Түркиянын президенти Режеп Тайип Эрдоган чалгын кызматынын жана Адилет министринин катышуусунда шашылыш жыйын өткөрдү. Мындай жыйын «Түрк улутчулдар» партиясынын лидери Девлет Бахчелинин төңкөрүш аракети болушу мүмкүн экенин эскерткенден кийин болду, деп жазат Sabah.
Бир күн мурун Анкаранын Башкы прокуратурасы борбор калаадагы башкармалыктын үч полиция кызматкерине «Айхан Бора Каплан» кылмыштуу уюмуна тиешеси бар деген шек менен тергөө ишин баштаган. Алардын үйлөрү тинтүүгө алынган.
Эрдогандын өнөктөшү Бахчели кутум болушу мүмкүн экенин, бир нече полиция кызматкеринин кызматтан алынышы эч нерсени чечпей турганын айтты. Бахчели өлкөдө кайрадан төңкөрүш аракети болушу мүмкүндүгүн эскерткен.
2016-жылы Түркияда төңкөрүш аракети болуп, ал бир нече сааттын ичинде басылган. Өлкө боюнча кагылышуулардын натыйжасында 241 адам каза болуп, 2 миңден ашууну жарадар болгон.
Түркияда төңкөрүштү уюштурган жана ага катыштыгы бар деген шек менен 40 миңден ашуун адам камакка алынган. Өлкөдө бир нече айга чукул кырдаал режими киргизилген.