![Баткен: Кыргыз-Кыштак айыл өкмөтүнүн үч кызматкери кармалып, мурдагы жер адистин мүлкү конфискацияланды Баткен: Кыргыз-Кыштак айыл өкмөтүнүн үч кызматкери кармалып, мурдагы жер адистин мүлкү конфискацияланды](https://oj.kg/wp-content/uploads/2023/10/e4a94efd-4568-4042-8746-5b4a41e6e295.jpg)
УКМК тарабынан Кадамжай районунун Кыргыз-Кыштак айыл аймагында трансформацияланбаган жерлерди жеке турак жай куруу үчүн мыйзамсыз берүү фактылары боюнча, Кыргыз Республикасынын Кылмыш-жаза кодексинин 337-беренеси (Кызмат абалын кыянаттык менен пайдалануу) менен кылмыш иши тергелүүдө.
УКМКнын маалымат борбору тараткан маалыматка караганда, жүргүзүлгөн ыкчам-иликтөө иш-чараларынын натыйжасында аталган айыл аймактын айрым кызмат адамдарынын Д.Д.М., КА.С. жана T.A.C. мыйзамсыз иш-аракеттери аныкталды, алар 2016-2023-жылдар аралыгында 61,37 га жер тилкесин жеке турак жай куруу үчүн бөлүп берүү боюнча мыйзамсыз чечимдерди чыгарган.
![Баткен: Кыргыз-Кыштак айыл өкмөтүнүн үч кызматкери кармалып, мурдагы жер адистин мүлкү конфискацияланды](https://oj.kg/wp-content/uploads/2023/10/aa037e7d-d82f-43d5-b109-2bd900fbcebe.jpg)
Мындан тышкары, жер тилкесин мыйзамсыз берүү боюнча башка фактыларды жашырууну көздөп, аталган адамдар жеке баюу максатында Кадамжай райондук жер мунапыс комиссиясы менен алдын ала сүйлөшүп, 600,53 гектар жерди мыйзамдаштыруу боюнча арыз беришкен, бирок иш жүзүндө 624 га жер экени аныкталды, анын ичинен 61,37 га мыйзамсыз токтом чыгаруу менен берилген, 6 га Д.Д.М. тарабынан 12 жакын байланыш адамдарына белек катары берилген, ал эми 556,63 гектар жер мунапыс боюнча комиссиясы менен макулдашып, жергиликтүү тургундар тарабынан басып алынган деп киргизилип, үй ээлеринин бар экендиги тууралуу маалыматтар жасалма көбөйтүлүп берилген.
![Баткен: Кыргыз-Кыштак айыл өкмөтүнүн үч кызматкери кармалып, мурдагы жер адистин мүлкү конфискацияланды](https://oj.kg/wp-content/uploads/2023/10/155aa461-fa37-4948-a214-913b0fd3b58f.jpg)
Ошол эле учурда, көз карандысыз эксперттин корутундусуна ылайык, мыйзамсыз берилген 624 гектар жердин баасы 1 миллиард 63 миллион сомго бааланса, анын ичинен мыйзамсыз чечимдин негизинде берилген 61,37 гектар жердин баасы 103 миллион 743 миң 145 сомду түзөт.
«Жүргүзүлгөн ыкчам-иликтөө иш-чараларынын натыйжасында баасы 1 миллиард 63 миллион сом болгон 624 гектар жер тилкеси мамлекеттин балансына кайтарылды жана Баткен облусунун Кадамжай районунун Кыргыз-Кыштак а/а кызмат адамдарынын жеке кызыкчылыгын көздөгөн кадамдарына бөгөт коюлду»,-деп айтылат маалыматта.
УКМКнын дагы бир маалыматына ылайык, мурда УКМК органдары тарабынан Кыргыз Республикасынын Кылмыш-жаза кодексинин 209-беренеси (“Алдамчылык”) боюнча козголгон кылмыш ишинин алкагында Кыргыз Республикасынын И.Ж. аттуу жаранына жер тилкесин мыйзамсыз бөлүп берүү үчүн мурда алынган 106 миң сом өлчөмүндөгү паранын 50 миң сомун кайтарып жаткан жеринен Кадамжай районунун Кыргыз-Кыштак а/а жер маселелери боюнча башкы адиси К.А.С. кармалган.
![Баткен: Кыргыз-Кыштак айыл өкмөтүнүн үч кызматкери кармалып, мурдагы жер адистин мүлкү конфискацияланды](https://oj.kg/wp-content/uploads/2023/10/8647ae3e-20ab-4c9b-affb-840f0b734108.jpg)
Соттук териштирүүлөрдүн жыйынтыгында, кармалган К.А.С.нын турак-жайы, айыл чарба багытындагы жер тилкеси жана «Хундай Портер» үлгүсүндөгү унаасы, жалпы суммасы 5 млн 450 миң сом мамлекетке конфискацияланды.
Учурда бул мыйзамсыз аракеттерге тиешеси бар башка адамдарды аныктоо боюнча тергөө-ыкчам иш-чаралары жүрүп жатат.