Сүрөт: «Турмуш кж»
Чүй облусунун Жайыл районунда катталган жол кырсыгы боюнча «Фолькваген Жетта» автоунаасынын айдоочусу камакка алынды. Бул тууралуу Чүй ОИИБдин басма сөз кызматы кабарлаганын бир катар ММКлар кабарлады.
Маалыматка караганда, кечээ, 20-июнь күнү саат 19:00дор чамасында Жайыл РИИБнин нөөмөт бөлүмчөсүнө Жайыл районуна караштуу Алтын айылынын түндүк тарабында жайгашкан №3 көлүнөн “Фольксваген Жетта” үлгүсүндөгү автоунаасы чөгүп, ичиндеги жүргүнчү катары болгон ымыркай балдар каза болду деп маалымат келип түшкөн.
Бул маалымат Жайыл РИИБдин электрондук маалымат каттоо китебине катталып, алдын ала тергөө иштери жүргүзүлө башталган.
«Окуя боюнча ыкчам-тергөө тобу аталган жерге барган учурда төмөндөгүлөр аныкталган: болжол менен 13:00 чамасында Кара-Балта шаарынын Крупский көчөсүнүн тургуну 1984-жылы туулган Г.Т. өзүнүн “Фольксваген Жетта” үлгүсүндөгү унаасыны менен жубайы 1998-жылы туулган Б.О. жана жашы жете элек 2017-жылы туулган Б.В., 2018-жылы туулган Б.К., 2020-жылы туулган Б.Т., 2024-жылы туулган Г.Р. жана балдызы 1997-жылы туулган Б.О., анын жашы жете элек балдары 2015-жылы туулган Б.В., 2018-жылы туулган Б.А., 2019-жылы туулган Б.Р. жана 2017-жылы туулган Б.С. аттуу балдары менен Жайыл районунун Алтын айылында жайгашкан №3 көлмөгө сууга түшүүгө келишкен. Ошол жерден Г.Т. спирт ичимдигин ичип, болжол менен саат 18:30да чамасында мас абалында өзүнүн унаасы менен бурулуп жатып, дөңсөөдөн оодарылып, ичиндеги жүргүнчүлөр менен бирге сууга түшүп кеткен. Унаанын ичинен айдоочу Г.Т., келинчеги Б.О., ымыркай кызы 2024-жылы туулган Г.Р., балдызы Б.О. жана анын кызы 2017-жылы туулган Б.С. автоунаадан чыгышып, калган жүргүнчүлөр көлмөгө чөгүп каза болушкан»,- деп айтылат маалыматта.
Аталган факт боюнча окуя болгон жерден калган жүргүнчүлөрдүн жансыз денелери суудан чыгарылып, соттук-укуктук экспертизалар дайындалган.Алдын ала териштирүү учурунда чогултулган материалдардын негизинде бул факт боюнча Кыргыз Республикасынын КЖКнын 312-беренесинде көрсөтүлгөн кылмыштын белгилери менен кылмыш иши козголгон.
Тергөө амалдарын жүргүзүү учурунда, Г.Т. аттуу жаран аталган жерде “сууга түшүүгө болбойт” деген эскертүүгө карабастан, сууга түшүп мас абалында унаага олтуруп башкарып жол кырсыгына кабылгандыгы, анын натыйжасында жаш өспүрүмдөрдүн каза болгондугуна алып келгендигине байланыштуу Кыргыз Республикасынын КЖПКнын 96-беренесине ылайык, аталган кылмыш иши боюнча шектүү катараныда кармалып, убактылуу кармоочу жайга киргизилди.
Кылмыш иши боюнча тергөө амалдарынын жүргүзүлүшү Кыргыз Республикасынын ИИМдин жана Чүй ОИИББнын жетекчилиги тарабынан өзгөчө көзөмөлгө алынды.
Учурда тергөө амалдары жүргүзүлүүдө.