2026-жылы өтө турган футбол боюнча Дүйнөлүк чемпионаттын тандоо турунун үчүнчү баскычынын бардык командалары аныкталды. Мындай жыйынтык кечээ, 11-июнь күнү бир нече командалардын оюнунан кийин белгилүү болду.
Кечээ, 11-июнь күнү кечинде кыргыз курамасы Оман менен конокто ойноп, оюн 1-1 эсебинде жыйынтыкталды. Бул оюндан кийин «Ак шумкарлар» өз тайпасында 11 упайга ээ болуп, экинчи орун менен Дүйнөлүк чемпионаттын тандоо этабынын үчүнчү баскычына чыкты. 13 упай менен Оман курамасы биринчи орунду алды.
11-июнда өткөн бир нече оюндардан кийин Дүйнөлүк чемпионаттын тандоо оюндарынын үчүнчү турунун бардык катышуучулары белгилүү болду.
Алар: Австралия, Оман, Кыргызстан, Өзбекстан, Бахрейн, Индонезия, Түштүк Корея, Сауд Арабиясы, Япония, Иран, Бириккен Араб Эмираттары, Кувейт, Катар, Кытай, Ирак, Иордания.
Жыйынтыктоочу турнирдик жадыбалда «Ак шумкарлар» 11 упай менен экинчи орунду ээледи. Оман 13 упай менен биринчи орунда, Малайзия 10 упай менен үчүнчү орунда, Кытайлык Тайбэй 0 упай менен акыркы орунда.
Үчүнчү раунд
2026-жылы боло турган футбол боюнча Дүйнөлүк чемпионаттын үчүнчү раундуна 18 команда өттү. Эми чүчүк кулак ташталып, 18 команда алтыдан болуп үч тайпага бөлүнөт. Ар бир тайпада «үйдө», «конокто» системасы менен 10дон оюн болот. Ар бир тайпадан жеңүүчү болгон экиден команда Дүйнөлүк чемпионатка жолдомо алат. Ошентип, 3 тайпага бөлүнгөн 18 команданын эң жакшы натыйжага жетишкен 6 команда Мундиалга жолдомо утат.
Үчүнчү раундда «Ак шумкарлардын» жыйынтыгы начар болсо эмне болот?
«Ак шумкар» командасы өз тайпасынан чыкпай калса, же өз тайпасында 3-4-орундарды алып калса 4-раундга өтөт. 4-раундда 3-раунддан 3-4-орунду ээлеген 12 команда эки тайпага бөлүнүп оюн өткөрүшөт. Бул тайпалардан биринчи орунду ээлеген эки команда гана Дүйнөлүк чемпионатка жолдомо алат.
Эгер кыргыз курамасы бул группадан чыкпай калса эмне болот?
4-раунддан чыкпай калган командалар бир жолдомо үчүн күч сынашат. 5-раунда жеңүүчү болгон бир гана команда тайпадан чыгып, Дүйнөлүк чемпионатка жолдомо алуу үчүн Түштүк Американын командаларынын бири менен ойнойт. Аны утса гана Мундиалга жолдомо утат.
ФИФА Азияга 7+1 жолдомо берген, 1 жолдомону Түштүк Американын курамалары менен талашат
Азиядагы командаларга ФИФА 7+1 жолдомо берген. Дүйнөлүк чемпионатка тандап алуу турунун үчүнчү раундунан өткөн 6 курама Мундиалга түз жолдомо утат. 4-раундга калган командалардын ичинен эң жакшы натыйжага ээ болгон эки команда да Дүйнөлүк чемпионатка жолдомо алат. 5-раундан жеңүүчү болгон бир команда Түштүк Американын бир командасы менен ойноп, жеңсе гана Мундиалга жолдомо алат.
2026-жылкы дүйнө чемпионаты Канада, АКШ, Мексиканын 16 шаарында болупп өтөт. Бул мелдешке тарыхта биринчи жолу 48 курама катышат. Аталган мелдештин тандоо оюндары 2023-жылдын сентябрь айында башталган болсо, 2026-жылдын март айында жыйынтыкталат.