Иллюстрациялык сүрөт
Өзгөн районунун Жылалды айыл өкмөтүнүн мурдагы башчысы, «Кадастр» мамлекеттик мекемесинин экс-директору А.Р.Т УКМКнын Ош шаары жана облусу боюнча башкы башкармалыгынын тергөөчүсүнүн өтүнүчү менен Ош шаардык соту бөгөт коюу чарасын үй камагы түрүнө тандаган. Бул маалыматты Ош облустук сотунун басма сөз кызматы тастыктады.
Маалыматка караганда, Ош шаардык сотунун 2024-жылдын 18-майындагы токтомунун негизинде Кыргыз Республикасынын УКМКнын Ош шаары жана Ош облусу боюнча Башкы башкармалыгынын Тергөө бөлүмүнүн тергөөчүсүнүн өтүнүчү (шектүүгө карата бөгөт коюу чарасынын үй камагын тандоо жөнүндөгү) канааттандырылган.
«Кыргыз Республикасынын КЖКнин 337-беренесинин 3-бөл. менен айыпталган А.Р.Т. карата бөгөт коюу чарасынын “үй камагы” тергөө мөөнөтүнө, тактап айтканда 13-июлга чейин тандалган»,- деп айтылат маалыматта.
Буга чейин УКМК тарабынан 2024-жылдын 17-майында кызмат абалынан кыянаттык менен пайдалануу, тактап айтканда, жер тилкелерин мыйзамсыз берүү фактысы боюнча Жылалды айыл өкмөтүнүн мурдагы жетекчиси, Ош облусунун Өзгөн райондук «Кадастр» мамлекеттик мекемесинин экс-директору А.Р.Т. кармалганы белгилүү болгон.
Аталган жаран Өзгөн районундагы мамлекеттик органдын жетекчиси болуп турган учурда, кылмыш дүйнөсүндө «Казак» каймана аты менен белгилүү болгон уюшкан кылмыштуу топтун мүчөсүнүн тергөө абагына посылкаларды өткөрүп турган.
2023 – жылдын ноябрында КР Министрлер кабинетинин төрагасынын орун басары-УКМК төрагасы, генерал- лейтенант К.К.Ташиев КР Жогорку Кеңешинин трибунасынан «Кадастр» мекемесинин Өзгөн райондук филиалынын жогорудагы экс-директору А.Р.Т.нын «Казак» каймана аттуу уюшкан кылмыштуу топтун мүчөсү менен байланышы бар экендигин маалымдаган.
«Учурда бул кылмышка тиешеси бар башка кызмат адамдарын аныктоо жана кармоо боюнча тергөө амалдары жана ыкчам издөө иш-чаралары жүргүзүлүүдө»,- деп айтылган атайын кызмат таркаткан маалыматта.