Өзгөн шаарын айланып өтүүчү жол Мамлекеттик жана жеке өнөктөштүк программасынын негизинде курулуп жатат. Учурда курулуш иштеринин буюртмачысы «Тез Жол» ЖЧКсы болуп саналат.
Аталган ЖЧКнын техникалык директору Ибрагим Өсөровдун айтымында, Бишкек — Ош унаа жолунда, анын ичинде Өзгөн шаары аркылуу өтүүчү участокто жол тыгынын азайтуу максатында курулуп жаткан жолдун узундугу 14 чакырымды түзөт.
«Жол эки тараптуу 4 катар болот. Анда Кара дарыянын үстүнөн өткөн 200 метрлик көпүрө жана Жазы дарыясынын үстүнөн 97 метрлик көпүрө курулууда. Жолдун 8 кечилишине туннель аркылуу өтүүчү жол курулуп, мындан сырткары мал жандыктар өтүүчү эки өтмөк да курулуп жатат. Светофор коюлбайт. Азыркы учурда 300 жумушчу жана 112 техника иштеп жатат. Курулуш иштерин толук түрдө ноябрдын аягында бүтүрүү пландалган»,- деди ал.