Автоунаа айдоого укугу жок окуучуларга унаа айдоого тыюу салынат. Бул тууралуу Ош ШИИБ боюнча Милициянын кайгуул кызматы билдирди.
Маалыматка ылайык, жакында, 25-майда Кыргызстандагы мектептерде акыркы коңгуроо салтанаты өтөт. Буга байланыштуу, Ош шаардык милициянын кайгуул кызмат бөлүмү бүтүрүүчүлөрдүн жолдогу коопсуздугун камсыздоо, жол кырсыктарына кабылууларын алдын алуу максатында ата-энелерге, унааны ижарага берген ишкерлерге кайрылып, аларга унааны бербөө керектигин эскертет. Айдоого укугу жок бүтүрүүчүлөргө автоунаа берүүгө тыюу салынат. Анткени, анын кесепетинен өспүрүмдөр да жаракат алган учурлар болгон. Анын ичинен оор жана өтө оор кесепеттер менен коштолгон фактылар да катталган.
Эскерте кетсек, азыркы эрежелерге ылайык, мас абалында унаа башкарган айдоочу бир жылга унаа башкаруу укугунан ажыратылат.
Айдоого укугу жок айдоочуга 15 миң сом айып пул салынып унаасы айып короого коюлат.