Кечээ, 19-сентябрь күнү Министрлер кабинетинин төрагасынын орун басары — УКМКнын төрагасы Камчыбек Ташиев Оштогу өзү окуган В. Терешкова мектеп-интернаты үчүн курулуп жаткан 700 орундуу оку корпусу жана 500 орундуу жатаканасынын курулуш иштери менен таанышты. Бул тууралуу «Турмуш» басылмасы жазды.
Маалым болгондой, учурда эки объектинин курулуш иштери 60 пайызга бүткөн.
«Эгерде курулуш сапатсыз болуп калса, өзүңөр кыйналасыңар. Мен текшерүүчүлөрдү жөнөтүп, ар бир нерсесин текшертем жана ошого карап силердин жумушуңарга баа берилет»,- деген Ташиев.
Үч кабаттуу мектепти 2025-жылдын май айына бүткөрүү пландалган. Билим уясы өзүнчө спорт залы, спорт аянтчалары жана башка керектүү жайлары менен курулууда. Учурда объектиде ички жасалгалоо, жылуулук курун тартуу жумуштары жүрүп жатат. Мектеп 324 млн сомго бааланган. Ал эми 500 орундуу жатакана 4 кабаттан турат.