Жарык жерде үч жыл жалгыз түтүн болуп жашаган атамдарды, атамдын Бодубай деген абасы тууганын ээн талаага, атасынын олутуна жалгыз таштап койду. Намысы жок экен туугандарынын деген сөз эл арасына тарайт-деп, жардамын аябай азыркы олутуна там-таш тургузуп көчүрүп келген экен. Бодубай абабыз колхоздо кой чарбачылыгы боюнча ферма болгон дешет. Ат бастырып, колхоз активдерине аралашып калган эле дешчү. Апам ал кайнагасы жөнүндө көп айта турган. Атам экөөнүн турмуш куруп калганына да чоң себепчи болгон көрүнөт. Колхоздо көрүнүктүүнан табаар, мал табаар кызматты аркалагандыктан Бодубай абанын эл арасында кадыры бийик, сөзү өтүмдүү болгондугун кечээ биз эс тартканга чейин эле баян этип айтып калышчу. Көрсө Бодубай абанын өзү менен кошо жүргөн үзөңгүлөштөрүнүн арасында сөзү соболдуу, орду байымдуу болгон тура. Орто билимге ээ болуп-болбой эле, кат сабаты жоюлганда эле чарба жумушуна аралашкан экен. Ошондон эл арасында кадыр насили көтөрүлө, айткан сөзүнүн эки болбостугуна көпчүлүк арасында ишеним көтөрүлгөнүн кийин деле айтып жүрүшчү.
Апам тун уулу Сулайманды көп жакшы көрөт эле деп калчу. Жайында колхоз жумушунда жүргөндө миңген атынын ээр кашына өңөрүп алып, колхоз активи катары машакчылардын жумушуна көзөмөл жүргүзчү бейм. Ошонусуна ыраазы болгонун ар качандан бир качан, сөз учугун үзбөй кеп салганын далай уктум. Көзгө көрүнгөн жашоонун учугун улаган, бир туугандардын караан кылып, медер кылган туткасы сыяктуу Бодубай абабыз булаш уруусунун, анан бери алганда Олбектин, Ормондон тарагандардын пешенесинде, алардын сүрү катары эли журтта карманганын көпчүлүк ошол учурда таанып билгендердин майсамдуу кептерин көп жолу кулагыбыз чалып калчу.
Согуштан кийинки жылдары турмуш зардабы тез эле жаңыча кейптене баштайт. Эл мурдагыдай кокту-колоттордогу жашоо калптарынан өгөйлөнө, ортолук коллективдүу жашоого ылдам багыттала шаан-шөкөттүү жасалгаланган жамалдуу турмуш образдарына, сүймөнчүк коомдук тартипте ыңгайлаша баштагандарын өздөрү сезбесе да, сырттан карагандарга бир топ эле баамдалган сый түшөт.
Ошол 40-жылдардын аягы, 50-жылдардын башындагы колхоздоштуруудан жаралган Сары-Булак өрөөнү, Тээ Ажике жайлоосунан, Кара-Токтунун белинен, бул жагы Кызыл-Булак, бери келгенде Кылоожундан кокту-колоттон түшкөн майда суулардан куралган “Кызыл-Сууну” бойлой отурукташкан эл өзүнчө эле чоң элдүү өрөөнгө айланганы азыр даана турбайбы. Эл өз азарындагы кайгы-муңдан өтө алыстай электе, эми мынтип кызыл өкмөттүн талабы менен зер-зебесинде ата-бабалары жашаган олуттарынан самсаалап өрөөндөгү түзөңдөй жайгашкандарына да бир топ өгөйлөп жүргөнсүшөт. Кийин анын баары жыл өткөн сайын унутта кала берет тура.
Болбосо, кечээ биз эс тартканга чейин Итибайдын кыштоосу, Бодубайдын кыштоосу, Дыйканбайдын кыштоосу деген аталыштар унутулуп бараткансыйт. Көрсө булардын баары менен тагдырлаштардын бири да калбаптыр. Адам турмушунда, жашоосунда бул жарыкчылыкта ар пенде эртеби, кечпи элесин энчилештерине калтыра саамдуу ааламдан кете берет экен да. Мунун баары муундун тагдыры менен байланышта мыйзамдашат белем. Ошондон эл арасында “бүгүн көргөнүң, эртең жок”- деген армандуу тариз, каңылжаарды какшаткан муңда айтылган чыгаар. Пенде жашоосунун артыкчылыгы ушунда белем. Адам турмуш мыйзамына баш паанек арткан, эс-акылдуу макулук. Аны өзү деле танбайт. Байкаган тариздери биз деле өз жашообуздан баамдап келе аткансыйбыз.
Чоң өрөөнгө олтурукташкан ата-бабаларыбыздын жашоосу тездик менен өзгөрө баштады. Кокту-колоттон түшкөндө курган жепирейген шыйпаңы ылай, камыш менен томолоктонгон үйлөрдү оңдоого киришти. Бул өткөн кылымдын 60-жылдары эле. Айылда чоң мектептер, колхоздун кеңсеси, сельсоветтин кеңсеси, эл керектөөчү буюмдарады сатуучу дүкөндөр пайда болду. Айыл ортосунан жарып өткөн чубалжыган чоң жолдо ат арабалардын кыймылы көбөйдү. Мунун баарына биз курактуулар тегиз күбө.
Эл катары биздин үйдүн да турмушу жакшы жолуна түшкөнсүп калган. Канткен менен жаш кезде кайдан аңдап баалай аласың. Негизгиси нан-аш мол тартып, элдин турмушуна шартташ курсактары да тойгонсуп калган. Ошол жылдарда биздин аталарыбыз бозону абдан баалап ичише турган. Айылда түтүн калтырбай бозо салышчу. Жазында үйүнүн алдындагы жерлерине тегиз мака эгишчү. Ошону кастарлап, чаап-суугарып түшүмүн бозо салганга камдашчу. Анан айылда суу тегирмендер боло турган. Биз аларды көрүп, билип калдык. Коңку, Орунбай, Омош деген тегирменчилер өрөөндөгү сыйлуу кишилерден эле. Алардын тегирмендери жыл бою тынбай иштеп турчу. Өрөөндүн баш аягынан буудай, мака, арпа, артынгандардын кезеги тегирменден үзулчү эмес.
Муну биз кийин эс тартканда баамдап жүрбөйбүзбү. Айылдагылар кыш келгенде чарбанын жумуштарынан, ар кандай курулуш иштеринен колдору сээлдей калганда үймө-үй кыдырып бозо той кыдырмайларды уюштуруп алып көңүл ачышчу тура. Ал күндөр элдир-селдир биздин деле эсибизде калды көрүнөт. Эртеден айылдын этегиндеги үйлөрдөн бозо ичкенди башташкан жоон топ атам Осоке теңдүүлөр жөөсү жөөдөй, улоолуусу улоолуудай шарактап айылдан башынан аягына чейин бозо татмайды күн сайын адатка айландырып алышканы күну бүгүнкүдөй эсте. Бүл да, ошол мезгилдеги эл турмушунун жашоо образы окшойт.
Мезгил баарын ордуна коет демекчи, ошол согуштан кийинки кайгы-капа, жокчулук, оокат, кийим-кече, тартыштыктары артта калгансыган көпчүлүк шарданында куунак жашоо сүрөмөсү өкүм сүргөнүнө элдин маанайы көтөрүңкү эле. Айылда колунан келгени там-ташын оңдоого киришкен эле. Атам кечки мектепке орто билим алганга барып жүргөн экен. Апам болсо ошол 4-класс билими боюнча эле калган окшойт. Ал учурда чоң агам Сулайман, менден кийинки карындашым, анан мен бар элем. Үйүбүз ошол эле жарык жерден элдин эң артында келип тургузган там эле. Ал үйдү кийин мен университетте окуп жүргөндө каникулга келгенде буздум окшойт.
Атамдын колунан пакза уруш келе турган. Жыл сайын жаз келгенде кардар келе турган. Мен үй салып жаттым эле дубалын уруп бер дешчү. Атам айылдагы тууган уругунун, сурангандардын үйүнүн дубалдарын уруп берчү. Колу дарт көрбөсүн, колу сулдуу деп далайы мактоо менен иштетип калууну көздөшчү окшойт. Дайым эле мактагандарын жаш болсом да жанында жүрүп көп уктум. Ошондон паксакер Оске аталып жүрбөйбү.
Ал убакта адамдардын пейли ошондойбу, ким билсин эч убакта иш акысын баалашчу эмес. Колунан эмне чыкса, ошого ыраазы боло алып жүргөнүн билем. Жашында айылдын паксакери аталып жүрдү. Кийин үй курганы тажиктер, өзбектер көп келе турган болду. Атам ошондогу туугандарынан Зикир абабыздын, Алибай, Кушубак, Беки, Ороз, Кулбак, Арстанбек, Кубат, Сами тагаларыныкын үй курганда дубалдарын уруп бергенин кечээ кийинкиге чейин ооздорунан түшүрбөй кеп кылып жүрүштү. Азыр атам үйлөрүнүн дубалын урган кишилердин бири жок. Баары аалам салып кете берди. Андай дейин десең алардын бала-чакаларынан аалам салгандары арбындаганы жашоо чындыгы болуп калды.
(Уландысы бар…)
Маматазим Жуманазаров