Иллюстрациялык сүрөт
Ош облусуна караштуу Алай районундагы аскер бөлүктөрүнүн биринде келишим мөөнөттө иштеп жаткан кызматкер жол кырсыгынан каза болду.
Алдын ала маалыматка ылайык, ал унаасында башкарууну жоготуп, жолдон чыгып кетип, сайга кулап кеткен. Анын сөөгү бир суткадан ашык убакыттан кийин табылып, Ош шаарына жеткирилген. Ошол күнү каза болгон аскер кызматкери күзөттө болгону айтылууда.
Ош облусу боюнча жол кыймылынын коопсуздугун камсыздоо бөлүмүнүн үгүт жана үндөө боюнча тескөөчүсү Замир Бакыев билдиргендей, окуя боюнча маалымат 10-июнга караган түнү жарандар тарабынан келип түшкөн.
«10-июнга караган түнү Ош-Сары-Таш-Эркештам аймагында жайгашкан 28-чакырымында Алай районун Гүлчө айылынын тургуну, ошол эле айылда жайгашкан 92843 аскер бөлүгүндө келишимдин негизинде кызмат өтөгөн кенже сержант, 2000-жылы туулгнан Т уулу Ж «Деу — Нексия» үлгүсүндөгү унаасы менен Гүлчө айылынан Ош шаарын көздөй башкарып бара жатып, авто унаанын рулун башкара албай, жолдун четиндеги даракты сүзүп оодарылып кетип, жол боюндагы сайга түшүп кеткен. Натыйжада Т уулу Ж алган жаратынан улам окуя болгон жерде каза болгон», — деп айтылат маалыматта.