Бүгүн, 9-октябрда Президенттин Ош облусундагы ыйгарым укуктуу өкүлүнүн биринчи орун басары Курбанбек Айтибаевдин жетекчилиги астында облусда айыл чарба кластерлерин өнүктүрүү жана жаңы соода логистикалык борборлорду куруу жаатында атайын жыйын болуп өттү. Мындай маалыматты Президенттин Ош облусундагы ыйгарым укуктуу өкүлчүлүгүнүн басма сөз кызматы билдирди.
Маалым болгондой, жыйынга Кара-Суу, Араван, Өзгөн, Hooкат райондорунун мамлекеттик администрация башчыларынын биринчи орун басарлары, ал эми онлайн форматта алыскы Чоң- Алай, Алай жана Кара-Кулжа райондору, ошондой эле Агробизнестин атаандаштыкка жөндөмдүүлүгүн жогорулатуу борборунун аймактык жетекчиси О.А. Эсеналиев катышты.
«Жыйындын жүрүшүндө О.А.Эсеналиев Ош облусунун жана Ош шаарынын региондук экономикалык өнүгүүсү боюнча кенен маалымат берип, кошумча нарк чынжырчасына токтолуп, бир катар сунуш-пикирлерин айтты»,- деп айтылат маалыматта.
Жыйындын соңунда жалпы катышуучулар тарабынан суроо-жооптор болуп, долбоорду мындан ары өнүктүрүү үчүн жакындан байланышта иштөө макулдашылды.