Борбор Азия футбол ассоциациясынын 20 жашка чейинки курама командалары арасында футбол боюнча чемпионаты бүгүн, 5-июлда старт алып, анын алкагында Кыргызстандын жаштар курамасы Ооганстанга каршы кез келет. Бул тууралуу Кыргыз футбол биримдиги билдирди.
Маалым болгондой, эл аралык мелдеш Жалал-Абад шаарынын «Курманбек» стадионунда өтүп, ага Ооганстан, Иран, Кыргызстан, Тажикстан, Түркмөнстан жана Өзбекстандын командалары катышат.
«Мелдештин чүчүгулагынын жыйынтыгында улуттук курама команда «А» тайпасында Тажикстан жана Ооганстан курамалары менен бирге жайгашты. 5,7,9-июль күндөрү тайпалык оюндар, ал эми 11-12-июль күндөрү финалдык беттештер өтөт»,- деп айтылат мааалыматта.
Аталган мелдеште калыстарга видео жардам системасы (VAR) колдонулат. Белгилей кетсек, бул Кыргызстан кабыл алган бардык эл аралык беттештердин жана БАФА эгидасы алдындагы мелдештердин тарыхында биринчи жолу болмокчу.
Турнирдин беттештеринин түз алып берүүлөрү Регион ТВ, Кыргыз Спорт ТВ жана БАФАнын YouTube каналында жеткиликтүү болот.
Бүгүн түнкү саат 22:00дө Ооганстан курамасы менен кыргыз курамасы чемпионатты баштап берет.