14-октябрь күнү Министрлер кабинетинин төрагасы Акылбек Жапаровдун онлайн катышуусунда Ош облусунун аймагында өндүрүш жана социалдык багыттагы 10 объекттердин ачылыш аземи болуп өттү. Бул тууралуу Президенттин Ош облусундагы өкүлчүлүгүнүн басма сөз кызматы билдирди.
Маалыматка караганда, алардын катарында Өзгөн районунун Салам-Алик айыл аймагынын Кара-Дөбө участкасындагы ЭСМ «И ЛОНГ-ОШ» жоопкерчилиги чектелген коомунун көмүрдү кайра иштетүүчү ишканасы ачылды.
Ачылыш аземге Президенттин Ош облусундагы ыйгарым укуктуу өкүлү Эльчибек Джантаев, Өзгөн районунун акими Каныбек Апбасов жана жергиликтүү тургундар катышты.
«Ишкананын максаты — абанын булганышын алдын алып, жогорку сапаттагы көмүр өндүрүп, ошол көмүр менен элди камсыз кылуу жана экспортко чыгаруу. Көмүрдү кайра иштетип чыгаруучу ишкананын жылдык максималдуу өндүрүштүк кубаттуулугу 600 миң тоннаны түзөт. Бул айына 50 миң тоннага барабар. Долбоорго 170 миллион сом инвестиция тартылган. Завод ишке кириши менен 149 жумуш орун түзүлүп, жергиликтүү тургундар иш менен камсыз болот»,- деп айтылат маалыматта.
Бүгүн Ош облусунда 3 өнөр жай, 7 – соцалдык объект ачылды. Алардын ичинде: 3 – балдар бакчасы, 2 – мектеп, 2 – үй бүлөлүк дарыгерлер тобу, 2 – тигүүчү цех жана 1 – көмүрдү кайра иштетүүчү ишкана.