![Ошто мамлекеттик туу көтөрүлдү Ошто мамлекеттик туу көтөрүлдү](https://oj.kg/wp-content/uploads/2023/09/photo_2023-08-31_18-14-06.jpg)
Үстүбүздөгү жылдын 31-августта Ош шаарындагы касиеттүү Сулайман-Тоонун астанасындагы Алымбек Датка атындагы сейил багында өлкөнүн Эгемендүүлүк күнүнө карата Кыргыз Республикасынын Мамлекеттик туусун көтөрүү салтанаттуу аземи болуп өттү. Кыргыз Республикасынын Президенти, өлкөнүн Куралдуу күчтөрүнүн Башкы колбашчысы Садыр Жапаров Кыргыз Республикасынын Туусунун желек сабынын расмий ачылышына катышты. Мамлекет башчысы Кыргызстан элин майрамы менен куттуктады.
«Урматтуу мекендештер, ордолуу Оштун уюткулуу улуу журту! Урматтуу кыргызстандыктар жана кадырлуу меймандар! Бүгүн кыргызстандыктар үчүн, алыс-жакында жүргөн мекендештер үчүн улуу күн! 31-август – Кыргыз Республикасынын көз карандысыздык күнү.
Кылымдарды карытып келген улуу кыргыз журтчулугун Эгемендик күнү менен Кыргызстандын экинчи борбору атыккан Сулайман тоосу, Ак-Буура дарыясы менен белгилүү болгон кадимки Улуу Жибек жолунун боюндагы кереметтүү Ош шаарынан куттуктап, сыймыктанып турам.
Баарыңыздарды Көз карандысыздык майрамы менен чын дилимден куттуктаймын. Ылайым, түндүгүн күн нуру чайыган кызыл желегибиз ар дайым желбиреп турсун, туубуз жыгылбасын, асманыбыз ачык, жергебизде тынчтык болсун. Майрамыбыз кут болсун!
Эркиндиктин, азаттыктын добушун жаңырткан Эгемендик менен кызыл байрагыбыз бир бүтүндүктү туюндурат. 30кылымдан ашуун тарыхында ата-бабаларыбыз дал ушулэркиндиги, эгемендиги үчүн канын төгүп, жанын берип күрөшүп, улуу дөөлөттөрдү куруп, туусун бийик желбиретип,тарых барактарына “кыргыз” деген атты ташка тамга баскандай калтырып кетишкен.
![Ошто мамлекеттик туу көтөрүлдү](https://oj.kg/wp-content/uploads/2023/09/photo_2023-08-31_18-13-38-1024x730.jpg)
Кылкылдаган кызыл туусу менен куп жарашкан Эгемендик бизге ыйык сезим болуп калыптанып, бул ыйыктык муундан муунга кан аркылуу өтүп, бүгүнкү күндө элибиз эркиндикти сүйгөн, калыстыкты туу туткан эл экенин эчен ирет далилдеди. Мына ошол эгемендигибиздин эн белгиси болгон кызыл байрагыбыз ата-бабаларыбыздын аманатын, келечек муун алдындагы милдеттерибизди ар дайым эскертип, каныбызды дүргүтүп, көөдөнүбүзгө дем-күч берип келет. Ошондуктан бүгүнкү күндө мекенчилмин деген ар бир кыргызстандык атуул өлкөбүздүн көз карандысыз дыгын, мамлекетибиздин бүтүндүгүн , эли-журтубуздун ынтымагын коргоону ыйык милдет деп санайт. Табият менен таттуу мамиледе жашап келген кыргыз эли насилинде аскар тоолорду эңсейт, бийиктикти самайт, улуулукка таазим кылат. Ошондуктан кыргыз эли кылымдар бою Ала-Тоосун мекендеп, аны көздүн карегиндей сактап келе жатса, кээде Ала-Тообуз бизди сактап келе жаткандай туюлат.
Бүгүн биз байыркы мезгилдерден азыркы күнүбүзгө чейин мамлекеттин эгемендигинин эн тамгасына айланган кызыл туубузду дал ушул улуулукту, бийиктикти символдоштурган Сулайман тоонун астанасына 60 метр бийиктикке көкөлөтүп жатабыз.
Бир туунун астына башын бириктирген элибиздин келечеги кең болсун. Байрагын бийик желбиретип, ынтымагын арттырып, өнүгүүгө бет алган калың журтка айланалы.
![Ошто мамлекеттик туу көтөрүлдү](https://oj.kg/wp-content/uploads/2023/09/photo_2023-08-31_18-14-02-1024x810.jpg)
Биз, ордолуу Ош шаары менен ар дайым сыймыктанабыз. Себеби, капкалуу бул шаар Сулайман пайгамбар менен Искендер Зулкарнайндын аты менен байланышкан уламыштардан сырткары, араб жана перс окумуштууларынын, тарыхчыларынын эмгектеринде эскерилет. Аларда Ош шаары жөнүндө маанилүү тарыхый, маданий, аскердик, социалдык-экономикалык көптөгөн маалыматтар жатат.
Ош шаары Улуу Жибек Жолундагы маанилүү соода жана маданий түйүн катары эчендеген тарыхый доорлорду эске салып турат. Бул аймак тарыхта түркүн маданияттар жуурулушкан, түрдүү цивилизациялардын элементтери кездешкени менен баалуу. Ош облусу өлкөбүздүн өлчөөсүз байлыгы болгон этностор аралык ынтымактын, көп түрдүүлүктүн духун чагылдырып турат. Ош дубаны кайрадан жаңыланган Улуу Жибек Жолунда тарыхый миссиясын уланта турган күн дагы алыс эмес.
Ош облусу аркылуу өтө турган “Кытай – Кыргызстан – Өзбекстан” темир жолун куруу долбооруна 3 мамлекеттин башчылары тарабынан кол коюлгандыгын, бул темир жол магистралынын канчалык маанилүү экенин жакшы билесиздер.
![Ошто мамлекеттик туу көтөрүлдү](https://oj.kg/wp-content/uploads/2023/09/photo_2023-08-31_18-13-44-1024x682.jpg)
Биз, кыргыз эли бирде жеңип, улуу дөөлөттөрдү куруп, кең аймакта ат ойнотуп, салтанат куруп, бирде жеңилип, катуудан казаны калганча кырылып, түгөнүп барып түтөгөн элбиз. 30 кылымдан ашуун карт тарыхты кырча баскан ата-бабаларыбыз өз кезегинде дүйнөлүк цивилизацияга салым кошо алышкан. Бул тууралуу азыркы интернет желесинде маалымат желдей учуп турган чакта кыргыз эли – даңктуу тарыхы бар улуу эл болгону ар тараптан тастыкталып баратканына күбө болуудабыз.
Биз сыймыктангыдай жана сабак алгыдай бай тарыхыбызбар. Бул – ата-бабалардын , улуу муундун эмгеги. Ал эмиошол алмустактан бери келаткан кыргыз тарыхынын бир бөлүгү, бүгүнкү күндө да өз орду, өз салмагы бар Оштун тарых-таржымалы кадимки Кубат бий, Ажы бий, Алымкул аталык, Алымбек датка, Мусулманкул миңбашы, Нүзүп бий, Курманжан датка, Полот хан жана башка тарыхый инсандардын аттары менен тыгыз байланыштуу. Айкөл Манас атабыз, Барсбек бабабыздан берки ата-бабаларыбыздын ысымдарынын катарын улаган, жогоруда аттары аталган аталарыбыз биз үчүн, кийинки урпактар үчүн, маңдай жарыла бүгүн кубануу менен белгилеп жаткан Эгемендигибизге түздөн-түз таасир этишкени кашкайган чындык, биз үчүн чоң сыймык.
Кыргыз элинин тарыхында изи өчпөй, аты кылымдарга даңкталып кала турган чыгаан инсандарыбыздын учу ошону менен токтоп калган жок. Түптүү эл экенбиз, өткөн кылымдын башында бүгүнкү мамлеке ттүүлүгүбүздүн пайдубалын түптөгөн Иманалы Айдарбеков, Жусуп Абдрахманов, Абдыкерим Сыдыков, Ишеналы Арабаев, Абдыкадыр Орозбеков, Баялы Исакеев, Касым Тыныстанов, Төрөкул Айтматов, алардан берки Исхак Раззаков, Турдакун Усубалиев жана башка аталарыбыз кыргыз элинин тарыхында тагдыр чечер бурулуштарды жасап, тарых жаратышкан.
![Ошто мамлекеттик туу көтөрүлдү](https://oj.kg/wp-content/uploads/2023/09/photo_2023-08-31_18-13-50-1024x653.jpg)
Кыргыз байрагын алгалатууга, кыргыз мамлекеттүүлүгүн түптөп, өнүктүрүүгө өмүрлөрүн арнашкан. Кыргыз мамлекетинин көз карандысыздык майрамынын урматына жогоруда аттары аталган асыл инсандардын жолун улаган көрүнүктүү мамлекеттик, саясий ишмер Насирдин Исанов менен Абды Сүйөркуловго “Кыргыз Республикасынын Баатыры” деген жогорку наамды ыйгаруу боюнча чечим кабыл алдым. Бул эки ысымды билбеген, укпаган, алардын эл-жер үчүн жасап кеткен эмгектеринен кабары болбогон кыргыз болбосо керек. А түгүл, бул эки ысым коңшу мамлекеттер менен кошо ошол кездеги союздаш республикалардын баарына маалым болгон. Ар бир муундун ичинен элдин жүзүн, тагдырын, болмушун аныктай турган, жаркын келечекке багыттай турган атуулдар чыгат экен. Мен бул агаларды кыргыз элинин тарыхында тагдыр чечүүчү саясый мезгилдерде, өлкөнү өнүктүрүү жолунда көрүнүктүү из калтырган инсандардын катарын толуктап турат деп ишенимдүү айта алам. Уучубуз куру эмес экен, улуу элдин урпактары экенибизди ушундай адамдар тастыктап келет.
Башкача айтканда, жаратман эл экенибизди ак эмгеги, асыл нарк дөөлөттөрдү жаратуу менен далилдеп берген баатырларыбыздын иши уланууда. Бүгүнкү күндө билимге умтулган жаштарыбыз, “мамлекет мага эмне кылып берет?” дебей, “мен мамлекетиме эмне кыла алдым?” деген көз караштагы жаратман замандаштардын саны өсүүдө. Алакандай эл аталып, башка чукак журт элек, мына 7 миллиондуу калк болдук. Кыргыз 7 санына өзгөчө маани берген, төлгө тартып, жакшылыкка жоруган. Элибиз көбөйүп өсө берсин, 7 млн калкыбыз 70 млн болсун.
![Ошто мамлекеттик туу көтөрүлдү](https://oj.kg/wp-content/uploads/2023/09/photo_2023-08-31_18-13-56-1024x764.jpg)
Мамлекет жасап берет деп отура бербестен, өз киндигибизди өзүбүз кескенди, мүдөөсү бекем улуттар менен атаандаш жашаганды үйрөндүк. Аскердик күч-кубатыбызды арттырып, коргонуу мүнөзүндөгү, мамлекеттин аскер коопсуздугун камсыздоого багыт алган аскердик доктринаны” кабыл алдык. “Кытай-Кыргызстан-Өзбекстан” темир жолун курууга белсенип, мамлекетибиздин дүйнө жүзүнө кулачын жаюуга жол ачылып жатат. Мамлекеттин экономикасынын күрөө тамырына айланган жол тармагында дагы реформалар башталды. Жол куруучу техникалар сатып алынып, жер-жерлерде кызуу иштеп жаткан чагы.
Өзгөчө кырдаалдар министрлигине тик учак, куткаруучу техникалар алынды. Ири ГЭСтердин агрегаттары реконструкцияланып, ондогон чакан ГЭС, күн, шамал электр станциялары курулууда. Кыргызстандын жүрөгүнө айланган Баткен облусуна миллиарддаган каражаттар бөлүнүп, айылдарды калыбына келтирүүгө, жаңы үйлөрдү, социалдык обьектилерди курууга, элдин жашоо-шартын оңдоого жумшалууда. Таалим-тарбия, билим берүү тармагында бала бакчалардын, жаңы мектептердин курулушу 2 жылданбери жигердүү жүрүп, республикадагы мектеп көйгөйү чечилип жатат. Мындан сырткары, кызмат адамдарын ротациялоо ийгиликтүү натыйжасын берип жатканы үчүн,жер-жерлерде кызматтык үйлөр курулуп, колдонууга берилүүдө. Аймактардагы аэробекеттердин курулуштары бүтсө, буюрса, өлкө ичиндеги аба каттамдары жанданат.
![Ошто мамлекеттик туу көтөрүлдү](https://oj.kg/wp-content/uploads/2023/09/photo_2023-08-31_18-13-53-1024x831.jpg)
Мына ушул сыяктуу иш-аракеттерден улам, эл аралык институттар тарабынан жүргүзүлгөн мониторингдердин негизинде Кыргызстан туруктуу өнүгүү жолуна түшкөн мамлекеттердин катарына кошулду. Ушул ири долбоорлорду ишке ашыруу менен көздөгөн максатыбызга жетебиз, элибиздин мүдөөсүн орундатабыз. Бир кезде Кыргызстандын жетишкендиктери менен сыймыктанчу учур да келет. Андай заманды жаратуу, өнүккөн өлкө куруу өзүбүздүн колубузда. Себеби, бизде бардык мүмкүнчүлүктөр бар. Учурду текке кетирбейли, аталардан бизге калган эгемендүү Кыргызстанды өркүндөтүп-өстүрүп, кийинки муунга өткөрүп берели», — деди мамлекет башчысы.
А.МАТИЕВА.