Ошто Милициянын кайгуул кызматынын туристтик взводунун ага тескөөчүсү Уланбек Кожомберди уулун автоунаа койдуруп кетип каза болду. Бул маалыматты Ош ШИИБдин басма сөз кызматы тастыктады.
Маалым болгондой, ушул жылдын 4-июнь күнү саат 21:30 чамасында, Ош шаарынын 2001-жылы туулган тургуну, өзүнүн “ДЭУ Матиз” үлгүсүндөгү автоунаасы менен Ош шаарынын Курманжан-Датка көчөсү аркылуу түштүктөн түндүктү карай башкарып бара жатып, ошол эле көчөдө жайгашкан “Сити” кафесинин тушуна келип калганда, ал убакта жолдогу жөө жүрүүчү өтмөгү аркылуу батыштан чыгышты карай өтүп бара жаткан жөө жүрүүчү, Ош облусунун Кара-Суу районунун Жоош айыл аймагынын тургуну, 1992-жылы туулган, Ош ШИИБы боюнча МККБнүн 5-туристтик взводунун ага тескөөчүсү, милициянын улук лейтенанты, жумуштан сырткары убакта болгон Кожомберди уулу Уланбекти автоунаасынын астынкы сол тарабы менен койдуруп кетип, жол унаа кырсыгын жасаган. Анын натыйжасында, жөө жүрүүчү У.Кожомберди уулу денесинен алган жараатынан улам Ош шарадык тез жардам кызматы аркылуу Ош шаардык аймактык ооруканасынын хирургия бөлүмүнө жеткирилген.
Бул жол унаа кырсыгы 2024-жылдын 4-июнь күнү Ош ШИИБнын маалыматтарды эсепке алуу журналына катталып, тергөөгө чейинки текшерүү иштери башталган. Окуя болгон жерге Ош ШИИБдин тергөө-ыкчам тобу чыгып, кароо жүргүзүлүп, окуя болгон жердин чиймеси чийилип, сүрөттөрго тартылып, тийиштүү иш кагаздары жыйналган. Айдоочу Б.Джумабаев спирт ичимдигин ичкени боюнча Ош облустук наркология бөлүмүнөн текшерүүдөн өтүп, анын соо абалда болгондугу тастыкталып, анын “ДЭУ Матиз” улгүсүндөгү, мамлекеттик белгиси 06 КG 198 AGR номерлүү автоунаасы айып аянтчасына киргизилген.
«Ош шаардык ички иштер башкармалыгынын жетекчилиги, өздүк курамы автожол кырсыгынан улам мезгилсиз дүйнөдөн кайткан Ош ШИИБы боюнча МККБнүн 5-туристтик взводунун ага тескөөчүсү, милициянын улук лейтенанты Кожомберди уулу Уланбектин жакындарына терең кайгыруу менен көңүл айтат жана аза кайгысын тең бөлүшөт»,- деп айтылат маалыматта.
Милициянын улук лейтенанты Кожомберди уулу Уланбек 1992-жылы туулган, билими жогорку. Үй-бүлөлүү, эки баланын атасы, Ички иштер органдарында 2018-жылдан, ал эми азыркы ээлеген Ош ШИИБы боюнча МККБнүн 5-туристтик взводунун ага тескөөчүсү кызматында 2022-жылдан тартып кызмат өтөп жаткан эле.