Бүгүн, 22-июль күнү Министрлер Кабинетинин Төрагасынын орун басары – УКМКнын төрагасы Камчыбек Ташиев, КР Транспорт жана коммуникациялар министринин милдетин аткаруучу Абсаттар Сыргабаев, КР Президентинин Ош облусундагы ыйгарым укуктуу өкүлү Эльчибек Джантаев Ош-Ноокат-Раззаков жолу менен таанышты, деп билдирди Президенттин Ош облусундагы өкүлчүлүгүнүн басма сөз кызматы.
Маалыматка караганда, Камчыбек Ташиев Ош-Ноокат жолунда иштин жай жүрүп жатканына токтолуп, октябрь айынын аягына чейин жолдун жана үч негизги көпүрөнүн курулушун бүтүрүү милдетин койду.
«Мындан тышкары, Ноокат шаарындагы унаа тыгындарын жоюу максатында сунушталып жаткан айланма жолдун долбоору менен таанышты. Объекттин курулушуна бардык шарттарды эске алуу керектигин белгилеп, тиешелүү органдарга жол иштеринин сапатын тыкыр көзөмөлгө алууну тапшырды. Иш сапардын алкагында Ташиев жергиликтүү тургундар менен жолугуп, алардын арыз, сунуштарын укту. Селдин кесепеттерин жоюуда Өзгөчө кырдаалдар министрлигинин, облус жетекчисине, акимдин ыкчам иш алып барганына эл ыраазычылыгын билдиришти»,- деп айтылат маалыматта.
Маалым болгондой, электр жарыгы эртеси эле калыбына келтирилип, бардык тургундар аман-эсен куткарылып, таза суу менен камсыз кылуу үчүн өз убагында каражат бөлүнүп, жаңы суу түтүктөрү алынган.
«Жыйындын соңунда Камчыбек Ташиев жергиликтүү бийлик өкүлдөрүн, жетекчилерди таза иштөөгө жана өлкө башчысы Садыр Жапаровдун тапшырмасын так аткарууга чакырып, мамлекеттин акчасын сарамжалдуу пайдаланып, элге шарт түзүп берүү зарылдыгын белгилеп, мыйзамды сактабагандарга катаал чаралар көрүлөрүн эскертти»,- деп айтылат маалыматта.
Ал ошондой эле Президенттин Ош облусундагы өкүлүнө ар жума сайын жол курулушунун жүрүшүнө көзөмөл жүргүзүүнү тапшырды.