Ош облусунун Кара-Суу районуна караштуу Ынтымак айыл өкмөтүнүн (мурдагы Жаңы-Арык айыл өкмөтү) башчысы Нурбек Раимов кармалды. Бул тууралуу өздүк булактар кабарлады.
Алдын ала маалыматка караганда, ал аталган айыл өкмөттөгү жерлердин сатылышы боюнча кармалган.
Ош облустук сотунун басма сөз кызматы билдиргендей, Ош шаардык сотунун 2024-жылдын 18-июлундагы токтомунун негизинде УКМКнын Ош шаары жана Ош облусу боюнча башкы башкармалыгынын тергөөчүсүнүн өтүнүчү канааттандырылган.
“Кыргыз Республикасынын КЖКнын 337-беренесинин 3-бөлүгү (этиятсыздыктан оор залал келтирүү менен кызмат абалынан кыянаттык менен пайдалануу) менен шектүү Р.Н.С. карата бөгөт коюу чарасынын камак түрү 2024-жылдын 16-сентябрына чейин тандалган”,- деп айтылат маалыматта.
19-июль күнү УКМКнын төрагасы Камчыбек Ташиев селдин кесепеттерин жоюу боюнча жыйында Кара-Суу районунун Жаңы-Арык айыл өкмөтүндө 1000 чек 50 миң сомдон 300 миң сомго чейин сатылганын, тиешелүү кызматкерлер жазасын алышы керектигин, акимдин тиешеси болсо ал да камалышы керектигин айткан.