Министрлер кабинетинин төрагасынын орун басары — УКМКнын төрагасы Камчыбек Ташиев кечээ, 16-майда Кара-Суу районунун Кара-Суу шаарындагы «Манас» стадионунда райондун активи, мекеме-ишканалардын жетекчилери менен жолукту. Анда Камчыбек Ташиев Р. Матраимовдун кланы тууралуу сөз кылганын «Турмуш» басылмасы жазды.
«Р. Матраимовду биринчи кармаган маалда алар 2 млрд 200 млн акча төлөп чыгышкан. Ошондо шарт койгонбуз, мындан ары эч кандай криминалдык аракеттерди жасабагыла, бандиттерге кошулбагыла, мамлекетти талап-тонобогула, бажыга жарым кадам да жолобогула деп айтканбыз. «Макул» деп кетишкен. Анан эмне болду? Жарым жыл карадык, бир жыл карадык. Кайра эле баштап алышты, кайра эле бажыга отуруп алышты. Таможнянын кадрлары менен уурдай башташты. Бандиттер менен дос болуп кетишти. «Вор в законе» Көлбаевге кошулуп алышып, ишкерлерди коркутуп-үркүтүп, алардын акчасын алып, коркута башташты. Анан биз чара көргөнгө мажбу болду да, чара көрдүк. Ошондо да шарттарды коюп, адамгерчилик кылып, «качпагыла, үркпөгүлө, ушундай акчаны төлөйсүң, жакындабайсың» деп шарт койгонбуз. Ага дагы көнбөдү. Акыры качып кеткен жерден бир туугандары менен кошо Бакудан кармап келдик. Билесиздер аны, төртөөнү тең.
Агасы иштен кетти, Матраимов менен байланыштуу таможняда иштеген , чогуу жүргөн, чогуу бизнес кылгандардын баарын парламенттен тазаладык. Мамлекеттик органдардын баарын тазалап жатабыз. Бирок дагы деле бар. Бул жерде аким катуу иштеш керек, губернатор кату иштеш керек. Силер бизге «бул, бул адам байланышта » деп сунуш беришиңер керек. Эч ким эч кимди сактап кала албайт.
Бүгүнкү күндө Райым Матраимовдун моюнуна 200 млн доллар илинген. Бул 13-20 млрд сомго жакын. Ал эми силердин бул стадионуңарга болгону миллион доллар кетет. 1-2 млн доллар кетсин. Көрдүңөрбү масштабды? Биз коррупцияны чогултуп, коррупцияга берилип, бир топторду колдогонубуз үчүн стадионуңар ушул акыбалда. Күчсүзбүз. Ошону үчүн болуп жатат. Эгерде алар уурдабай, мамлекетке иштегенде баары, стадионубуз жаркырап жайнап, укмуш турмак», -деди К. Ташиев.