Бүгүн, 22-июль күнү Ош шаарындагы Борбордук базардын жүздөгөн соодагерлери нааразылыкка чыгып, Токтогул Сатылганов атындагы паркка чогулушту.
Анда сатуучулар Борбордук базарга уланган көпүрөлөр алынып салынганын, ал иштер соода-сатык иштерине тоскоолдук жаратып жатканын айтышты.
Чогулгандарга Ош шаарынын мэри Бакытбек Жетигенов чыгып, көпүрөлөрдүн баары алынарын, каза болгон аял көпүрөнүн үстүнөн акканын айтты.
Ошондой эле, сатуучулар базарга буюм-тайым алып кириш үчүн бир көпүрөнү калтыруу керектигин билдиришти. Өз учурунда мэр бир дагы көпүрө калбастыгын, мыйзамсыз көпүрөнүн баары бузуларын белгиледи.
Мындан сырткары, базарда иштегендер окуучу-студенттер кийим алган учурга чейин Борбордук базарды жылдырбай турууну суранышып, анда жок дегенlt бир көпүрөнүн бузбай турууну айтышты.
Бакытбек Жетигенов АТРдин негизинде Ош шаарына өткөн 7 гектар жерге муниципалдык базарды куруу пландалып жатканын, ал 2 айдын ичинде даярдаларын айтып, андагы жерден жерлер базарчыларга акысыз берилип, бүт шарттар түзүлөрүн, салык, ижара акыдан жеңилдиктер караларын белгиледи.
Жетигенов ошондой эле, Ош шаарында мамлекеттик ипотекалык курулуштун үйлөрү курулуп башталганын, аталган ипотекалык үйлөр боюнча соодагерлерге жардам берилерин билдирди.
Ага улай эле соодагерлер базар көчүрүлгөнгө чейин эл базарга кирүү үчүн бир көпүрөнү калтырууну суранышты. Өз кезегинде мэр көпүрөлөр алынарын, селден келсе дагы кырсык болорун айтты. Ал ошондой эле, базарга кире турган жолдор көп экенин, башка дагы жолдор бар экенин белгиледи.
Андан ары соодагерлердин өкүлдөрү Ош мэриясындагы жыйынга катышты. Анда Бакытбек Жетигенов Папан суу сактагычы жактагы Даңги участкасынан баштап базарга чейин Ак-Буура дарыясынын жээктерин мониторинг кылып чыгышарын айтты.
«Ак-Бууранын башында кырсык болуп, 4 адам каза болду. Базардан көпүрөнүн үстүнөн бир аял контейнери менен кошо агып кетип каза болду. Сел келгенде көпүрөлөргө суу капталып, базардын баарын суу басып кетти. Бул маселени өзүңөр жакшы билесиңер, ошону үчүн кырсыкка кайра болбойт деп эч ким кепилдик бербейт. Дагы эмне болот эч ким билбейт. Базарды көчүрөбүз деп кеңештик, чечтик, эки айдын ичинде көчүрөбүз. Силерди талаага таштап коюп, шарты жок жерге алып барып коюу деген болбойт. Биз буга чейин Жапалак жакта 3,5 гектар муниципалдык жерибиз бар болчу. Базарды ошол жакка жылдырганы жатканбыз. Бирок,» ал жакка көп адам соода кылганы барбай коет» деген нааразычылыктар болгону үчүн жерди башка жактан таптык. Бир-эки күн мурун Ишкаван айылына кеткен жолдо «Мегаполис» деген соода борбору бар, ошол жактан жер таптык. Ошол соода борбордун маңдайында 7 гектар муниципалдык жер бар экен. Ал жер өтө ыңгайлуу жер экен. Шаардын төрт жагынан ал жакка барса болот экен. Бүгүнтөн баштап жумуш башталды. Кууш жолдору бар жерлер болсо кеңейтип, асфальттап, жакшылап шар түзүп беребиз. Бир ай болобу, 1,5 ай болобу шартты түзгөндөн кийин ошол жакка көчүп барасыңар. Эң негизгиси ал базар муниципалдык базар болот, жерди силерге бекер беребиз»,- деди Б. Жетигенов.
Андагы жыйында соодагерлердин бири базарда 1-1,5 млн сомго чейин товар алып келип саткандар бар экенин, аларга мамлекет тарабынан берилген 100 миң сом жардам эч нерсе болбостугун билдирди.
«1-1,5 млн сомдук товарды алып саткандар бар. Аларга мамлекет тарабынан берилген 100 миң сом эч нерсе болбойт. Анан элдин баары жаңы базарга үйрөнгөнгө чейин бир жылдан ашык убакыт өтөт. Болбосо 2-3 жылдап алармандарды үйрөтүү кыйын, базарда отуруп биз жакшы билебиз. «Силер азыр базарды көчүрүп эле койсок, эл агылып барат» деген түшүнүк туура эмес да»,- деди ал.
Дагы бир соодагер базарды жылдыруу маселеси көптөн бери айтылып жатканын, бирок, ага карабай бир бөлөмлүү батирин сатып базардан контейнер алганын, ал селге агып кеткенин айтты.
«Биз бирден бутик сатып алдык эле. Селде ошончо бутик сууга агып кетти. Эми аны ким төлөйт? «Өзүңөр барып, сатып алган адамыңарга баргыла» деп атышат. Бутикти сатып алганыма бир жыл болду»,- деди ал.
Улуттук коопсуздук боюнча мамлекетик кызматынын Ош шаары боюнча башкармалыгынын башчысы 19-июль күнү өткөн жыйында Ак-Бууранын ичи кимге караштуу экенин сурап, жооптуу адамдарга кылмыш иши козголгонун айтты.
«19-июль күнү жыйын болуп, Ак-Буура дарыясынын ичи кимге караштуу деп сурасак, Суу чарба башкармалыгы айтып жатат, «дарыянын ичи бизге карабайт, дарыянын 50 метрлик корук зонасы бизге карайт» деп айтышты. Алар Ак-Бууранын ичин карабайт экен дагы, четиндеги 50 метрин карайт экен. Анткени ал жерден акча тапса болот. Ошонун негизинде, бүгүнкү күндө бизде кылмыш иши козголду. Азыр иликтөө жүрүп жатат. Анын жыйынтыгы менен жоопкерчиликке тартылчуулар тартылат. Ал боюнча Камчыбек Кыдыршаевич протоколдук тапшырма берип кетти. Эртең кылмыш иш боюнча Камчыбек Кыдыршаевичке, силерге да жообун беребиз»,-деди ал.
19-июль күнү УКМКнын төрагасы Камчыбек Ташиев жыйын куруп, убагында чара көрбөгөн жетекчилер жазага тартыларын атйып, мамлекет селден жабыркагандарга жардам берерин айткан болчу.
14-июль күнү нөшөрлүү жаандан кийин Ак-Буура дарыясында суун деңгээли көтөрүлүп, Борбордук базарды суу каптаган. Аталган кырсыктан кийин бир аял каза болуп, ондогон контейнерлер сууга аккан.