Иллюстрациялык сүрөт
2001-жылдан бери Мамлекеттик курулуш агенттиги курулуш компанияларына 7,5 миңге жакын лицензия берген. Бул тууралуу «Tazabek» басылмасына агенттиктин жетекчиси Нурдан Орунтаев билдирди, деп жазат «АКИпресс» басылмасы.
Анын айтымында, иш жүзүндө алардын 2 миңи гана иштейт жана бюджетке тиешелүү салыктарды төлөйт.
«5 миңге жакын компания иш жүзүндө иштебейт, бирок алардын лицензиялары ар кандай сайттарда, анын ичинде «Lalafo» сайтында кайра сатылууда», — деп белгиледи Орунтаев.
Мамкурулуштун директору билдиргендей, тизме 2023-жылдын ноябрынан бери даярдалып, азыр аяктоо алдында турат. Кийинки кадам салык органдарында алардын бюджетке чегерүүлөрүнүн суммасын ырастоо болот. Ошондо компаниянын активдүү же активдүү эместиги белгилүү болот. Анын негизинде Мамкурулуш ошол компанияларды лицензиясынан ажыратат.
Орунтаевдин айтымында, лицензия берүү коррупциялык элементке айланып кеткен. Лицензия алгандан кийин тиешелүү документтерин бербеген башка жактарга кайра сатып жиберген учурлар кездешет.
«Учурда Мамкурулуш Министрлер кабинетинин токтомунун долбоорун иштеп чыкты, ага ылайык биз биринчи кезекте тарифтерди бекитебиз. Курулуш компанияларына лицензия алуу жеңилдейт, бирок алар жогорулатылган мамлекеттик төлөмдөрдү төлөшү керек болот. Башкача айтканда, 1-даражадагы лицензиянын баасы 1,5 миллион сом, 2-даражадагы – 700 миң сом, 3-даражадагы – 500 миң сом болот», — деди Орунтаев.
Даража — бул уруксат берүү, анын жардамы менен ишканалар чарчы метрге жана бийиктикке жараша объекттерди кура алат. Мисалы, 1-даражадагы компаниялар 5 кабаттан жогору көп кабаттуу үйлөрдү курушат. Экинчи даража 5 кабатка чейин курууну камтыйт. Мындай компаниялар социалдык маанидеги объектилерди курууга укуктуу. Үчүнчү даражадагы компаниялар таунхаустарды жана жеке үйлөрдү курушат.