Штефан Тарковичтин жетекчилиги алдындагы Улуттук кураманын машыктыруучулар штабы 2026-жылкы Дүйнө Чемпионатына жана 2027-жылкы Азия Кубогунун июнда өтө турган тандап алуу оюндары үчүн даярдыктын алкагында өтө турган жыйынга кураманын кеңейтилген тизмесин жарыялады. Бул тууарлуу Кыргыз футбол бирлигинен билдиришти.
Маалыматка караганда, отуз үч оюнчудан турган курама 27-май– 4-июнь күндөрү Жалал-Абад шаарында окуу-машыгуу жыйынын өткөрөт. Эскертек, беттештерге болгон өтүнмөгө 23 гана оюнчу кирет, акыркы тизме 3-июнда белгилүү болот.
«Улуттук курамабыз тандап алуу оюндарынын алкагында 6-июнь күнү Бишкектин Д.Өмүрзаков атындагы стадионунда Малайзияга каршы кез келет. Ал эми, 11-июнда, Омандын борбор калаасы Мускат шаарында Оман Улуттук курама командасы менен ойнойт»,- деп айтылат маалыматта.
Кыргыз футбол биримдиги жарыялаган футболчулардын тизмесине ылайык, УКМКнын төрагасы Камчыбе Ташиевдин уулу Эмир-Хан Кыдыршаев да курамага чакырылган.
2022-жылы майда Эмир-Хан Кыдыршаев «Барселонанын» жаштар курамына кошулганын Кыргыз футбол биримдиги билдирген.
2019-жылы Ташиевдин кенже уулу Эмир-Хан Кыдыршаев Италиядагы Паоло Росси атындагы футбол академиясына тапшырган. Анда Кыдыршаев аталган академияда окуган алгачкы кыргызстандык болгон. Андан соң ал «Испаниядагы» «Леванте» клубунун академиясына өткөнү, аталган өлкөдө жашары белгилүү болгон.