Бүгүн, 5-июлга карата Ош облусунун Ноокат районун Кулатов жана Көк-Жар айыл аймагында селдин кесепеттерин жоюу жумуштарына ӨКМден 10 куткаруучу 20 инженердик техника, жергиликтүү элди таза суу менен камсыз кылуу максатында 5 өрт өчүрүүчү техника тартылды. Бул тууралуу ӨКМдин басма сөз кызматы кабарлады.
Маалым болгондой, айыл өкмөттөн 30 кызматкер, 17 оор техника, №37 Жол тейлөө ишканасынан 1 грейдер, 3 хова, 1 жүктөгүч, 2 экскаватор тартылды. Ал эми жергиликтүү тургундардан 40 адам көмөктөшүүдө.
«4-июль күнү Кулатов жана Көк-Жар айыл аймактарындагы айылдарда көчөлөрдү, арыктарды, көпүрөлөрдү, турак үйлөрдүн эшик алдын жана Абшыр-Ата сайында сел калдыктарынан тазалоо жумушу жүрдү»,- деп айтылат маалыматта.
Аталган айыл аймактардын тургундарына турмуш тиричилигине колдонууга 154 тонна таза суу ташылып берилди. Ошондой эле «Абшыр-Ата» эс алуу жайында унаа жолдогу көпүрө калыбына келтирилип, жолдун 700 метри жасалды. Селден кесепеттерин жоюу иши аталган жерлерде бүгүн да уланууда.