Чаткал районунда жайгашкан Ак-Сай тоосунда дайынсыз жоголгон 6 жаранды издөө иштерин улантуу максатында ӨКМдин тик учагы бүгүн, 18-октябрда саат 07:30да Ош шаарынан учуп чыкты.
Маалыматка караганда, 16-октябрда издөө иштеринин натыйжасында 8 жаран аман-эсен табылган, ал эми калган 6 кишинин кар көчкү алдында калышы мүмкүн деген маалымат берилген.
«Издөө иштерине Өзгөчө кырдаалдар министрлигинин жалпы 20 куткаруучусу тартылып, зарыл болгон бардык техникалык жабдуулар колдонулууда. Ошондой эле, куткаруучулар спутник аркылуу министр менен туруктуу байланышып турушат»,- деп айтылат маалыматта.
Саат 13:00дө окуя болгон жерге Өзгөчө кырдаалдар министрлигинин төрт адамдан турган куткаруучу топ жеткирилди. Коопсуздукту камсыздоо максатында алар үч адамдан турган звенодо иштеп, ар бирин коргоочу аркандары менен байланыштырып, иш алып барышууда. Жеринде аба ырайын көзөмөлдөө кызматкерлери (Гидромет) кар көчкү түшүү коркунучун баалап, куткаруучулар үчүн коопсуз жайгашуу аймактарын көрсөтүп берүүдө.
«Жакын аралыкта дагы эки топ жөнөтүлүп, бардык коопсуздук чараларын сактоо менен калган жарандарды издөө иштери улантылат. Аймакта дагы деле кар көчкү түшүү коркунучу өтө жогору бойдон. Куткаруу иштери өтө кооптуу зонада жүргүзүлүүдө. Тик учак алдын ала эки жолу айланып учуп, коопсуз конуу жерин жана убактылуу лагерь жайгаштырууга ылайыктуу жерлерди аныктады. Азыркы учурда аба ырайы куткаруу иштерине ыңгайлуу болууда»,- деп айтылат ӨКМдин билдирүүсүндө.
Буга чейин 9-октябрда Каныш-Кыя айылынан 14 тургун жана бир чет элдик жаран Эндик сейрек кездешүүчү өсүмдүктүн тамырларын издөө үчүн тоого чыгып, дайынсыз жоголгон. 16-октябрда ыкчам-издөө иштери натыйжасында сегиз жаран аман-эсен табылган. Бүгүн издөө иштеринин жүрүшүндө бир жаран каза болгон абалда табылды. Калган беш адамды издөө иштери улантылууда.