Нобел комитети аталган сыйлыктын ээлерин аныктады. Дүйнөлүк ЖМКлардын жазганына караганда, Нобел сыйлыгына физиология жана медицина, физика, адабият, экономика боюнча өзүнүн эмгектери менен бир нече окумуштуу ээ болду.
Физиология жана медицина
2024-жылы ыйгарылган биринчи Нобель сыйлыгы физиология жана медицина боюнча 7-октябрда америкалык генетиктер Виктор Амброска (Массачусетс университети) жана Гэри Равканга (Массачусетс жалпы ооруканасы, Гарвард медициналык мектеби) микро-РНКны ачкандыгы жана анын гендин посттранскрипциялык жөнгө салуудагы ролу үчүн ыйгарылган. Алардын 1993-жылы жарык көргөн изилдөөлөрү эмне үчүн денедеги бир эле клеткалар ар кандай протеиндерди синтездей турганын түшүндүрөт.
Физика
8-октябрда физика боюнча Нобель сыйлыгы статист-физик Джон Хопфилдге (Принстон университети, АКШ) жана Джеффри Хинтонго (Торонто университети, Канада) машина үйрөнүү тармагындагы изилдөөлөрү үчүн ыйгарылды. Хопфилд сүрөттөрдү реконструкциялоочу ассоциативдик нейрон тармагын түздү, ал эми Хинтон алардын элементтерин тааныган кайталануучу тармакты курду. Эки илимпоздун 1980-жылдары жүргүзүлгөн иштери заманбап жасалма интеллекттин өнүгүшүнө түрткү болгон.
Химия
9-октябрда химия боюнча Нобель сыйлыгы Дэвид Бейкер (Вашингтон университети, АКШ), Демис Хассабис жана Жон Жамперге (Google DeepMind, Улуу Британия) ыйгарылды. Бейкердин 2003-жылы жарык көргөн изилдөөсү протеиндердин жаңы түрлөрүн чыгарган, ал эми 2020-жылы Жампер менен Хассабис алардын татаал түзүлүшүн алдын ала айткан жасалма интеллектин моделин курушкан.
Адабият
Түштүк Кореялык жазуучу Хан Ганга 10-октябрда адабият боюнча Нобель сыйлыгы ыйгарылды. Нобель комитетинин расмий билдирүүсүнө ылайык, сыйлык Хан Ганга «муундардын травмаларын чагылдырган жана адам жашоосунун морттугун ачып берген бай поэтикалык прозасы үчүн» берилди. Жазуучу көптөгөн абройлуу адабий сыйлыктардын лауреаты. 2007-жылы жарык көргөн «Вегетариан» романы үчүн 2016-жылы Букер сыйлыгына ээ болгон.
Тынчтык сыйлыгы
11-октябрда Нобел комитети дүйнөдөгү тынчтыкты орнотууга кошкон салымы үчүн Хиросима менен Нагасакидеги атомдук жардыруулардан жапа чеккендердин уюмдарынын ассоциациясы болгон жапониялык «Нихон Хиданкио» ассоциациясына Нобелдин тынчтык сыйлыгын ыйгарды. Аталган сыйлыктын негизги максаты — глобалдык өзөктүк куралсыздандыруу болуп эсептелет. Ассоциация 1956-жылы түзүлгөн жана ал «өзөктүк куралдан эркин дүйнөгө» жетишүү үчүн берилгендиги жана иш-аракеттери үчүн сыйлыкка ээ болгон.
Экономика
14-октябрда ыйгарылган эң акыркы сыйлык — экономика тармагындагы жетишкендиктери үчүн Нобель сыйлыгы болду, аны америкалыктар Дарон Асемоглу, Саймон Жонсон (Массачусетс технологиялык институту) жана Жеймс Робинсон (Чикаго университети) алышты. Изилдөөчүлөр ар кайсы өлкөлөрдүн калкынын бакубаттуулугуна мамлекеттик институттарды тийгизген таасирин изилдеп келишет, алардын иши кедей өлкөлөрдө экономикалык өсүштүн жетишсиздиги жана анын бай өлкөлөрдө болушунун себебин түшүндүргөн.
Нобель сыйлыгы (англ. Nobel Prize) — академикалык, маданий же илимий жетишкендиктер үчүн шведдик жана норвегиялык институттар тарабынан бир нече категориялар боюнча жыл сайын ыйгарылган эл аралык сыйлыктардын жыйындысы.
Сыйлыктар шведдик ойлоп табуучу Алфред Нобельдин керээзи менен 1895-жылы негизделген. Химия, адабият, тынчтык, физика жана физиология же медицина тармагындагы сыйлыктар биринчи жолу 1901-жылы ыйгарылган. 1980-жылга чейинки медалдар 23 карат алтындан чегилген, андан кийин 18 карат жашыл алтындан куюлуп, 24 карат алтын менен капталган. 1901-жылдан 2016-жылга чейин Нобель сыйлыктары жана экономика илимдери боюнча сыйлыктар 911 адам менен уюмдарга 579 жолу ыйгарылган. Айрымдары Нобель сыйлыгын бир нече жолу алып, жалпы 23 уюмду жана 881 инсанды түзгөн.
Кенирээк маалымат төмөнкү шилтемеде: