![« "Ош жаңырыгы" баскан жол » аттуу китеп жарыкка чыкты « "Ош жаңырыгы" баскан жол » аттуу китеп жарыкка чыкты](https://oj.kg/wp-content/uploads/2023/11/7754c829-18b5-4693-9894-bfb9a3d9d063.jpg)
Тээ Союз кезинде таң эртең почтольон колубузга гезиттин жаңы санын берип кетээр эле. Жаңылыкты колго тийген гезиттен окуп чыкчубуз. Анан кимдер чыкты экен, кайсы чабан кимден озуп кетти, кайсы райондо биринчи пахта ачылды, кайсы колхоз эт, сүт, жүгөрү, тамекинин планын аткарганын окучубуз. Ошондой эле кайсы башкарма, кайсы жетекчи сынга кабылды, кайсы мектепте билимдүүлөр жакшы көрсөткүч жаратып, Артек лагерине жөнөтүлдү деген макалаларды гезиттен окучубуз. Окурман, ийгилик сыры бул жакта турбайбы деген жакшылыкты издеп, кемчиликсиз иштөө керек деген түшүнүктөрдү кабыл алган кезде өсүп чоңойдук. Ошондой мезгилди көрүп-билгендер азыр да гезиттин жаңы санын окууга шашат.
Гезит — тарых деп бекеринен айтылбаган чыгаар. 85 жылдан бери Ош облустук “Ош жаңырыгы” гезити үзгүлтүксүз чыгып келет. Колхоздоштуруу жылдары өттү, ал эми Ата-Мекендик согуштун каардуу жылдары жалаң кары-картаңдар, аялдар калып, алар эркектердин ордуна оор жумуштарды жасап, чарбадагы иштерди аткарышкан. Орок оруп, машак терсе, завод, фабрикада иштегендер “Бардыгы жеңиш үчүн” деген ураан менен иштешкен. Стахановчулар деген эмгектин алдыңкылары чыгышкан. Башкача айтканда, өнөр жайы, айыл-чарбасын, экономиканы көтөрүүгө зор эмгектерин жасашкан. Мына ушул айтылгандын баары жөнүндө гезит бетине макала даярдап чыгарып, демине-дем кошуп тургандар журналисттер болгон. Гезит бетине жазылган макалалар архивде сакталып, бүгүнкү күнгө чейин жетти. Мындан ары да, кийинки муунга да жетет деген ишеним чоң.
Баса, тарыхый инсандардын эмгектери, акын-жазуучулардын чыгармалары, кыргызга таандык үрп-адат салттары, улуу манасчылардын айткандары, оозеки канчалаган эпос, жомокторду баарын гезитке жарыялап, бүгүнкү күнгө чейин жетишине калемгерлер себепчи. Басма сөз тармагында бардык жазма иштеринин башталышына чоң салым кошкон жана анын тарых болуп калышына “Ош жаңырыгы” кызматкерлеринин эмгеги чоң. Ушундай эмгекти “Ош жаңырыгынын” 85 жылдык мааракесине карата “Ош жаңырыгы баскан жол” аттуу китеп жарыкка чыкты. Китепти кабарчылар Динара Жусупбекова, Маматазим Жуманазаров түзүшкөн. Анда гезитте иштеген калемгерлердин макалалары жарыяланды. Чоң мааракенин алдында, башкача айтканда, 85 жыл ичинде иштеген гезиттин редакторлору, кабарчылары жөнүндө жазылган макалалар топтому кирди. Алардын эмгеги, гезитке болгон жоопкерчилиги, бүтүндөй түштүктө эмгегин элге арнаган инсандардын иштерине басым жасалган. 1938-жылы 14-октябрда негизделип, “Кыргызстан большевиги” деген ат менен алгачкы облустук гезит латын ариби менен 3000 нускада басылып чыгарылган. 1940-жылы аты өзгөрүлүп “Ленин жолу” деп чыга баштаган. Ал кезде гезиттин кел-кели келип турган кези болчу. Бир жумада беш жолу А-3 форматта чыгып турган. Нускасы 80 миңден ашкан. Жогорку сыйлыктарды алууга жетишкен. 15 Союздук Республикалардын. Облустук гезиттердин ичинде 2-орунда турган. Буга далил Бүткүл Союздук Эл чарба жетишкендиктеринин көргөзмөсүнүн (ВДНХ) коло медалын алып, көргөзмөгө коюлган. Республикалык, облустук сыйлыктарынын ээси болгон. Гезитте Кыргыз Республикасынын Баатыры акын С. Жусуев. акын-жазуучулардан Ж.Мамытов, К.Жунусов. Ш.Абдыраманов, И.Сулайманов, К.Ташбаев, Т.Мияшев, Т.Сулаймановдор эмгектенишкен.
Калеми курч, макаласы мурч мыкты калемгер кабарчылар, иштешкен. Ал эми 1991-жылдын октябрь айынан бери “Ош жанырыгы” деген ат менен чыгууда. Коомдогу ар кандай өзгөрүүлөргө оош-кыйыш замандарга туш болуп, экономикалык оор кыйынчылыктарды баштан кечирип жаткан учурда да улуу көчтүн учугун улап, колдон калемин түшүрбөй заман талабына жараша макалаларды жазып, турмуштун күрөө тамырын кармап, окурмандын табитин тартып, кызыктуу макалаларды жазып, гезиттин нускасын көбөйтүүгө өз салымын кошкон журналисттердин бараандууу эмгектери аталган китептен орун тапты. Гезитте иштеп кеткен редакторлордун ар биринин өзгөчө салымы,эмгектери баса белгиленди. Эмгек ардагерлеринин сүрөттөрү коштолгон.
Көп жылдык тажрыйбалуу иштери китепте кеңири айтылды. Ошентип, “Ош жаңырыгы баскан жол” аттуу китебинен окуп, көп маалымат ала аласыздар.
Динара Орозалиева