Кара-Сууда мал уурдоого шектелген 31 жаштагы жаран кармалды. Бул тууралуу Ош ОИИБдин басма сөз кызматы билдирди.
Маалыматка караганда, 2024-жылдын 20-октябрь күнү Кара-Суу райондук ички иштер бөлүмүнө Мады айыл аймагынын 1990-жылы туулган М. уулу Б. аттуу тургуну арыз менен кайрылган. Анда 2024-жылдын 20-октябрь күнү короосунда байланып турган 1 баш малын белгисиз адамдар уурдап кеткендигин билдирген.
«Бул факты каттоого алынып, окуя болгон жерге тергөө-ыкчам тобу чыгып, тергөөгө чейинки текшерүү иштери башталган.Чогултулган материалдын негизинде Кылмыш-жаза кодексинин 205-1-беренеси (Мал уурдоо) боюнча кылмыш иши козголуп, ыкчам тергөө амалдары башталган. Жүргүзүлгөн ыкчам-издөө иш-чаралардын натыйжасында кылмыштын изи сууй электе шектүү катары Кара-Суу районунун 1993-жылы туулган К.уулу К. аттуу тургун кармалып, камакка алынды»,- деп айтылат маалыматта.
Учурда Кара-Суу райондук ички иштер бөлүмүнүн Кылмыш иликтөө бөлүмүнүн кызматкерлери тарабынан шектүүнүн башка кылмыштарга тиешеси бардыгын аныктоо боюнча ыкчам-издөө иш-чаралары жүрүп жатат.