Эмгек министринин биринчи орун басары Жыпариса Рысбекова парламенттин комитетинин жыйында жаңы Эмгек кодексине ылайык, бир жылдын ичинде 21 майрам күн болорун билдирди.
Анын айтымында, 2024-жылы азыркы эмгек кодексине ылайык, 23 майрам бар.
Депутат Бактыбек Сыдыков («Ата Журт- Кыргызстан) кайсыл майрамдар жокко чыгарылып жатканын сурады.
«23-февраль, 7-апрель 7-8-ноябрь күндөрү эс алуу болбойт. Бул күндөр майрам, бирок жумуш күнү болот. Иш күн эмес майрамдык күндөр 8-март, 21-март, 31-август болот»,-деди Рысбекова.
Депутаттар «Кыргыз Республикасынын Эмгек кодексин ишке ашыруу жана Кыргыз Республикасынын эмгек чөйрөсүндөгү айрым мыйзам актыларына өзгөртүүлөрдү киргизүү жөнүндө» мыйзамдын долбоорун карап жатышат.
Анда төмөндөгүдөй өзгөртүү киргизүү каралган:
— жумуш күнү деп эсептелген майрам күндөрү: 23-февраль (Ата Мекенди коргоочулардын күнү), 7-апрель (Апрель элдик революциясынын күнү), 7-8-ноябрь (Тарых жана ата-бабаларды эскерүү күнү).
-иш күн эмес майрамдык күндөр: 7-январь (Рожество), 8-март (Аялдардын эл аралык күнү), 21-март (Нооруз), 5-май (Конституция күнү), 9-май (Жеңиш күнү) жана 31-август (Эгемендүүлүк күнү). Бул күндөр иш күн эмес.
-жаңы жылдык эс алуу күндөр: 1,2,3,4,5,6-январь. Бул күндөр иш күн эмес.
-май айындагы эс алуу күндөрү: 1,2,3,4,5,6,7,8-май. Бул күндөр иш күн эмес.