Сүрөт: «Турмуш» басылмасы
30-июнь күнү түнү саат 22:25 чамасында Кара-Кулжа районунун Жетим-Дөбө айылында сел жүрүп, унаада баражаткан милиция кызматкери жубайы жана балдары менен кошо каза болду. Бул тууралуу «Ош жаңырыгына» Ош ОИИБдин басма сөз кызматы кабарлады.
Маалыматка карганда, 30-июнь күнү саат 22:25 чамасында Кара-Кулжа райондук ички иштер бөлүмүнө Кара-Гуз айыл аймагынын Жетим-Дѳбѳ айылында катуу жааган жаандан сел жүрүп, автоунааны агызып кеткендиги тууралуу маалымат түшкөн.
Бул факты каттоого алынып, окуя болгон жерге райондук ички иштер бөлүмүнүн жетекчилиги, тергөө-ыкчам тобу, өздүк курам жана кошумча күчтөр чыгып, тергөөгө чейинки текшерүү иштери башталган.
Текшерүүнүн жүрүшүндө аталган аймакта Дaewoo -МАТИЗ автоунаасын башкарып бараткан 1988-жылы туулган А.Р. аттуу жергиликтуу жашоочу, жубайы 1990-ж.т. Ж кызы А, уулдары 2012-ж.т. Р уулу Р, 2020-ж.т. Р уулу Н. жана кызы 2016-ж.т. Р кызы А. сел агызып кеткендиги маалым болгон.
Кыргыз Республикасынын ӨКМ менен биргеликте жүргүзүлгөн издөө иш-чараларынын натыйжасында 3 атуулдун жансыз денеси табылды. Жакын туугандарынын эч кимге арыз-доосу жок болгондуктан жансыз денелерге сыртынан кароо жүргүзүлүп, туугандарына өткөрүлүп берилди.
Ал эми аман калган 2016-ж.т. Р.А. райондук ооруканага жеткирилип, денесинен алган жараатына медициналык жардам көрсөтүлгөн.
Учурда жеринде Кара-Кулжа райондук ички иштер бөлүмүнүн өздүк курамы, КР ИИМдин Күзөт кызматы, жергиликтүү тургундар, ардагерлер жана кошумча күчтөр дайынсыз болуп жаткан Р.уулу Н.ны табуу, селдин кесепетинен жабыр тарткан жагдайларды калыбына келтирүү боюнча иш-чараларды жүргүзүп жатат.
Каза болгон 1988-ж.т. А.Р. КР ИИМдин Күзѳт кызматынын кызматкери болгон.
Кийинчерээк ӨКМ баланын сөөгү табылганын кабарлады. Издөө иштерине ӨКМден 50 куткаруучу, ИИМден 40 кызматкер, тез жардам кызматынан жана жергиликтүү тургундардан 300 адам тартылган.