион 241 миң 145 сомго бааланган.
Учурда УКМК жеке менчикке мыйзамсыз берилген жер тилкелерин аныктоо иштерин улантууда.
Эки жыл мурун иликтөөчү журналист Ыдырыс Исаковдун «Айлыгынан байлыгы көп Аматовдор» деген иликтөө материалында Ош шаарынын «Алай» клубу жана анын ошол кездеги вице-президенти Сейит Аматов тууралуу маалыматтар берилген. Анда Аматов Айыл чарба техникумун башкарып турган жылдары техникумдун жерине үй салып алганы, спорт аянтчасы боло турган жерин Искендер Матраимовдун аялына сатып жибергени айтылган.